ADផ្ទាំងផ្សព្វផ្សាយពាណិជ្ជកម្ម

Picture

មិត្តភាព​៖ មិត្ត​តិច​ឬ​ច្រើន​គ្មាន​បញ្ហា សំខាន់​មិត្ត​ល្អ​មិន​ធ្វើបាប​មិត្ត

1 ខែ មុន
  • ភ្នំពេញ

មនុស្ស​ម្នាក់​ៗ​មិន​ថា បុរស​ឬ​ស្ត្រី ក្មេង​ឬ​ចាស់ គឺ​ពួក​គាត់​តែងតែ​មានការ​គិត និង​ការ​ចូល​ចិត្តផ្សេង​ៗ​​គ្នា ហើយ​គាត់​ក៏​បាន​ជួប​នូវ​បញ្ហា​ជីវិត​ជា​ច្រើន​មក​ហើយ​ដែរ​ ។ ពិសេស​នោះ គឺ​ការ​រាប់អាន​មនុស្ស ដែល​មិត្តភក្តិ​ខ្លះ​ធ្វើ​ឱ្យ​យើង​បាន​រីក​ចម្រើន…

មនុស្ស​ម្នាក់​ៗ​មិន​ថា បុរស​ឬ​ស្ត្រី ក្មេង​ឬ​ចាស់ គឺ​ពួក​គាត់​តែងតែ​មានការ​គិត និង​ការ​ចូល​ចិត្ត
ផ្សេង​ៗ​​គ្នា ហើយ​គាត់​ក៏​បាន​ជួប​នូវ​បញ្ហា​ជីវិត​ជា​ច្រើន​មក​ហើយ​ដែរ​ ។ ពិសេស​នោះ គឺ​ការ​រាប់អាន​មនុស្ស ដែល​មិត្តភក្តិ​ខ្លះ​ធ្វើ​ឱ្យ​យើង​បាន​រីក​ចម្រើន តែ​ខ្លះ​ទៀត​ក៏​ធ្វើ​ឱ្យ​យើង​តែងជួ​បបញ្ហា​មិន​ចេះ​ចប់ ​មិន​ចេះ​ហើយ ។

ប្រាកដ​ណាស់ ចំណងមិត្តភាព​ដ៏​ល្អ​រឹង​មាំ​មួយ គឺ​ត្រូវការ​ភាព​ស្មោះត្រង់​, ការ​ស្រលាញ់ចេញ​អស់ពី​ក្រអៅបេះដូង ដែល​វា​មិនមែន​ជា​មិត្តភាព​ក្លែងក្លាយ ឬ​គ្រាន់តែ​ជា​ការ​រាប់អាន​ក្នុង​រូបភាព​សម្តែង ។

ដូច្នេះ បើ​ចង់​ដឹង​ថា តើ​ត្រូវ​ឬ​ខុស «​ការ​រាប់អាន​មិត្ត​តិច ប្រសើរ​ជាង​មាន​មិត្ត​ច្រើន​» កោះសន្តិភាព​សុំ​លើកយក​មតិ​របស់​បងប្អូន​យើង​មួយ​ចំនួន ​ដែល​បាន​ផ្តល់​មកពាក់ព័ន្ធ​និង​ការ​រាប់អាន​មិត្ត​នេះ ។

បងប្អូន​ខ្លះ​បានឱ្យ​ដឹង​ថា គាត់​សុំ​រាប់អាន​តែ​មិត្ត​ម្នាក់​ទេ ហើយ​មិត្ត​ម្នាក់​នេះ​ គឺ​អាច​យល់ចិត្ត​គ្នា​ទៅ​វិញ​ទៅ​មក​គឺ​គ្រប់គ្រាន់​ហើយ មិន​ចាំបាច់​អី​ត្រូវ​មាន​មិត្តភក្តិ​ច្រើន​ទេ ។ ខ្លះ​ទៀត គាត់​និយាយ​ថា ការ​រាប់អាន​បាន​មិត្តភក្តិ​ច្រើន​ល្អ​ណាស់ ព្រោះ​អាច​មានបទពិសោធន៍​ល្អ​ៗ​ផ្លាស់​ប្តូរ​គ្នា និង​អាច​យក​មក​ចែករំលែក​​​យើង​បាន ហើយ​ពេល​ទៅ​ណា​មក​ណា​ម្តង​ៗ គឺ​បាន​ទៅ​ជា​ក្រុម​បង្ក​បរិយាកាស​ឱ្យ​កាន់តែ​សប្បាយ​រីករាយ​ថែម​ទៀត ។

