រាជធានីភ្នំពេញ ៖ គេថាធ្វើជាមនុស្ស កុំម៉ាក់ងាយអ្នកដទៃ តែសំបកក្រៅ! ព្រោះមនុស្សម្នាក់ៗសុទ្ធតែមានចំណុចខ្លាំងរៀងៗខ្លួន តួយ៉ាង យុវជនវ័យក្មេង សាច់ដុំធំៗ ដែលតែងតែឡើងរិញវាយតប់នឹងគូប្រកួត បានព្យាយាមជំនះពាក្យម៉ាកងាយថា «អ្នកប្រដាល់ពុំចេះអក្សរ» ដោយសម្រេចចិត្តធ្វើរឿងនេះ ដើម្បីអនាគតរបស់ខ្លួន ។
ពោលដល់ចំណុចនេះ អាចចាត់ទុកថា នេះជាគំរូល្អមួយសម្រាប់បងប្អូនក្នុងវិស័យកីឡា និយាយជារួមនិងនិយាយដោយឡែកសម្រាប់យុវជនជាទូទៅ កុំឱ្យបោះបង់ចោលការសិក្សា ។ ជាក់ស្តែង កីឡាករ គោរមៈ ចន្ទរាជ្យ ដែលជាកីឡាដ៏វ័យក្មេង និងជាអ្នកប្រដាល់ល្បីឈ្មោះគួរសមមួយរូបនេះ បានស្រវ៉ាយកការសិក្សា ព្រោះលោកចង់ជំនះពាក្យថា «អ្នកប្រដាល់ ពុំចេះអក្សរ»។
ជាការពិតណាស់ ចំណេះដឹងជារឿងសំខាន់ ទោះកីឡាករ គោរមៈ ចន្ទរាជ្យ ជាកីឡាករវ័យក្មេង និងមានអាជីពជាអ្នកប្រដាល់ក៏ពិតមែន តែកីឡាករនេះនៅតែលៃលកពេលវេលាបន្តការសិក្សានៅសាលា ។ ខណៈខ្លួនខិតខំប្រឹងប្រែងតស៊ូជាមួយការងារប្រដាល់ ខំហាត់ប្រដាល់ផង ដើម្បីឡើងប្រកួតលើរិញនោះ ប្អូននៅតែប្រកាន់ជំហរបន្តការសិក្សា ដោយខិតខំប្រឹងរកថវិកាតាមរយៈការប្រដាល់មកផ្គត់ផ្គង់ការរៀនសូត្រ ហើយនាពេលអនាគតកីឡាសំបូរមន្តស្នេហ៍រូបនេះចង់តំណាងកម្ពុជាក្នុងការប្រកួតលើឆាកជាតិ និងប្រកួតលើអន្តរជាតិផងដែរនោះ។
តើបងប្អូនចង់ដឹងទេ ពាក្យអ្វីដែលកីឡាកររូបនេះខ្លាចបំផុតពេលប្រកួត? ហើយពាក្យទាំងនោះ គួរប្រើទៀត ឬអត់ ចំពោះកីឡាករពេលប្រកួតចាញ់ ឬប្រកួតមិនបានល្អនោះ។
តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព កីឡាករប្រដាល់
វ័យក្មេង គោរមៈ ចន្ទរាជ្យ បានប្រាប់ថា សព្វថ្ងៃទោះខ្លួនជាអ្នកប្រដាល់ក៏ពិតមែន តែខ្លួនពុំបានបោះបង់ចោលការសិក្សានោះទេ ព្រោះខ្លួនខ្លាចពាក្យថា «អ្នកប្រដាល់ ពុំចេះអក្សរ» ចេះតែវាយ ចេះតែប្រកួត ដូច្នេះពាក្យមួយនេះកំពុងបាននឹងជំនះជាមួយវា ស្រវ៉ាការរៀនសូត្រ ក្រេបចំណេះពីគ្រូនោះ។
