រាជធានីភ្នំពេញ ៖ រហូតមកទល់នាពេលនេះ ពាក់ព័ន្ធទៅនឹងបេក្ខភាពប្រធានសមាគមសិល្បករខ្មែរសម្រាប់អាណត្តិថ្មី នៅតែកំពុងក្លាយជាប្រធានបទដ៏ក្តៅគគុកសម្រាប់ការជជែកវែកញែកនៅលើបណ្តាញសង្គមពីសំណាក់មហាជន ជាពិសេស បណ្តាអ្នកសិល្បៈក្នុងពេលដែលម្នាក់ៗកំពុងរង់ចាំអ៊ុតមើលថា «តើប្រធានថ្មីនឹងបានទៅលើអ្នកសិល្បៈរូបណា» ។ ក្នុងពេលដែលការបោះឆ្នោតនៅមិនទាន់រៀបចំនៅឡើយនោះ…
រាជធានីភ្នំពេញ ៖ រហូតមកទល់នាពេលនេះ ពាក់ព័ន្ធទៅនឹងបេក្ខភាពប្រធានសមាគមសិល្បករខ្មែរសម្រាប់អាណត្តិថ្មី នៅតែកំពុងក្លាយជាប្រធានបទដ៏ក្តៅគគុកសម្រាប់ការជជែកវែកញែកនៅលើបណ្តាញសង្គមពីសំណាក់មហាជន ជាពិសេស បណ្តាអ្នកសិល្បៈក្នុងពេលដែលម្នាក់ៗកំពុងរង់ចាំអ៊ុតមើលថា «តើប្រធានថ្មីនឹងបានទៅលើអ្នកសិល្បៈរូបណា» ។
ក្នុងពេលដែលការបោះឆ្នោតនៅមិនទាន់រៀបចំនៅឡើយនោះ គេឃើញអ្នកសិល្បៈជាបន្តបន្ទាប់ បានបង្ហាញពីទស្សនៈផ្ទាល់ខ្លួនដោយចង់ឲ្យអ្នកសិល្បៈរូបនេះ ឬរូបនោះ ជាប់ជាប្រធានសមាគមសិល្បករខ្មែរដ្បិតពួកគេមើលឃើញថា បេក្ខជនរូបនេះ ស័ក្តិសមសម្រាប់ដឹកនាំសមាគម ។ យ៉ាងណា មកទល់នាពេលនេះ គេឃើញមានអ្នកសិល្បៈមួយចំនួនដែលទំនងជាមានភាគរយខ្ពស់នៅក្នុងការឈរឈ្មោះបោះឆ្នោត សម្រាប់ការកាន់កាប់តំណែងជាប្រធានសមាគមសិល្បករខ្មែរនាអាណត្តិថ្មីនេះ ក្នុងពេលប្រធានចាស់ គឺអ្នកនាង ចន ច័ន្ទលក្ខិណា ប្រកាសបញ្ចប់អាណតិរបស់
ខ្លួន ។
បេក្ខភាពទាំងអស់នោះ រួមមានលោកជំទាវ ស្រីតូច ចំណាន អតីតតារាភាពយន្តជើងចាស់, លោក យស បូវណ្ណៈ , អ្នកនាង ខាត់ សុឃីម និងលោក អ៊ឹម ជីវ៉ា ខណៈពេលដែលបេក្ខភាពទាំងអស់នេះកំពុងទទួលបានការចាប់អារម្មណ៍ និងគាំទ្រពីមហាជនក៏ដូចអ្នកសិល្បៈ ។
