រាជធានីភ្នំពេញ ៖ រថយន្តម៉ាក TOYOTA RAV4 មួយគ្រឿង ទាំងអ្នកបើកបរ រួមទាំងអ្នកជិះជាមួយសុទ្ធតែជាជនជាតិចិនទាំងអស់ បានបើកបរធ្វើដំណើរក្នុងល្បឿនលឿន ហើយពេលទៅដល់ត្រង់ចំណុចផ្លូវបំបែកជា៤…
រាជធានីភ្នំពេញ ៖ រថយន្តម៉ាក TOYOTA RAV4 មួយគ្រឿង ទាំងអ្នកបើកបរ រួមទាំងអ្នកជិះជាមួយសុទ្ធតែជាជនជាតិចិនទាំងអស់ បានបើកបរធ្វើដំណើរក្នុងល្បឿនលឿន ហើយពេលទៅដល់ត្រង់ចំណុចផ្លូវបំបែកជា៤ ក៏បានបុកគ្នា ជាមួយរថយន្តទ្រុង ១គ្រឿងទៀត ដែលកំពុងបើកលឿនដូចគ្នា បណ្តាលឲ្យគាបជាប់គ្នា ហើយបុរសជនជាតិចិនម្នាក់រងរបួស រីឯរថយន្តទាំង២គ្រឿង បានរងការខូចខាតដូចគ្នាផងដែរ ។
ឧប្បត្តិហេតុនេះ បានកើតឡើងកាលពីវេលាម៉ោង០២និង៣៥នាទីរសៀលថ្ងៃទី២៧ ខែកុម្ភៈ ឆ្នាំ២០២៤ នៅត្រង់ចំណុចផ្លូវបេតុងបំបែកជា៤ ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាន បានឲ្យដឹងថា បុរសជនជាតិចិន ដែលរងរបួសនោះ មិនត្រូវបានស្គាល់អត្តសញ្ញាណឡើយ នៅមុនពេលកើតហេតុ មានជនជាតិចិន ១ក្រុម បើកបរ និងជិះរថយន្តម៉ាក TOYOTA RAV4 ១គ្រឿង ពណ៌ខ្មៅ ពាក់ស្លាកលេខ ភ្នំពេញ 2O-4503 ធ្វើដំណើរក្នុងល្បឿនលឿន និងក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ ដែលជាចំណុចផ្លូវបំបែកជា៤ អត់បន្ថយល្បឿននោះឡើយ ។
ប្រភពដដែលបានប្រាប់ឲ្យដឹងបន្តទៀតថា ស្របពេលនោះ ក៏មានរថយន្តទ្រុង ម៉ាកហ៊ីយ៉ាន់ដាយ ពណ៌ស ១គ្រឿងទៀត ពាក់ស្លាកលេខ ភ្នំពេញ 2D-7082 ក៏បើកលឿនដែរ ធ្វើដំណើរក្នុងទិសដៅពីត្បូងទៅជើង ហើយអត់បន្ថយល្បឿននោះដែរ។ ដោយភាគីទាំង២ ខ្វះការប្រុងប្រយ័ត្នដូចគ្នា ទើបកៀរបោកផ្ទប់គ្នាពេញទំហឹង បណ្តាលឲ្យគាបជាប់គ្នា ហើយរថយន្ត RAV4 រងខូចខាតខ្ទេចចំហៀងខ្លួនស្ដាំ រីឯរថយន្តទ្រុង ហ៊ីយ៉ាន់ដាខូចខាតចំហៀងខាងឆ្វេង និងបណ្ដាលឲ្យបុរសជនជាតិចិនម្នាក់ រងរបួស ។
ក្រោយពេលកើតហេតុ បុរសជនជាតិចិន ដែលរងរបួសរូបនោះ ត្រូវបានជនជាតិចិនដូចគ្នា ដឹកតាមរថយន្តផ្ទាល់ខ្លួន យកទៅកាន់មន្ទីរពេទ្យដើម្បីព្យាបាលរបួស បន្ទាប់មកនគរបាលប៉ុស្តិ៍សំរោងក្រោម និងនគរបាលខណ្ឌពោធិ៍សែនជ័យ បានចុះទៅធ្វើការវាស់វែង និងនាំយករថយន្តទាំង២គ្រឿង ទៅរក្សាទុករង់ចាំដោះស្រាយតាមច្បាប់ ៕
ចែករំលែកព័តមាននេះ