នរណាមិនភ័យខ្លាច ! ខ្លាព្រៃវង្វេងចូលភូមិពលរដ្ឋថៃភ័យបះសក់
ថៃ ៖ ក្រុមមន្ត្រីអភិរក្សសត្វព្រៃមកពីឧទ្យានជាតិ ខាលឡាន ក្នុងខេត្ត Kamphaeng Phet បានចំណាយពេលពេញមួយថ្ងៃសៅរ៍ ទី១៧ ខែកុម្ភៈ…
ថៃ ៖ ក្រុមមន្ត្រីអភិរក្សសត្វព្រៃមកពីឧទ្យានជាតិ ខាលឡាន ក្នុងខេត្ត Kamphaeng Phet បានចំណាយពេលពេញមួយថ្ងៃសៅរ៍ ទី១៧ ខែកុម្ភៈ ឆ្នាំ២០២៤ ដើម្បីស្វែងរកដានរបស់សត្វខ្លាមួយក្បាល នៅក្នុងព្រៃមួយខាងក្រោយភូមិការីងណាមតុក ក្រោយពីអ្នកភូមិប្រទះឃើញ និងបង្កការភ័យខ្លាចដល់អ្នកស្រុក ។ នេះបើយោងតាមសារព័ត៌មាន PBS News ចេញផ្សាយនៅថ្ងៃអាទិត្យ ។
ក្រុមមន្ត្រីអភិរក្សទាំងនោះសង្ឃឹមថា ពួគគេនឹងអាចចាប់ខ្លានេះយកទៅលែងក្នុងព្រៃវិញ មុនពេលដែលវាបង្កគ្រោះថ្នាក់ដល់ប្រជាជន ប៉ុន្តែការព្យាយាមនៅតែមិនបានសម្រេច ព្រោះតែខ្លាបានរត់គេច និងលាក់ខ្លួននៅក្នុងព្រៃនោះ ។
មេភូមិបាននិយាយថា ខ្លាធំមួយក្បាលនេះ ត្រូវបានអ្នកភូមិប្រទះឃើញកាលពីល្ងាចថ្ងៃសុក្រ ខណៈដែលអ្នកភូមិម្នាក់បានថតរូបភាពខ្លាមួយក្បាលនោះជាប់ នៅពេលដែលវាកំពុងដើរកាត់ចម្ការដំឡូងមីមុនចូលទៅក្នុងព្រៃ ។ រូបថតនេះបង្ហាញថា សត្វខ្លាឈ្មោលមួយនេះ អាចកម្ពស់ប្រហែល១២០សង់ទីម៉ែត្រ ។ បុរសដែលថតរូបខ្លាដោយផ្ទាល់បានអះអាងថា ខ្លានេះអាចត្រូវរបួសភ្នែកឆ្វេងរបស់វា ហើយដោយសារតែរបួសនេះហើយ ទើបធ្វើឱ្យវាវង្វេងចេញពីហ្វូងហើយមកដល់ភូមិអ្នកស្រុក ។
ក្រុមមន្ត្រីអភិរក្សសត្វព្រៃដែលបានមកដល់ភូមិនេះ កាលពីយប់ថ្ងៃសុក្រ បានណែនាំអ្នកភូមិឱ្យស្នាក់នៅក្នុងផ្ទះដើម្បីសុវត្ថិភាព ។ ក្រុមមន្ត្រី បានរកឃើញសាកស.ពជ្រូកមួយក្បាល ដែលត្រូវខ្លាហែកស៊ីនៅមិនឆ្ងាយពីភូមិប៉ុន្មាននោះទេ ដោយពួកគេបានរៀបចំដំឡើងអន្ទាក់ រួមទាំងបំពាក់កាមេរ៉ាបន្ថែម ដើម្បីឃ្លាំមើល ។
ក្រុមមន្ត្រីបានប្រទះឃើញស្នាមជើងខ្លា ដែលដើរកាត់តាមព្រំប្រទល់រវាងភូមិ ចូលទៅក្នុងព្រៃវិញ ប៉ុន្តែមានការព្រួយបារម្ភថា វាអាចវិលមកចូលភូមិវិញ ។
នាយកដ្ឋានឧទ្យានជាតិ សត្វព្រៃ និងអភិរក្សរុក្ខជាតិបានឲ្យដឹងថា ទោះបីជា យោងតាមស្នាមជើងខ្លាបានចាកចេញពីភូមិឡើងលើភ្នំក៏ពិតមែន ប៉ុន្តែពួកគេបានបំពាក់កាមេរ៉ា ដើម្បីបន្តតាមដានដំណើររបស់សត្វខ្លា និងរៀបចំឱ្យមានបុគ្គលិកឃ្លាំមើល ដើម្បីការពារសុវត្ថិភាពអ្នកភូមិ ។
យ៉ាងណាក៏ដោយ មន្ត្រីជំនាញអះអាងថា ទោះជាខ្លា គឺជាសត្វព្រៃដ៏គ្រោះថ្នាក់ ហើយអ្នកភូមិខ្លាចរអារក្តី ប៉ុន្តែខ្លាមិនងាយស៊ីមនុស្សទេ ហើយខ្លាខ្លាចមនុស្ស ។ ទោះបីខ្លាមានជំនាញសម្លា.ប់សត្វព្រៃក៏ដោយ សូម្បីតែសត្វដែលធំជាងវាប្រាំដងក៏វាអាចសម្លា.ប់បានដែរ ប៉ុន្តែខ្លាមិនចាប់អារម្មណ៍នឹងស៊ីមនុស្សទេ ហើយវាក៏ព្យាយាមអស់ពីសមត្ថភាពដើម្បីគេចពីមនុស្ស ។
គួរកត់សម្គាល់ថា ខ្លាត្រូវបានការពារដោយច្បាប់ការពារសត្វព្រៃរបស់ប្រទេសថៃ និងត្រូវបានបញ្ចូលទៅក្នុងបញ្ជីប្រភេទសត្វជិតផុតពូជ ។ នៅឆ្នាំ២០២២២ សហភាពអន្តរជាតិសម្រាប់ការអភិរក្សធម្មជាតិ បានប៉ាន់ប្រមាណថា សត្វខ្លាធំប្រហែល៣០ក្បាលកំពុងរស់នៅក្នុងព្រៃភាគខាងលិចរបស់ប្រទេសថៃ នៅតាមឧទ្យានជាតិ និងដែនជម្រកសត្វព្រៃនានាក្នុងខេត្ត Kamphaeng Phet និង ខេត្តតាក ៕ អត្ថបទ៖អោម ចែតច័ន្ទណារ៉ា
ចែករំលែកព័តមាននេះ