រាជធានីភ្នំពេញ ៖ តារាចម្រៀងអ្នកនាង យ៉ុង ច័ន្ទកន្និកា បានប្រកាសជាសាធារណៈថា រូបនាងនឹងធ្វើការទទួលថតបទច្រៀងជាថ្មីឡើងវិញ បន្ទាប់ពីនាងបានខកខានមិនបានបង្ហើរសំនៀងថ្មីៗរបស់ខ្លួនអស់ជាច្រើនឆ្នាំមកនេះ ក្រោយនាងសម្រេចចូលរោងការកសាងគ្រួសារ ។
ការសម្រេចវិលមកថតចម្រៀងជាថ្មីឡើងវិញនាពេលនេះ គឺនាងមិនយកកម្រៃពីការថតនោះឡើយ ពោលនាងធ្វើឡើងដោយការស្ម័គ្រចិត្ត ដើម្បីជាការចូលរួមចំណែកនៃការផ្សព្វផ្សាយ និងលើកស្ទួយវិស័យសិល្បៈ ខណៈពេលដែលនាងចាត់ទុកសកម្មភាពរបស់ខ្លួននាពេលនេះ គឺជាការដឹងគុណក្នុងនាមនាងក៏ធ្លាប់មានមុខមានមាត់តាមរយៈសិល្បៈនេះផងដែរ ។
ម្ចាស់បទ (វាចាស្រីឡង់សេ) អ្នកនាង យ៉ុង ច័ន្ទកន្និកា បានលើកឡើងតាមបណ្តាញសង្គមថា សូមប្រកាសជាផ្លូវការថា នាងខ្ញុំនឹងទទួលការថតចំរៀង ដោយពុំគិតកំរៃ ដើម្បីជាការចូលរួមការការផ្សព្វផ្សាយណាមួយដែរត្រូវការសំលេងនាងខ្ញុំចូលរួម គោលបំណងចង់ចូលរួមលើកស្ទួយវិស័យសិល្បៈ១បទ អប់រំ ដើម្បីស្ត្រី ។ល។
បើតាមអ្នកនាង យ៉ុង ច័ន្ទកន្និកា នេះជាអ្វីដែរនាងខ្ញុំចង់ធ្វើ ដើម្បីផលប្រយោជន៍រួម ជាការដឹងគុណវិស័យសិល្បៈដែរ ធ្វើអោយខ្ញុំមានកំណើតដ៏សព្វថ្ងៃនេះ ។ ដូច្នេះ គ្រប់ផ្នែកផលិតករធំ តូច ដែលស្រលាញ់សំលេងរបស់នាងខ្ញុំអោយទាក់ទងមកនាងខ្ញុំបាន ដោយមើលទៅតាមការជាក់ស្តែង អត្តន័យបទចំរៀងផ្សេងៗបេះដូងអ្នកសិល្បៈ។
យ៉ាងណា តាមរយៈការប្រកាសខាងលើពីអតីតតារាចម្រៀងអ្នកនាង យ៉ុង ច័ន្ទកន្និកា នាពេលនេះ មានមហាជន ជាពិសេសបណ្តាអ្នកគាំទ្របានសម្តែងការអបអរ និងសម្តែងការគាំទ្រសម្រាប់ការសម្រេចនៅក្នុងការវិលមកថតចម្រៀងជាថ្មីឡើងវិញពីអ្នកនាងនាពេលនេះ ខណៈពេលកន្លងមក បទចម្រៀងរបស់នាងក៏មានការគាំទ្រច្រើនផងដែរ ។
ជាការកត់សម្គាល់ អតីតតារាចម្រៀងនាង យ៉ុង ច័ន្ទកន្និកា បានសម្រេចផ្អឹបអាជីពចម្រៀងរបស់នាងចោល បន្ទាប់ពីនាងបានសម្រេចចូលរោងការកសាងគ្រួសារដែលគិតមកទល់នាពេលនេះ មានរយៈពេលប្រមាណជិត១០ឆ្នាំមកហើយ ។
តារាចម្រៀងរូបនេះត្រូវបានគេមើលឃើញថា ក្រោយរៀបការនាងបានចំណាយពេលជាច្រើនសម្រាប់គ្រួសារ ព្រមទាំងមុខរបរបើកហាងសាឡនផ្ទាល់ខ្លួន និងការលក់ឥវ៉ាន់តាមអនឡាញ ដោយនាងមិនបាននឹកនាច្រើននៅក្នុងការវិលមកកាន់អាជីពសិល្បៈនេះជាថ្មីឡើងវិញនោះឡើយ ។
ទោះជាយ៉ាងណា សម្រាប់ជីវភាពបច្ចុប្បន្ន យ៉ុង ច័ន្ទកន្និកា ត្រូបានគេដឹងថា នាងកំពុងរស់នៅក្នុងជីវភាពមួយហ៊ឺហារ និងមានសុភមង្គល ដោយសារតែនាងកាប់កបលើមុខបររកស៊ី ខណៈពេលដែលស្វាមីរបស់នាងក៏ជាមន្ត្រីរាជការមួយរូបដែលមានបុណ្យស័ក្តិធំម្នាក់ផងដែរ ៕
ចែករំលែកព័តមាននេះ