រាជធានីភ្នំពេញ៖ តារាពហុជំនាញ អ្នកនាង ខាត់ សុឃីម កំពុងស្ថិតក្នុងការពិចារណានៅឡើយ សម្រាប់ឈរឈ្មោះជាបេក្ខភាពនៃការបោះឆ្នោតជាប្រធានសមាគមសិល្បករខ្មែរ ខណៈពេលដែលបេក្ខភាពសម្រាប់ឈរឈ្មោះក្នុងតំណែងមួយនេះនៅមិនទាន់ច្បាស់នៅឡើយ ។
យ៉ាងណា អ្នកនាង ខាត់ សុឃីម បញ្ជាក់ថា អ្នកនាងនឹងពិចារណាសម្រាប់តំណែងជាប្រធានសមាគមសិល្បករខ្មែរ ក្នុងពេលដែលអ្នកនាងត្រូវបានអ្នកសិល្បៈជាច្រើននាក់បោះឆ្នោតគាំទ្រចេញពីចិត្តសម្រាប់ឲ្យនាងធ្វើជាប្រធានសមាគម ។
តាមរយៈវីដេអូបង្ហោះលើបណ្តាញសង្គមអ្នកនាងខាត់ សុឃីម បានលើកឡើងថា ដំបូងឡើយ អ្នកនាងមិនមានគោលបំណងនៅក្នុងការធ្វើជាប្រធានសមាគមសិល្បករខ្មែរនេះឡើយ ដោយសារអ្នកនាងគិតថា ការធ្វើប្រធាននេះវាហត់ ហើយខ្លាចធ្វើទៅមិនត្រូវចិត្តគេ ។
អ្នកនាងបញ្ជាក់ថា លុះក្រោយមក ស្វាមីអ្នកនាងបានលើកទឹកចិត្ត និងគាំទ្រឲ្យនាងធ្វើប្រសិនបើគេបោះឆ្នោតអោយ ព្រោះមិនមែននៅសុខៗយើងចង់ទៅឡើងខ្លួនឯងនោះឡើយ ។ អ្នកនាងថា មិនមែនយើងឡើងទៅសម្រាប់ការប្រកួតប្រជែងជាមួយអ្នកណាម្នាក់នោះឡើយ ប៉ុន្តែបើអ្នក
សិល្បៈជាច្រើនគាត់គាំទ្រ និងបោះឆ្នោតឲ្យនោះយើងធ្វើទៅ ពីព្រោះនាងក៏ចង់ដឹងខ្លួនឯងដែរថា តើអាចកែប្រែស្ថានការណ៍ឲ្យល្អជាងនឹង ឬក៏អាចធ្វើត្រឹមប៉ុណ្ណឹងបានឬអត់?
នាងបញ្ជាក់ថា ប្រសិនបើក្នុងករណីដែលនាងមិនអាចកែប្រែអ្វីបាននោះ នាងនឹងធ្វើលិខិតសុំឈប់ភ្លាមៗតែម្តង ដោយសារនាងមិនមានសមត្ថភាពគ្រប់គ្រាន់សម្រាប់ធ្វើការងារមួយនេះឡើយ ។
យ៉ាងណា បើតាមអ្នកនាង ខាត់ សុឃីម សម្រាប់តំណែងជាប្រធានសមាគមសិល្បៈករខ្មែរនាពេលនេះ គឺនាងកំពុងតែពិចារណានៅឡើយ ព្រោះការគាំទ្រធ្វើជាប្រធាននេះមិនមែនមានតែរូបនាងឡើយ ពោលគឺមានអ្នកសិល្បះច្រើននាក់ទៀត ហេតុនេះ ទុកឲ្យពួកគាត់ជ្រើសរើស ប៉ុន្តែបើពួកគាត់ពិតជាពេញចិត្ត ហើយបោះឆ្នោតឲ្យនាងធ្វើ នោះនាងអាចទៅបាន ។
អ្នកនាង ខាត់ សុឃីម បានលើកឡើងបន្ថែមថា បើទោះបីជានាងមិនមែនជាប្រធានសមាគម ឬអ្នកធ្វើការនៅក្រសួង-ស្ថាប័ន ពាក់ព័ន្ធណាមួយក៏ដោយ ប៉ុន្តែអ្នកនាងនៅតែជាអ្នកសិល្បៈមួយរូបដែលចង់ជួយអ្នកសិល្បៈ ហើយបើនាងមានលទ្ធភាពនាងនឹងធ្វើការងារឲ្យអោយច្រើនសម្រាប់សិល្បៈ ។ អ្នកនាងបញ្ជាក់ថា នាងអាចមានបានក៏ដោយសារសិល្បៈ ហេតុនេះ អ្នកនាងចង់ធ្វើអ្វីៗដើម្បីសិល្បៈ និងឲ្យសិល្បៈកាន់តែល្អជាបន្តបន្ទាប់ទៀត ។
ទោះជាយ៉ាងណា អ្នកនាបានសម្តែងអំណរគុណសម្រាប់ការគាំទ្រយ៉ាងច្រើនពីសំណាក់មហាជន ក្រុមគ្រួសារ ជាពិសេស អ្នកសិល្បៈដូចគ្នា ដើម្បីឲ្យនាងធ្វើជាប្រធានសមាគមសិល្បករខ្មែរ ហើយប្រសិននាងពិតជាអាចក្លាយជាប្រធានសមាគមសិល្បករខ្មែរ តាមរយៈការបោះឆ្នោតគាំទ្រនោះ នាងនឹងសន្យាប្រឹងប្រែងឲ្យអស់ពីសមត្ថភាពសម្រាប់តំណែងមួយនេះ ។
ចែករំលែកព័តមាននេះ