នាពេលបច្ចុប្បន្ន ចន្ទរាជ្យ ជាកីឡាករមួយរូប មានវ័យទើបតែ ១៦ឆ្នាំ រៀនថ្នាក់ទី ១១ នៅសាលាបាក់ទូក ប្អូនថាជីវិតជាកីឡាករ និងជាសិស្សហាក់ដូចជាខុសគ្នាឆ្ងាយ ដោយប្អូនត្រូវឆ្លៀតពេលហាត់ប្រដាល់ផង រៀនសូត្រផង ដូច្នេះ រៀងលំបាកខ្លាំងណាស់ដែរ សម្រាប់ប្អូនផ្ទាល់ ។
គោរមៈ ចន្ទរាជ្យ សំបូរស្នេហ៍ដែលជាកីឡាករចាប់យកអាជីពអ្នកប្រដាល់ទាំងវ័យក្មេងប្អូនថា មកពីមូលហេតុស្រឡាញ់ប្រដាល់ ព្រោះប្អូនមានក្តីស្រម៉ៃចង់ក្លាយជាអ្នកប្រដាល់ដែលមានកត្តនាមល្បីល្បាញមានគេស្គាល់ច្រើន ចង់ប្រកួតតំណាងជាតិ និងជាពិសេសចង់ប្រកួត ONE Championship ជាដើម។
នៅពេលមានការចោទសួរថា ឆ្នាំក្រោយតើអាចផ្អាកការប្រកួតឬទេ ព្រោះជាឆ្នាំត្រូវប្រឡងបាក់ឌុបនោះ? កីឡាករ ចន្ទរាជ្យ ពន្យល់ថា ខ្លួនមិនអាចផ្អាកនោះឡើយ គ្រាន់តែទទួលការប្រកួតតិចតួច និងឆ្លៀតពេលអោយច្រើនជាមួយការសិក្សានោះ ព្រោះបានតស៊ូច្រើនមកហើយ ដូច្នេះខំបនិ្តចទៀតក៏មិនជាបញ្ហានោះទេ។
កីឡាករ ចន្ទរាជ្យ បានប្រឡូងក្នុងសង្វ្រៀនប្រដាល់ តាំងពីឆ្នាំ២០១៥ កាលនោះមានអាយុ៧ឆ្នាំ រៀនថ្នាក់ទី៣ ហាត់ប្រដាល់ ហើយអាយុ១២ឆ្នាំ ឡើងប្រកួតប្រដាល់តែម្តង ដោយមកដល់ខ្លួនបានប្រកួត៧០ដង ឈ្នះ៥៣ដង ចាញ់៩ដង និងស្មើ៤។
កីឡាករូបនេះ មានបងប្អូន៣នាក់ ខ្លួនជាកូនទី២ ហើយសាច់ញាត្តិបងប្អូនរបស់កីឡាកររូបនេះក៏ជាអ្នកប្រដាល់កាលពីកន្លងទៅ ហើយចំពោះការហាត់ប្រដាល់នេះខាងក្រុមគ្រួសារក៏ធ្លាប់បានហាមឃាត់ ព្រោះខ្លាចកូនឈឺ កូនបែកមុខបែបមាត់មិនស្អាត ពោលឪពុកម្តាយណាមិនស្រឡាញ់កូននោះ។ នៅពេលមានការចោទសួរថា តើពាក្យអ្វីដែលលោកខ្លាចបំផុតពេលក្លាយជាកីឡាករប្រដាល់នោះ?
ពាក្យដែលខ្លាចចំពោះកីឡាកររូបនេះ គឺប្រកួតមិនឈ្នះ ឬចាញ់ ខ្លាចមហាជនរិះគន់ បន្តុះបង្អាប់ ដូច្នេះត្រូវចំណុចនេះ លោកសុំគួរណាមានការលើកទឹកចិត្តវិញទើបជាការប្រសើរ ព្រោះការប្រកួតតែមានចាញ់និងឈ្នះជារឿងធម្មតា។
គួរបញ្ជាក់ដែរថា ទោះខ្លួនជាកីឡាករក៏ពិតមែន តែកីឡាកររូបនេះនៅតែស្រវ៉ាការសិក្សា មិនចង់អវិជ្ជាទាំំងវ័យក្មេងនោះឡើយ៕ ដោយ៖លីហួ គីមឆាយ.
ចែករំលែកព័តមាននេះ