ខេត្តព្រះសីហនុ ៖ មន្ត្រីនៅក្នុងជួររដ្ឋបាលសាលាស្រុកស្ទឹងហាវ ខេត្តព្រះសីហនុ បានបង្ហើបឲ្យដឹងថា កន្លងមក ជាច្រើនឆ្នាំដែលរាជរដ្ឋាភិបាលបានចេញអនុក្រិត្យក្នុងការកាត់ឆ្វៀលដីដែលមានទីតាំងស្ថិតនៅក្នុងភូមិ០១ ឃុំទំនប់រលក ស្រុកស្ទឹងហាវ ខេត្តព្រះសីហនុ…
ខេត្តព្រះសីហនុ ៖ មន្ត្រីនៅក្នុងជួររដ្ឋបាលសាលាស្រុកស្ទឹងហាវ ខេត្តព្រះសីហនុ បានបង្ហើបឲ្យដឹងថា កន្លងមក ជាច្រើនឆ្នាំដែលរាជរដ្ឋាភិបាលបានចេញអនុក្រិត្យក្នុងការកាត់ឆ្វៀលដីដែលមានទីតាំងស្ថិតនៅក្នុងភូមិ០១ ឃុំទំនប់រលក ស្រុកស្ទឹងហាវ ខេត្តព្រះសីហនុ ដើម្បីបង្កើតជាដីសម្បទានសង្គមកិច្ចរបស់រដ្ឋទុកចែកជូនដល់គ្រួសារយោធិន,គ្រួសារមន្ត្រីរាជការជានិវត្តន៍ជន ។
ប៉ុន្តែនាពេលកន្លងមកនេះ រដ្ឋបាលស្រុកស្ទឹងហាវ តែងសង្កេតឃើញថា មានជនខិលខូចបានឃុបឃិតគ្នា(មេខ្យល់)ឆ្លៀតឱកាសដើរបំផុសបំផុលប្រជាពលរដ្ឋឲ្យចូលទៅទន្ទ្រានកាន់កាប់សង់ជាខ្ទមហោះខ្ទមហើរបែបអនាធិបតេយ្យដោយខុសច្បាប់ នៅលើដីសម្បទានដែលគ្រប់គ្រងដោយអាជ្ញាធរស្រុកស្ទឹងហាវ ។
ជាក់ស្តែង កាលពីថ្ងៃទី១៧ ខែកុម្ភៈ ឆ្នាំ២០២៤ កន្លងមកថ្មីៗនេះ គណៈបញ្ជាការឯកភាពរដ្ឋបាលស្រុកស្ទឹងហាវដឹកនាំដោយលោក សុន ពិសី និងលោក អ៊ុង ឆាលី អភិបាលរងស្រុក បានចុះពិនិត្យ និងទប់ស្កាត់សកម្មភាពជនអនាធិបតេយ្យប្រមាណជា៣០ទៅ៥០នាក់ កំពុងតែប្រមូលផ្តុំគ្នានៅលើដីសម្បទានសង្គមកិច្ច ស្ថិតនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ ក្រោមរូបភាពបែបធ្វើបាតុកម្ម មានលើកជាបដា និងរូបភាពថ្នាក់ដឹកនាំស្រែករកយុត្តិធម៌ដោយចោទថា អាជ្ញាធររុះរើលំនៅឋានរំលោភយកដីរបស់ពួកគាត់ទៅវិញជាល្បិចខូចរបស់មេខ្យល់ម៉ែកូនពីរបីនាក់ ។
ប្រភពពីមន្ត្រីរដ្ឋបាលស្រុកស្ទឹងហាវបានឲ្យដឹងបន្ថែមទៀតថា បន្ទាប់ពីធ្វើការស្រាវជ្រាវរបស់រដ្ឋបាលស្រុកបានរកឃើញថា ប្រជាពលរដ្ឋដែលមកប្រមូលផ្តុំគ្នានេះ មិនមានឈ្មោះឬឯកសារសន្លឹកឆ្នោតកាន់កាប់របស់គណ:កម្មាធិការប្រើប្រាស់និងបែងចែកនៅក្នុងដីសម្បទានសង្គមកិច្ចនេះទេ ។ មិនតែប៉ុណ្ណោះ កម្លាំងគណ:បញ្ជាការឯកភាពរដ្ឋបាលស្រុកស្ទឹងហាវបានរកឃើញមេខ្យល់ ដែលបំផុសបំផុលបងប្អូនប្រជាពលរដ្ឋឲ្យចូលទៅទន្ទ្រានកាន់កាប់សង់ជាខ្ទមនៅលើដីសម្បទានសង្គមកិច្ចរបស់រដ្ឋមានឈ្មោះដូចខាងក្រោមនេះ ៖