ជួប​ជាមួយ​អ្នក​នាង​សុខា​ក់ ជា​បុគ្គលិក​ក្រុមហ៊ុន​ម្នាក់​បាន​ផ្តល់​ទស្សនៈ​ផ្ទាល់ខ្លួន ពាក់ព័ន្ធ​និងការ​រាប់អាន​មិត្ត​នេះ ដោយ​អ្នក​នាង​និយាយ​ថា គាត់​ចូល​ចិត្ត​មាន​មិត្តភក្តិ​ច្រើន​គឺ​ល្អ ដោយសារ​នៅ​ពេល​យើង​ជួបជុំ​គ្នា គឺ​និយាយ​គ្នា​លេងសើច​យ៉ាង​សប្បាយ ។ អ្នក​នាង​បន្ត​ថា តែបើ​មាន​មិត្ត​ម្នាក់​ក៏​ល្អ​ម្យ៉ាងដែរ ព្រោះ​មិត្ត​ម្នាក់​នោះ​គឺ​អាច​ជា​មិត្ត​ដ៏​ជិត​ស្និ​ទ្ធិ​បំផុត​របស់​ខ្ញុំ​ ដែល​ចូលរួម​សប្បាយ​និង​កើតទុក្ខ​ជាមួយ​គ្នា​បាន ហើយ​អាច​ជួយ​ដោះស្រាយ​បញ្ហា​របស់​យើង​បានលឿន​ផង​ដែរ ។ សរុប​មក សម្រាប់​ខ្ញុំ​​គឺ​មាន​មិត្ត​ច្រើន​ក៏​ល្អ មាន​មិត្ត​​តែ​ម្នាក់​ក៏​ល្អ ។

រីឯ​កញ្ញា​ធីតា​វិញ ជា​បុគ្គលិក​ក្រុមហ៊ុន​ម្នាក់​ដែរ គាត់​ក៏​បានឱ្យ​កោះសន្តិភាព​ដឹង​ថា សម្រាប់​គាត់ គឺ​សុំ​ជ្រើស​យក​មិត្ត​តិច​បាន​ហើយ តែ​ជា​ការ​រាប់អាន​ដោយ​ចិត្ត​ស្មោះត្រង់ ។ ហើយ​មិត្ត​ម្នាក់​នោះ​អាច​ជួយ​ជា​កម្លាំងចិត្ត និង​លើកទឹកចិត្ត​យើង​រាល់ពេល​ដែល​ជួប​បញ្ហា​លំបាក​ណាមួយ ដោយ​ផ្តល់​ជា​គំនិតល្អ​ៗ​មក​ឱ្យ​យើង​ច្រើន​បាន ។ គាត់​ថា ការ​មាន​មិត្តភក្តិ​ច្រើន​មិនសូវ​ល្អ​ទេ ព្រោះ​អាច​មាន​មាត់​.​ក​ក៏​ច្រើន​ដែរ និងអាចបង្ក​ជា​បញ្ហា​ផ្សេង​ៗ​ក៏​មាន ហើយ​ក៏​មិនសូវមាន​ចិត្ត​ស្មោះត្រង់ជាមួយយើង​ទៀត​ហ្នឹង ។

សម្រាប់​កញ្ញា​រី​តា ​ដែល​ជា​សិស្ស​នៅ​សាលា​ឯកជន​មួយ​កន្លែងក៏​បាន​ចែករំលែកនូវបទ​ពិសោធន៍​របស់​ខ្លួន​ផ្ទាល់​​បានកើតឡើង​ នៅ​ពេល​ដែល​គាត់​មាន​មិត្តភក្តិ​ច្រើន ប្រហែលជា៤​ទៅ​៥​នាក់​ដែរ ​នៅ​ក្នុង​ថ្នាក់ ​គាត់​ថាគឺ​មិនល្អ​ទាល់តែ​សោះ ។

