ខេត្តបន្ទាយមានជ័យ ៖ ករណីផឹកស៊ីទាស់ពាក្យសម្តីគ្នារហូតទាញកាំភ្លើងបាញ់ទៅលើជនរងគ្រោះ
ចំបំពង់.ករងរបួសធ្ងន់ ហើយត្រូវបានបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ខណៈជនដៃដល់កំពុងរត់គេចខ្លួននៅមិនទាន់ចាប់បាននៅឡើយ គិតត្រឹមថ្ងៃទី២៩ ខែកុម្ភៈ ឆ្នាំ២០២៤ ស្ថិតនៅភូមិគោកទន្ទាប់ ឃុំបន្ទាយនាង ស្រុកមង្គលបូរី ប៉ុន្តែសមត្ថកិច្ចកំពុងស្រាវជ្រាវរកជនដៃដល់ ដើម្បីដោះស្រាយតាមផ្លូវច្បាប់ ។
លោកវរសេនីយ៍ឯក ស៊ីន ណារ៉ាក់ អធិការនគរបាលស្រុកមង្គលបូរីបានប្រាប់ថា ជនដៃដល់ត្រូវបានស្គាល់ឈ្មោះ ខន សៀវឃិញ ភេទប្រុស អាយុ២០ឆ្នាំ ។ រីឯជនរងគ្រោះឈ្មោះ ជា សុជាតិ ភេទប្រុស អាយុ២៥ឆ្នាំ ដែលរស់នៅភូមិជាមួយគ្នា ភូមិគោកទម្លាប់ ឃុំបន្ទាយនាង ស្រុកមង្គលបូរី។
លោកបានបញ្ជាក់ថា កាលពីវេលាម៉ោង១២យប់ចូលថ្ងៃទី២៦ ខែកុម្ភៈ ឆ្នាំ២០២៤ ស្ថិតនៅចំណុចប្រឡាយវាលស្រែ ក្បែរភូមិគោកទម្លាប់ ឃុំបន្ទាយនាង ស្រុកមង្គលបូរី មានកម្មវិធីជួបជុំផឹកស៊ី ក្នុងចំណោម៤ទៅ៥នាក់ក៏មានទំនាស់ពាក្យសំដី ហើយជនដៃដល់ឈ្មោះ ខន សៀវឃិញ បានយកអាវុធខ្លីម៉ាកឡុកអូទ្រីសដែលមានជាប់ខ្លួនបាញ់ទៅឡើងលើ១គ្រាប់ ដើម្បីគំរាម ។
បន្ទាប់មក បាញ់ទៅជនរងគ្រោះឈ្មោះជា សុជាតិ ១គ្រាប់ចំបំពង់.ករបួសធ្ងន់ ត្រូវបានបញ្ជូនទៅមន្ទីពេទ្យមិត្តភាពកម្ពុជា-មង្គលបូរី តែដោយស្ថានភាពជនរងគ្រោះធ្ងន់ធ្ងរពេក ក៏បញ្ជូនទៅកាន់មន្ទីពេទ្យខេត្តបាត់ដំបង ។ លោកវរសេនីយ៍ឯក ស៊ីន ណារ៉ាក់ បានបញ្ជាក់ថា ក្រោយជនសង្ស័យបាញ់ទៅលើជនរងគ្រោះហើយក៏បានរត់គេចខ្លួនបាត់ ។
កម្លាំងនគរបាលជំនាញបានចុះពិនិត្យ ត្រូវបានឈ្មោះ កាន់ សុខន (ជាឪពុកជនដៃដល់)បានយកកាំភ្លើងខ្លីម៉ាកឡុកអូទ្រីសដែលជនបង្កយកទៅលាក់ទុកក្នុងលូ បានយកមកប្រគល់ជូនសមត្ថកិច្ច ដោយមានអាវុធខ្លី១ដើមមានចំនួន២គ្រាប់ កាលពីថ្ងៃទី២៨ ខែកុម្ភៈ ឆ្នាំ២០២៤ ហើយកម្លាំងជំនាញកំពុងស្រាវជ្រាវតាមចាប់ខ្លួនជនដៃដល់ដើម្បីចាត់ការតាមច្បាប់។
តាមព័ត៌មានទទួលថា ក្រោយករណីជនដៃដល់បាញ់ទៅលើជនរងគ្រោះហើយ សាច់ញាតិជនដៃដល់បានជួបដោះស្រាយគ្នាជាមួយសាច់ញាតិជនរងគ្រោះ តែករណីប្រើប្រាស់អាវុធខ្លីខុសច្បាប់ និងបាញ់ប្រហារទៅលើជនរងគ្រោះជាករណីឃាតកម្មប៉ុនប៉ងសម្លាប់មនុស្ស ដូច្នេះ ត្រូវមានទោសមិនអាចរួចពីសំណាញ់ច្បាប់ឡើយ ។
ចែករំលែកព័តមាននេះ