១-ឈ្មោះ មឿន ណុង ភេទប្រុស អាយុ៣៤ឆ្នាំ (ជាកូនប្រសាររបស់ឈ្មោះ អ៊ុំ ចិន្តា ) មានទីលំនៅបច្ចុប្បន្ន ក្រុមទី១៤ ភូមិ១ សង្កាត់១ ក្រុង/ខេត្តព្រះសីហនុ ។ ២-ឈ្មោះ អ៊ុំ ចិន្តា ភេទស្រី អាយុ៥៣ឆ្នាំ (ជាម្តាយក្មេក) ទីលំនៅបច្ចុប្បន្នភូមិត្រពាំងស្នោ ឃុំញ៉ែងញ៉ង ស្រុកត្រាំកក់ ខេត្តតាកែវ ។ ៣-ឈ្មោះសរ សុវណ្ណ (ហៅតាគុត ដៃស្តាំ) បានរត់គេចខ្លួន ទីលំនៅបច្ចុប្បន្នភូមិ១ ឃុំទំនប់រលក ស្រុកស្ទឹងហាវ ខេខេត្តព្រះសីហនុ ។ ៤-ឈ្មោះអ៊ុំ គន្ធា (បានរត់គេចខ្លួន) ។
នៅក្នុងលិខិតបំភ្លឺព័ត៌មានប្រតិកម្មរហ័សរបស់ស្នងការដ្ឋាននគរបាលខេត្តព្រះសីហនុ ចុះថ្ងៃទី២១ ខែកុម្ភ: ឆ្នាំ២០២៤ ដកស្រង់សង្ខេបបានបញ្ជាក់ជូនដល់សារធារណ:ជនឲ្យបានជ្រាបថា នាពេលថ្មីៗនេះ នៅមូលដ្ឋានស្រុកស្ទឹងហាវ មានជនខិលខូចឱកាសនិយមដែលរៀបចំឡើងដោយមេខ្យល់ក្នុងការបែងចែកភាគលាភបានញុះញង់បំផុសបំផុលឲ្យប្រជាពលរដ្ឋធ្វើសកម្មភាពប្រមូលផ្តុំគ្នាលើកបដា និងរូបភាពថ្នាក់ដឹកនាំរួចហៅអ្នកសារព័ត៌អង្គភាពមួយមិនដែលឮឈ្មោះមកថតពីសកម្មភាពប្រមូលផ្តុំទាមទាររកយុត្តិធម៌និងបានបង្កើតពាក្យចោទប្រកាន់ថាអាជ្ញាធរស្រុកស្ទឹងហាវ បានមកវាយកម្ទេចផ្ទះសម្បែងរបស់ពួកគាត់ឲ្យប្រជាពលរដ្ឋនិងថ្នាក់ដឹកនាំមានការយល់ច្រឡំតាមពិតគឺផ្ទះហោះផ្ទះហើរ ។
មន្ត្រីនៅក្នុងជួររដ្ឋបាលស្រុកស្ទឹងហាវបានបន្តឲ្យដឹងបន្ថែមទៀតថា រហូតមកទល់ពេលនេះគណៈបញ្ជាការឯកភាពរដ្ឋបាលស្រុកស្ទឹងហាវ ខេត្តព្រះសីហនុ នៅតែបន្តជំហរយ៉ាងរឹងមាំក្នុងការគ្រប់គ្រងអចលនទ្រព្យរបស់រដ្ឋ និងបានរៀបចំកសាងសំណុំរឿងរបស់មេខ្យល់ដែលញុះញង់បំផុសបំផុលធ្វើសកម្មភាពខាងលើនេះបញ្ជូនទៅតាមនិតិវិធី ។
នៅក្នុងពេលប្រតិបត្តិការបំបែកការប្រមូលផ្តុំគណ:បញ្ជាការឯកភាពរដ្ឋបាលស្រុកស្ទឹងហាវបានដកហូតសម្ភារៈ ជាវត្ថុតាងរួមមាន ៖ រថយន្ត LUXUS RX 330 ពណ៌ទឹកមាសមួយគ្រឿង, រូបថតថ្នាក់ដឹកនាំចំនួន០៩ស៊ុម, ទង់រូបថតថ្នាក់ដឹកនាំចំនួន៥០ទង់,ទង់ជាតិធំចំនួន ០២ទង់, ទង់សាសនាចំនួន០២ទង់,ទង់ព្រះបរមរាជវាំងចំនួន០២ទង់, បដាចំនួន០៣ផ្ទាំង ។
អធិការនគរបាលស្រុក បានធ្វើការសាកសួរព័ត៌មានលំអិត និងកំណត់មុខសញ្ញាមេខ្យល់រួចរាល់ហើយ កំពុងតាមចាប់ខ្លួន ។
ព័ត៌មានពិស្តារមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