គាត់បន្តថា កាល​គាត់​មាន​មិត្តភក្តិ​ច្រើន​នោះ ការ​រាប់អាន​មិនសូវ​ចុះសម្រុង​គ្នាទេ ម្នាក់​ៗ​តែង​មានគំនិត​ខ្វែង និង​ប្រឆាំង​គ្នា​ជា​រឿយ​ៗ ។ ពេល​ខ្លះ មិត្ត​នោះ​និយាយ​ពី​យើង​ប្រាប់​អ្នក​នេះ ហើយ​ពេល​នៅ ជាមួយ​អ្នក​នោះ បែរជា​និយាយ​ពី​យើង​ប្រាប់​អ្នក​នេះ​វិញ​។ ហើយ​រឿងរ៉ាវ​ខ្លះ យើង​មិន​បានដឹង​អី​ផង ស្រាប់តែ​គេ​ទម្លាក់​កំហុស​មក​ឱ្យ​ខុស​ទាំងស្រុង​ក៏​មាន ។ ដូច្នេះ ដើម្បី​មិន​ចង់ មានរឿង មិន​ចង់​ឈ្លោះ ក៏​សម្រេចចិត្ត​សុំ​ប៉ា​ម៉ាក់​ផ្លាស់​ប្តូរ​វេន​ទៅ​រៀន​វេន​ថ្ងៃ​វិញ ។ រី​តា​ប្រាប់​ទៀត​ថា ការ​ទៅ​រៀន​វេន​ថ្ងៃ​នោះ គឺ​គាត់​តាំងចិត្ត​សុំ​មិន​រាប់អាន​មិត្តភក្តិ​ច្រើន​ដូច​មុន​ទេ គឺ​សុំ​ត្រឹមតែ​ម្នាក់​គឺ​ល្អ​ណាស់​សម្រាប់​គាត់ ។

យ៉ាងណាសរុប​មក នេះគឺជា​ទស្សនៈ​និង​ជា​បទ​ពិសោធន៍ផ្ទាល់​របស់​មនុស្ស​រៀង​ៗ​ខ្លួន​ដែលគាត់​ធ្លាប់បាន​ជួប​ប្រទះ​ប៉ុណ្ណោះ ពេល​ខ្លះ​ខ្លួន​យើង​ក៏​មិនដឹង​ថា តើយើងនៅខ្វះចន្លោះអី ឬ​បាន​ធ្វើ​អ្វី​ដែល​ខុសឆ្គង​ឬទេ ទើបមាន​បញ្ហា​បែប​នេះ ?

កោះសន្តិភាព​សុំ​ចែករំលែក​វិធីសាស្ត្រ​ខ្លះ​ៗ​ដើម្បី​រក្សា​ចំណងមិត្តភាព​ឱ្យ​ស្ថិត​នៅ​គង់វង្ស ៖
១-​លះបង់​ពេលវេលា​៖ ការ​លះបង់​ពេលវេលា គឺ​ពិតជា​សំខាន់​ណាស់​។ បើ​អ្នក​គ្មាន​ពេល​សម្រាប់​គ្នា​ផង តើ​មិត្តភាព​របស់​អ្នក​គង់វង្ស​បាន​ដោយ​របៀប​ណា? ទោះបី​អ្នក​រវល់​យ៉ាងណា​ក៏​ដោយ បើ​អ្នក​អាច​ឆ្លៀត​បាន​តែ​មួយ​ភ្លែត​ដើម្បី​មិត្ត​របស់​អ្នក​នោះ​គេ​ប្រាកដជា​ស្រឡាញ់ ហើយ​អរគុណ​នូវ​ការ​ចំណាយពេល​របស់​អ្នក​ចំពោះ​គេ​។

