ខេត្តក្រចេះ ៖ ស្ត្រីវ័យចំណាស់ម្នាក់ បានស្លា.ប់បាត់បង់ជីវិតនៅក្នុងហេតុការណ៍ចោរបា.ញ់ប្លន់អ្នកលក់មាសជាកូនរបស់គាត់ ខណៈស្ត្រីរងគ្រោះកំពុងដេកក្នុងអង្រឹងក្រោមផ្ទះ ហើយក្រុមជនប្រដាប់អាវុធធ្វើសកម្មភាពប្លន់នៅមុខផ្ទះ ។ ហេតុការណ៍នេះបានកើតឡើងកាលពីវេលាម៉ោង៤រសៀលថ្ងៃទី៣០ ឧសភា ខណៈពេលដែលអាជីវករពីរនាក់
ខេត្តក្រចេះ ៖ ស្ត្រីវ័យចំណាស់ម្នាក់ បានស្លាប់បាត់បង់ជីវិតនៅក្នុងហេតុការណ៍ចោរបាញ់ប្លន់អ្នកលក់មាសជាកូនរបស់គាត់ ខណៈស្ត្រីរងគ្រោះកំពុងដេកក្នុងអង្រឹងក្រោមផ្ទះ ហើយក្រុមជនប្រដាប់អាវុធធ្វើសកម្មភាពប្លន់នៅមុខផ្ទះ ។ ហេតុការណ៍នេះបានកើតឡើងកាលពីវេលាម៉ោង៤រសៀលថ្ងៃទី៣០ ឧសភា ខណៈពេលដែលអាជីវករពីរនាក់ប្តីប្រពន្ធធ្វើដំណើរពីកន្លែងលក់ដូរនៅផ្សារឆ្លូងមកដល់លំនៅឋាន ស្ថិតក្នុងភូមិកណ្តាល ឃុំឆ្លូង ស្រុកឆ្លូង ដោយក្រុមចោរប្លន់ប្រដាប់ដោយកាំភ្លើងអាកាមានគ្នា២នាក់ ។
អាជីវកររងគ្រោះក្នុងអំពើប្លន់ប្រដាប់អាវុធនេះក្តីឈ្មោះប៉ាវ សុវណ្ណ អាយុ៤០ឆ្នាំ និងប្រពន្ធឈ្មោះសូ ស៊ាងរ័ត្នធី អាយុ៣៧ឆ្នាំ តែទាំងពីរនាក់ប្តីប្រពន្ធមិនបានរងរបួសក្នុងអំពើប្លន់បាញ់សម្លាប់នេះទេ ហើយទ្រព្យសម្បត្តិដែលបាត់បង់រួមមានគ្រឿងអលង្ការប្លាទីនចំនួន៣០តម្លឹង និងលុយចំនួន១៥លានរៀល ។ រីឯស្ត្រីរងគ្រោះជាម្តាយឈ្មោះប៉ាវ ប៊ុនលាង អាយុ៧៣ឆ្នាំ ត្រូវចោរប្លន់បាញ់មួយគ្រាប់ ខណៈគាត់ស្រែកឆោឡោពេលឃើញសកម្មភាពប្លន់កូនរបស់គាត់ ។
មន្ត្រីប៉ូលិសស្រុកឆ្លូងបានឱ្យដឹងថា ក្រុមចោរប្លន់មុននឹងធ្វើសកម្មភាពនេះគឺពិតជាបានតាមដានជនរងគ្រោះយ៉ាងស្អិត ដោយពួកគេបានតាមជនរងគ្រោះតាំងពីចេញពីផ្សាររហូតដល់ផ្ទះដែលមានចម្ងាយជិត២គីឡូម៉ែត្រ រហូតមកដល់មុខផ្ទះក៏បានស្ទាក់ម៉ូតូជនរងគ្រោះហើយដកកំាំភ្លើងអាកាស្វាយបត់គំរាមបាញ់សម្លាប់ដើម្បីប្លន់យកគ្រឿងអលង្ការនិងប្រាក់ ។
ប្រភពដដែលបានឱ្យដឹងទៀតថា ជនរងគ្រោះបានរៀបចំកញ្ចប់គ្រឿងអលង្ការជា២កញ្ចប់គឺកញ្ចប់មាស ត្រូវបានបុរសជាប្តីទុកនៅកាបូបជាប់ចង្កេះ រីឯលុយនិងគ្រឿងប្លាទីននៅក្នុងកាបូបរបស់ស្ត្រីជាប្រពន្ធ ។ នៅពេលត្រូវក្រុមចោរស្ទាក់ប្លន់នៅមុខផ្ទះ ដោយឃើញសភាពមិនស្រួល បុរសជាប្តីបានរត់គេចនិងផ្លោះរបងទៅខាងក្រោយផ្ទះ រីឯស្ត្រីជាប្រពន្ធបានរត់ចូលក្រោមផ្ទះ ហើយក្រុមជនទាំងនោះបានតាមចូលដល់ក្រោមផ្ទះ និងគំរាមឱ្យស្ត្រីជាប្រពន្ធបោះកាបូបមកឱ្យជាថ្នូរនឹងការមិនបាញ់សម្លាប់ ។ បន្ទាប់ពីស្ត្រីរងគ្រោះបោះកាបូបលុយ និងគ្រឿងអលង្ការឱ្យរួច ស្រាប់តែស្ត្រីជាម្តាយដែលមានជំងឺកំពុងដេកលើអង្រឹងក្រោមផ្ទះ ឃើញហេតុការណ៍នេះក៏ស្រែកឆោឡោឡើង ហើយចោរក៏បាញ់ផ្ញុចដី១គ្រាប់ បណ្តាលឱ្យប្លាតត្រូវធ្លាយពោះរងរបួសធ្ងន់ និងបានស្លាប់បាត់បង់ជីវិតនៅពេលបញ្ជូនមកសង្គ្រោះនៅមន្ទីរពេទ្យបង្អែកឆ្លូង។
តាមសាក្សីឃើញហេតុការណ៍និយាយថា ចោរប្លន់មានគ្នាពីរនាក់ ប្រដាប់ដោយអាវុធអាកាស្វាយបត់ ជិះម៉ូតូម៉ាកវ៉េវអាល់ហ្វា ពណ៌ស្លែ ហើយក្រោយពីធ្វើសកម្មភាពបានសម្រេច ពួកគេបានជិះម៉ូតូរត់គេចខ្លួនបាត់ដោយសុវត្ថិភាព ។ ពាក់ព័ន្ធនឹងករណីប្លន់សម្លាប់នេះ ប៉ូលិសអះអាងថា ចំពោះមុខសញ្ញាជនសង្ស័យត្រូវបានកំណត់ហើយ និងកំពុងតែតាមប្រមាញ់ ៕
ចែករំលែកព័តមាននេះ