ខេត្តកណ្តាល ៖ ក្រុមចោរប្លន់ប្រដាប់អាវុធ៤នាក់ ក្នុងនោះមានមន្ត្រីប៉ុស្តិ៍ម្នាក់ និងអតីតអនុប្រធានប៉ុស្តិ៍រកាកោងម្នាក់ទៀត ក្នុងចំណោមបក្សពួក៧នាក់ ត្រូវសមត្ថកិច្ចប៉ូលិសនៃស្នងការដ្ឋានខេត្តកណ្តាលធ្វើការបង្ហាញជាសាធារណៈ កាលពីព្រឹកថ្ងៃទី៣១ ឧសភា ២០១១ បន្ទាប់ពីពួកគេបានធ្វើសកម្មភាពប្លន់អាជីវករលក់មាស
ខេត្តកណ្តាល ៖ ក្រុមចោរប្លន់ប្រដាប់អាវុធចំនួន៤នាក់ ក្នុងនោះមានមន្រ្តីប៉ូលិសប៉ុស្តិ៍ម្នាក់ និងអតីតអនុប្រធានប៉ុស្តិ៍រកាកោងម្នាក់ ក្នុងចំណោមបក្សពួក៧នាក់ ត្រូវសមត្ថកិច្ចប៉ូលិសស្នងការដ្ឋានខេត្ត បង្ហាញខ្លួនជាសាធារណៈកាលពីព្រឹកថ្ងៃទី៣១ ឧសភា ឆ្នាំ២០១១ បន្ទាប់ពីក្រុមជនទាំងនេះធ្វើសកម្មភាពប្លន់អាជីវករលក់មាសប្តូរប្រាក់យកអស់ប្រមាណជិត៤០តម្លឹង ក្នុងពេលដែលស្រ្តីរងគ្រោះជិះម៉ូតូចេញពីផ្សាររកាកោងត្រឡប់ទៅដល់ផ្ទះវិញ កាលពីជាង ២ខែមុន។
លោករឿន ណារ៉ា ស្នងការរងទទួលបន្ទុកកណ្តាលយុត្តិធម៌បានឱ្យដឹងថា មានចោរប្រដាប់អាវុធមួយក្រុមបានធ្វើសកម្មភាពប្លន់អាជីវករលក់មាស និងប្តូរប្រាក់នៅផ្សាររកាកោង ដល់មុខផ្ទះជនរងគ្រោះឈ្មោះយូ អេងលី ភេទស្រី អាយុ៦៥ឆ្នាំ ស្ថិតក្នុងភូមិរកាកោង ឃុំរកាកោង១ ស្រុកមុខកំពូល កាលពីវេលាម៉ោង៥និង១០នាទីល្ងាច ថ្ងៃទី៦ មីនា ឆ្នាំ២០១១ ធ្វើឱ្យជនរងគ្រោះបាត់បង់មាសចំនួន១៣តម្លឹង ប្លាទីន១៥តម្លឹង លុយដុល្លារ៦ពាន់ដុល្លារ លុយបាត១ម៉ឺនបាត លុយរៀល១៥លានរៀល ទូរស័ព្ទដៃ៣គ្រឿង និងកាតទូរស័ព្ទមួយចំនួនទៀត ។ បន្ទាប់ពីមានអំពើប្លន់នេះកម្លាំងប៉ូលិសនៃស្នងការដ្ឋានខេត្ត ដឹកនាំដោយលោកអ៊ាវ ចំរើន ស្នងការខេត្តដោយសហការជាមួយស្នងការដ្ឋានរាជធានីភ្នំពេញ និងស្នងការដ្ឋានខេត្តកំពង់ចាម ធ្វើការស្រាវជ្រាវរហូតឈានដល់កំណត់មុខសញ្ញា និងបំបែកសំបុកក្រុមចោរប្លន់ដែលមាន គ្នាចំនួន៧នាក់ ហើយឃាត់ខ្លួនបានចំនួន៤នាក់។
ជនដែលត្រូវចាប់ខ្លួននេះមាន ១-ឈ្មោះឈួន ឆេង អាយុ៣៩ឆ្នាំ ជាយោធានៅសឹករងស្រុកស្ទឹងត្រង់ មានទីលំនៅភូមិស្វាយស្រណោះ ឃុំរកាអារ ស្រុកស្ទឹងត្រង់ ខេត្តកំពង់ចាម ជាមេខ្លោង និងដកហូតបានម៉ូតូវីវ៉ាមួយគ្រឿង រួមទាំងគ្រឿងអលង្កាមួយចំនួន។ ២-ឈ្មោះលន់ ម៉េងលី អាយុ៤០ឆ្នាំ ជាមន្ត្រីប៉ូលិសប៉ុស្តិ៍រកាកោង១ មានទីលំនៅភូមិរកាកោង ឃុំរកាកោង១ ស្រុកមុខកំពូល ជាអ្នកយាមផ្លូវ។ ៣-ឈ្មោះឃួន វុទ្ធី អាយុ៥៧ឆ្នាំ ជាអតីតអនុប្រធានប៉ុស្តិ៍ប៉ូលិសរកាកោង១ (ចូលនិវត្តន៍) មានទីលំនៅភូមិព្រែកជ្រៅ ឃុំរកាកោង២ ស្រុកមុខកំពូល ជាអ្នកយាមផ្លូវ។ ជនទាំងបីនាក់នេះត្រូវបានឃាត់ខ្លួននៅថ្ងៃទី៣០ ឧសភា និង៤-ឈ្មោះសួង សាត ហៅតាន់ អាយុ៤១ឆ្នាំ ជាអ្នករត់ម៉ូតូឌុប ស្នាក់នៅផ្ទះជួលសាន់ហាន់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ជាជនដៃដល់ ត្រូវបានឃាត់ខ្លួននៅថ្ងៃទី២៩ ឧសភា។ ចំណែបក្សពួកបីនាក់ដែលរត់គេចខ្លួនបាត់មាន ១-ឈ្មោះសឿ និល អាយុ២៩ឆ្នាំ ជាសិស្ស រស់នៅភូមិកងតាណឹង ឃុំកងតាណឹង ស្រុកកង មាស ខេត្តកំពង់ចាម ២-ឈ្មោះវ៉យ ភេទប្រុស អាយុ៤១ឆ្នាំ មុខរបរមិនពិតប្រាកដ មានទីលំនៅភូមិស្វាយដំណាក់ ឃុំស្វាយរមៀត ស្រុកខ្សាច់កណ្តាល ខេត្តកណ្តាល ជាម្ចាស់អាវុធ និង៣-ឈ្មោះខ្មៅ ហៅតឿ ភេទប្រុស អាយុ៤០ឆ្នាំ មុខរបរនិងទីលំនៅមិនពិតប្រាកដ ជាអ្នក ជិះម៉ូតូចូលធ្វើសកម្មភាពប្លន់។
លោករឿន ណារ៉ា បានឱ្យដឹងទៀតថា ក្នុងការធ្វើសកម្មភាពប្លន់នេះគឺក្រុមចោរបានតាមដានពីពេលវេលារបស់ស្រ្តីជាអាជីវករលក់មាស និងប្តូរប្រាក់មួយរយៈកន្លងមកហើយ។ នៅពេលដឹងពីពេលវេលារបស់ស្រ្តីរងគ្រោះច្បាស់ហើយនោះ ឈ្មោះសួង សាត បានចាត់ចែងបក្សពួករបស់ខ្លួនរៀបចំគម្រោងប្លន់។ លុះដល់ថ្ងៃទី៦ មីនា ឆ្នាំ២០១១ វេលាម៉ោង៥នឹង១០នាទីល្ងាច នៅពេលស្ត្រីឈ្មោះយូ អេងលី ចេញពីផ្សារជិះម៉ូតូត្រឡប់មកផ្ទះវិញ ដែលមានចម្ងាយប្រហែល១គីឡូម៉ែត្រពីផ្សារ ក្រុមចោរប្លន់បានជិះម៉ូតូតាមពីក្រោយជាប់រហូត ។ នៅពេលជនរងគ្រោះមកដល់មុខផ្ទះ ហើយចាក់សោទ្វាររបងដើម្បីចូលផ្ទះ ចោរម្នាក់បានចុះពីលើម៉ូតូស្ទុះទៅវាយជនរងគ្រោះមួយដៃចំភ្នែកខាងស្តាំ និងម្នាក់ទៀតយកកាំភ្លើងវាយក្បាល ហើយឆក់យកកន្ត្រកយួរដែលមានគ្រឿងអលង្ការពីដៃជនរងគ្រោះ រួចនាំគ្នាជិះម៉ូតូរត់គេចខ្លួនបាត់ទៅ។ ចំពោះសម្ភារដែលពួកចោរប្លន់បាននោះ គឺយកទៅចែកគ្នាទាំងយប់។
ក្រុមចោរប្លន់ទាំងនោះបានសារភាពទៀតថា មុនពេលធ្វើសកម្មភាពប្លន់ខាងលើនេះ គឺពួកគេបានទាក់ទងជាមួយមន្រ្តីប៉ូលិសប៉ុស្តិ៍ និងអតីតអនុប្រធានប៉ុស្តិ៍រកាកោង១ ដើម្បីឱ្យពួកគេចាំមើលផ្លូវ ហើយសន្យាថា នៅពេលប្លន់បានសម្រេច និងផ្តល់ព័ត៌មានសម្រាប់ពួកគេរត់គេច នឹងឱ្យលុយក្នុងម្នាក់១ពាន់ដុល្លារ ៕
ចែករំលែកព័តមាននេះ