គួរបញ្ជាក់ថា សម្រាប់បេក្ខភាព លោកជំទាវ ស្រីតូច ចំណាន ត្រូវបានអតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានឧត្តមក្រុមប្រឹក្សាព្រះមហាក្សត្រ សម្តេចតេជោ ហ៊ុន សែន បានបង្ហោះលើបណ្តាញសង្គមថា «ខ្ញុំសូមសំដែងនូវការគាំទ្រចំពោះបេក្ខភាពលោកជំទាវម៉ៅ ចំណានភរិយាអ្នកឧកញ៉ាគិត ម៉េង ជាប្រធានសមាគមសិល្បៈ ។ សម្តេចបញ្ជាក់ថា ប្រសិនលោកជំទាវទទួលបានការគាំទ្រតាមរយៈការបោះឆ្នោតសមាគមនេះ មិនមានការលំបាកផ្នែកថវិកាខ្លាំងពេកនោះ ។
ដោយឡែក តារាភាពយន្តជើងចាស់ លោក យស បូវណ្ណៈ ក៏បានប្រកាសជាសាធារណៈថា រូបលោកនឹងចូលរួមឈរឈ្មោះសម្រាប់ការបោះឆ្នោតប្រធានសមាគមសិល្បះករខ្មែរនាអាណត្តិថ្មីនេះដែរ បន្ទាប់ពីរូបលោកទទួលបានគាំទ្រ និងមានការជម្រុញពីបណ្តាអ្នកសិល្បះមួយចំនួន ។
លោក យស បូវណ្ណៈ បានបញ្ជាក់ថា ប្រសិនបើលោកអាចជាប់ឈ្មោះជាប្រធានថ្មីនោះគឺលោកនឹងដាក់គោលដៅមួយច្បាស់លាស់ និងត្រឹមត្រូវ ដើម្បីការពារ និងលើកស្ទួយសិល្បៈ ជាមួយនឹងការទំនាក់ទំនងល្អជាមួយអ្នកសិល្បៈ និងក្រសួងស្ថាប័នពាក់ព័ន្ធ ។
លោកបន្ថែមថា គោលដៅសំខាន់គឺលោកនឹងខិតខំជំរុញការងារ និងដាក់ការងារល្អ និងសំខាន់ៗ ដើម្បីឱ្យអ្នកសិល្បៈក្មេងៗជំនាន់ក្រោយធ្វើតាម ដោយធ្វើយ៉ាងណាចៀសឆ្ងាយពីការមើលងាយមកលើអ្នកសិល្បៈ ។ ចំណែកតារាសម្តែងលោក អ៊ឹម ជីវ៉ា ក៏បានប្រកាសពីការចូលរួមជាបេក្ខភាពមួយរូបផងដែរ សម្រាប់ការបោះឆ្នោតជ្រើសរើសធ្វើជាប្រធានសមាគមសិល្បករអាណត្តិថ្មីនេះដែរ ។
តារារូបនេះបានប្រកាសលើបណ្តាញសង្គមថា ខ្ញុំបាទ អ៊ឹម ជីវ៉ា សូមប្រកាសថា និងឈរឈ្មោះជាបេក្ខភាព ជាប្រធានសមគមសិល្បករខ្មែរថ្មី ខ្ញុំស្ម័គ្រចិត្តចូលរួមប្រកួតប្រជែងជាមួយបងប្អូនបុគ្គលល្បីៗខ្លាំងៗ បើទោះដឹងថា ជាប់ឬមិនជាប់ក៏ខ្ញុំបានវិលសារជាថ្មី ចូលរួមបំរើជាមួយសមាគមមួយនេះ ព្រោះខ្ញុំនៅតែមានបេះដូងជួយ ទោះខ្ញុំមិនមែនជាសេដ្ឋីឬជាឧកញ៉ា តែខ្ញុំប្រើបេះដូងពិតជួយដល់សមាគមមួយនេះ ជាពិសេស ជួយអោយទាន់ពេលវេលា និងសេចក្តីត្រូវការរបស់សិល្បៈមិនមែនឈឺបានជូនលុយ មិនមែនស្លាប់បានយកលុយចូលបុណ្យ គឺត្រូវរកការងារអោយសិល្បៈធ្វើ ចំណែកឯសិល្បៈ ជើងចាស់ ពិសេសសិល្បៈជនពិការ ត្រូវលើកឡើងជាអតិភាពនៃសមគមសិល្បករខ្មែរអាណិត្តថ្មីនេះ។