២-​បង្កើន​ភាព​ជិត​ស្និទ្ធ​៖ ការ​បង្កើន​ភាព​ជិត​ស្និទ្ធ​នេះ អាច​ធ្វើ​ឱ្យ​ចំណងមិត្តភាព​របស់​អ្នក​កាន់តែ​រីក​ចម្រើន​ឡើង​។ អ្នក​គួរតែ​ព្យាយាម​ផ្ដល់​ភាព​ជិត​ស្និទ្ធ​ឱ្យ​គ្នា​ទៅ​វិញ​ទៅ​មក ទើប​មិត្តភាព​អាច​រក្សា​បាន​យូរ ។ ភាព​ស្និទ្ធស្នាល​នេះ មិន​គួរ​ត្រូវ​បាន​កាត់​បន្ថយ​ជា​ដាច់ខាត គឺ​វា​គួរតែ​បង្កើន ឡើង​ទៅ​វិញ ពីព្រោះ​អ្នក​មិនមែន​ទើបតែ​ស្គាល់គ្នា​នោះ​ទេ គឺ​អ្នក​ស្គាល់គ្នា​យូរហើយ ដូច្នេះ កុំឱ្យ​ភាព​ស្និទ្ធ ស្នាល​នេះ​បាត់បង់​ឱ្យ​សោះ​។

៣-​ត្រូវ​ចេះ​ជួយ​គ្នា​ទៅ​វិញ​ទៅ​មក​៖ ការ​ជួយ​គ្នា​ដោយ​សុទ្ធចិត្ត​និង​ភាព​ស្មោះត្រង់ អាច​រក្សា​ចំណងមិត្តភាព​ឱ្យ​បាន​គង់វង្ស ។ មិត្ត​ខ្លះ​ទ័ល​ខ្លាំង​ហើយ ទើប​គេ​ដាច់​ចិត្ត​សុំ​ជំនួយ​ពី​អ្នក​។ ដូច្នេះ ប្រសិនបើ​អ្នក​អាច​ជួយ​បាន ក៏​ជួយ​តាម​លទ្ធភាព​ទៅ យ៉ាង​ហោច​ក៏​បាន​ជួយ​ខ្លះ​ដែរ ព្រោះ​វា​ប្រសើរ​ជាង​មិន​បាន​ជួយ​អ្វី​សោះ ហើយ​ក៏​ដើម្បី​ជួយ​សម្រាល​បន្ទុក​គ្នា​ដែរ​។

៤-​មិន​ត្រូវ​លាក់បាំង​និង​និយាយ​កុហក​៖ ក្នុង​នាម​ជា​មិត្ត​នឹង​គ្នា បើ​អ្នក​មានរឿង​អ្វី គួរតែ​និយាយ​ប្រាប់​គ្នា​ឱ្យ​បានដឹង​។ ពេល​ខ្លះ​របស់​គេ​ក៏​អាច​ជួយ​ដោះស្រាយ​បញ្ហា​របស់​អ្នក​បាន​ដែរ​។ ហើយ​ការ​មិន​លាក់បាំង គឺ​អាច​ធ្វើ​ឱ្យ​មិត្តភាព​របស់​អ្នក​កាន់តែ​រីក​ចម្រើន ហើយ​អ្នក​រឹតតែ​យល់​ពី​គ្នា​និង​ស្គាល់គ្នា​បាន​កាន់តែ​ច្រើន​។ ចូរ​កុំ​និយាយ​កុហក​ឱ្យ​សោះ ព្រោះ​ការ​និយាយ​កុហក​អាច​ធ្វើ​ឱ្យ​មនុស្ស​បាត់បង់​សេចក្ដី​ទុកចិត្ត​បាន​។

៥-​ត្រូវ​ជឿ​ទុកចិត្ត​និង​លើកទឹកចិត្ត​គ្នា​ទៅ​វិញ​ទៅ​មក​៖ ការ​ជឿ​ទុកចិត្ត​គ្នា​គឺជា​កម្លាំង​មួយ​ដែល​អាច​ធ្វើ​ឱ្យ​មនុស្ស​មាន​សុភមង្គល​និង​សេចក្ដីសុខ​។ ម្យ៉ាងទៀត អ្នក​គួរតែ​លើកទឹកចិត្ត​គ្នា​ទៅ​វិញ​ទៅ​មក​ផង​ដែរ ព្រោះ​វា​អាច​ធ្វើ​ឱ្យ​អ្នកមាន​អារម្មណ៍ល្អ​នឹង​គ្នា​ហើយ​ក៏​មាន​កម្លាំង​ទៅ​ជម្នះ​នូវ​រាល់​ឧបសគ្គ​ទាំងឡាយ​ដែល​កើត​មាន​ក្នុង​ជីវិត​របស់​អ្នកផង​ដែរ​។

អត្ថបទសរសេរ ដោយ