យោង​តាម​ប្រភព​ព័ត៌​មាន​ AFP ចេញ​ផ្សាយ​កាល​ពី​ថ្ងៃ​ចន្ទ​ ទី​៣០ ឧសភា ឆ្នាំ២០១១ បាន​ឱ្យ​ដឹង​ថា លោក Zhang Jilong ​នឹង​ក្លាយ​ទៅ​ជា​ប្រធាន​​សហ​ព័ន្ធ​បាល់​ទាត់​អាសីុ​បណ្តោះ​អាសន្ន​ជំនួស​តំណែង​លោក Mohamed Bin Hammam ដែល​ត្រូវ​បាន​ FIFA ព្យួរ​ការ​ងារ​ក្រោយ​ពី​រក​ឃើញ​មាន​បញ្ហា​ជាប់​ពាក់​ព័ន្ធ​ទៅ​នឹង​អំពើ​ពុក​រលួយ​ទិញ​ទឹក​ចិត្ត​រក​សម្លេង​ឆ្នោត​។
លោក Peter  Velappan អគ្គ​លេខា​ធិការ​ក្រុម​បាល់​ទាត់​អាស៊ី​បាន​និយាយ​ប្រាប់ AFP ថា តាម​ច្បាប់​របស់​សហ​ព័ន្ធ​បាល់​ទាត់​អាស៊ី លោក Zhang Jilong នឹង​បាន​ក្លាយ​ទៅ​ជា​ប្រធាន​ដោយ​ស្វ័យ​ប្រវត្តិ​។ លោក​បាន​បន្ត​ទៀត​ថា ក្នុង​ករណី​អវត្ត​មាន​ប្រធាន​ អនុ​ប្រធាន​នឹង​ក្លាយ​ទៅ​ជា​ប្រធាន​ស្តី​ទី​ ដូច្នេះ​លោក​ Mohamed Bin Hamman គ្មាន​អ្វី​​ជំទាស់​ទៅ​នឹង​ការ​តែង​តាំង​នោះ​ទេ​។
ទាក់​ទង​នឹង​គម្រោង​​តែង​តាំង​ លោក Zhang Jilong ធ្វើ​ជា​ប្រធាន​បណ្តោះ​អាសន្ន​នេះ ប្រទេស​ជប៉ុន និង​អូស្ត្រា​លី​បដិ​សេធ​មិន​ធ្វើ​អត្ថា​ធិ​ប្បាយ​នោះ​ទេ នៅ​ពេល​ដែល​ត្រូវបាន​​សួរ​ដោយ​អ្នក​យក​ព័ត៌​មាន AFP ។ ចំណែក​ឯ​កូរ៉េ​ខាង​ត្បូង​បាន​ប្រកាន់​ជំហរ​គាំ​ទ្រ​លោក Mohamed Bin Hammam ដដែល​។
អ្នក​នាំ​ពាក្យ​សមា​គម​បាល់​ទាត់​កូរ៉េ​ខាង​ត្បូង​បាន​និយាយ​ថា ជា​ការ​ពិត​ការ​ផ្លាស់​ប្តូរ​នេះ​មិន​គួរ​ធ្វើ​លឿន​ពេក​ទេ ដោយ​រង់​ចាំ​មើល​ការ​សម្រេច​របស់​ FIFA ពី​វាសនា​របស់​លោក Mohamed Bin Hammam ជាមុន​សិន​។ គួរ​រំលឹក​ដែរ​ថា មុន​ការ​បោះឆ្នោត​​ជ្រើស​រើស​ប្រធាន​FIFA អាណត្តិ​ថ្មី​នេះ​មាន​រឿង​ចម្រូង​ចម្រាស់​ច្រើន​ក្នុង​ស្ថាប័ន FIFA រហូត​ទៅ​ដល់​ព្យួរ​ការ​ងារ​ លោក Mohamed Bin Hammam មិន​ឱ្យ​ចូល​រួម​បោះ​ឆ្នោត​ដែល​ជា​ហេតុ​ធ្វើ​ឱ្យ​លោក​ Sepp Blatter នឹង​ក្លាយ​ទៅ​ជា​បេក្ខ​ជន​​តែ​ម្នាក់​​គត់​ គ្មាន​​គូ​ប្រជែង​សម្រាប់​ការ​បោះ​ឆ្នោត​ជ្រើស​រើស​ប្រធាន FIFA អាណត្តិ​ថ្មី​ដែល​នឹង​ប្រព្រឹត្ត​ទៅ​​នៅ​ថ្ងៃ​ទី​១ មិថុនា ខាង​មុខ​នេះ ៕