ដោយឡែក សម្រាប់តារាពហុជំនាញអ្នកនាង ខាត់ សុឃីម ក៏បានប្រកាសលើបណ្តាញសង្គមថា សូមថ្លែងអំណរ អរគុណដល់ ឯកឧត្តម លោកជំទាវ លោកឧកញ្ញា បងប្អូនមិត្តសិល្បៈបងប្អូន ទស្សនិកជន បណ្តាសារពត៌មាន ទាំងអស់ បង្ហោះសារ គាំទ្រនាងខ្ញុំជាការលើកទឹកចិត្តដ៏ល្អរបស់បងប្អូន ហើយនាងខ្ញុំពិតជាសប្បាយចិត្តមែនទែនដែលប្អូនៗ របស់ខ្ញុំ ក៏ដូចជាទស្សនិកជន បានគាំទ្រនាងខ្ញុំផងដែរ។
អ្នកនាងបញ្ជាក់ថា រឿងឈរឈ្មោះជាប្រធានសមាគមន៍សិល្បករ នាងខ្ញុំមិនបានដឹង រឺ ត្រៀមទុកមុន ធ្វើនោះទេ ប៉ុន្តែបើមានការគាំទ្រ នឹងទុកចិត្តពីបងប្អូនសិល្បករ ទស្សនិកជន នាងខ្ញុំនឹងគិតគូរស្វែងយល់បន្ថែមចំពោះរឿងនេះ ។ ទោះជាយ៉ាងណា ក្រោយលេចវត្តមានពីលោកជំទាវ ស្រីតូច ចំណាន ជាបេក្ខភាពសម្រាប់ការបោះឆ្នោតជាប្រធានសមាគមសិល្បករខ្មែរ ដែលប្រកាសដោយសម្តេចតេជោនោះ អ្នកនាង ខាត់ សុឃីម ក៏បានសម្តែងការគាំទ្រផងដែរ ។
អ្នកនាងបានអះអាងប្រាប់កោះសន្តិភាពតាមសារអេឡិចត្រូនិចដោយខ្លីថា ខ្ញុំគិតថា អនុសាសន៍សម្តេចពុកគ្រប់គ្រាន់គាត់ល្អអាចជួយសិល្បៈបានច្រើន ដូច្នោះ រឿងឈរឈ្មោះមិនទាន់ដឹងទេ ។
ដោយឡែក សម្រាប់អ្នកដឹកនាំសម្តែងលោក គួច ខេវិន ក៏បានលើកឡើងតាមបណ្តាញសង្គមថា ដោយមានសំណួរពីអ្នកសារព័ត៌មាន និងផ្សេងៗទៀត មកកាន់លោកនោះ លោកសុំផ្តល់ចម្លើយថា ចំពោះការជ្រើសរើសអ្នកដឹកនាំសមាគមសិល្បករខ្មែរ លោកគិតថា អ្នកមានទេពកោសល្យ មានស្នាដៃល្អៗជាច្រើន ដែលធ្លាប់បានចូលរួមលើកតម្កើងវិស័យសិល្បៈ ឲ្យរីកចម្រើនកន្លងទៅ ហើយចំពោះរូបលោកផ្ទាល់ បើឯកឧត្តម លោកជំទាវ លោកឧកញ៉ា បងប្អូនមិត្តសិល្បៈ បងប្អូន ពូមីង ជាសិល្បករ សិល្បការនី ក្មេងចាស់ យល់ឃើញថា រូបលោកមានលទ្ធភាព មានសមត្ថភាព ទេពកោសល្យ អាចធ្វើទៅបាន លោកអាចឈរឈ្មោះឲ្យពួកគាត់ជ្រើសរើស សម្រាប់អាណត្តិថ្មីនេះ ៕
ចែករំលែកព័តមាននេះ