ខេត្តក្រចេះ ៖ សមត្ថកិច្ចចម្រុះបានចុះបង្ក្រាបទីតាំងកែច្នៃក្បាលឆក់មួយកន្លែង និងរឹបអូសបានសម្ភារជាវត្ថុតាងជាច្រើនមុខផងដែរ ។ ការចុះបង្ក្រាបទីតាំងកែច្នៃក្បាលឆក់ផលិតទិញ-លក់ និងរក្សាទុកឧបករណ៍ឆក់(ត្រី)មួយកន្លែងនោះ សមត្ថកិច្ចបានធ្វើឡើងនៅថ្ងៃទី២៩ ខែកុម្ភៈ ឆ្នាំ២០២៤…
ខេត្តក្រចេះ ៖ សមត្ថកិច្ចចម្រុះបានចុះបង្ក្រាបទីតាំងកែច្នៃក្បាលឆក់មួយកន្លែង និងរឹបអូសបានសម្ភារជាវត្ថុតាងជាច្រើនមុខផងដែរ ។ ការចុះបង្ក្រាបទីតាំងកែច្នៃក្បាលឆក់ផលិតទិញ-លក់ និងរក្សាទុកឧបករណ៍ឆក់(ត្រី)មួយកន្លែងនោះ សមត្ថកិច្ចបានធ្វើឡើងនៅថ្ងៃទី២៩ ខែកុម្ភៈ ឆ្នាំ២០២៤ ស្ថិតនៅភូមិផ្សារស្នួល ឃុំស្នួល ស្រុកស្នួល ខេត្តក្រចេះ ។
ក្នុងការបង្ក្រាបនេះ មានការដឹកនាំសម្របសម្រួលដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្ត ខណ្ឌរដ្ឋបាលជលផលនៃមន្ទីរកសិកម្មរុក្ខា ប្រមាញ់ និងនេសាទខេត្ត និងមានការចូលរួមពីលោកអភិបាលស្រុកស្នួល, កំលាំងអធិការដ្ឋាននគរបាលស្រុក, លោកមេឃុំ, នគរបាលប៉ុស្តិ៍រដ្ឋបាលស្នួល និងលោកមេភូមិផងដែរ ។ ឃាត់ខ្លួនម្ចាស់ទីតាំងមានឈ្មោះ សៀង សៀកត្រាយ ជាតិខ្មែរ ភេទប្រុស អាយុ៣១ឆ្នាំ ។
វត្ថុតាងដែលសមត្ថកិច្ចរឹបអូសបានរួមមាន ៖1-អាំងវែកទ័រឆក់ត្រីប្រភេទស្រូប និងក្តៅនាំចូលពីប្រទេសចិនចំនួន២២គ្រឿង ។ 2-អាំងវែកទ័រកែច្នៃ(ឆក់ក្តៅ)ចំនួន១៥គ្រឿង ។ 3-ប្រអប់ឈើសម្រាប់កែច្នៃអាំងវែកទ័រឆក់ត្រីចំនួន២៨០ប្រអប់។
លោកម៉ុក ពន្លក នាយខណ្ឌរដ្ឋបាលជលផលនៃមន្ទីរកសិកម្ម, រុក្ខាប្រមាញ់និងនេសាទ ខេត្តក្រចេះ បានមានប្រសាសន៍ថា ការលក់ឬរក្សាទុកឧបករណ៍ឆក់ និងសម្ភារៈផ្សេងទៀតដើម្បីបម្រើឲ្យការនេសាទល្មើសច្បាប់ គឺជាអំពើខុសច្បាប់ ។ ជាពិសេស អ្នកផលិតសម្ភារ និងឧបករណ៍អេឡិចត្រូនិច បម្រើឲ្យការឆក់ឬឧបករណ៍នេសាទល្មើសច្បាប់ត្រូវតែបញ្ឈប់ ។
លោកនាយខណ្ឌបានឲ្យដឹងថា វត្ថុតាងនិងបុរសជាម្ចាស់ផ្ទះ ដែលជាអ្នកលក់ដុំឆក់ត្រូវបានបញ្ជូនទៅសាលាដំបូងខេត្តក្រចេះ នៅរសៀលថ្ងៃទី២៩ ខែកុម្ភៈ ឆ្នាំ២០២៤នេះរួចហើយ ។ លោកបានបញ្ជាក់ថា វត្ថុតាងទាំងអស់ និងម្ចាស់ទីតាំងត្រូវបានសមត្ថកិច្ចនាំមកខណ្ឌរដ្ឋបាលជលផលក្រចេះ កសាងសំណុំឯកសារបញ្ជូនទៅសាលាដំបូងខេត្ត ចាត់ការបន្តតាមនីតិវិធីរួចរាល់ហើយ ។
លោក ម៉ុក ពន្លក អំពាវនាវឲ្យប្រជាពលរដ្ឋ កុំរក្សាទុកឬលក់ដូរដុំម៉ូទ័រឆក់ត្រីដែលជាឧបករណ៍នេសាទល្មើសច្បាប់នេះ ហើយលោកក៏អំពាវនាវឲ្យប្រជាពលរដ្ឋចូលរួមថែរក្សាធនធានមច្ឆជាតិឲ្យបានគង់វង្ស ដើម្បីជាមរតកសម្រាប់ប្រជាជាតិយើងទៅអនាគត ៕
ចែករំលែកព័តមាននេះ