ឈ្មួញម្នាក់ទិញ-លក់ដីខ្យល់ ត្រូវបញ្ជូនទៅតុលាការ
- ភ្នំពេញ
រាជធានីភ្នំពេញ ៖ ដោយអនុវត្តតាមដីកាបង្គាប់ឱ្យចាប់ខ្លួនរបស់ចៅក្រមស៊ើបសួរសាលាដំបូង
រាជធានីភ្នំពេញ ៖ ដោយអនុវត្តតាមដីកាបង្គាប់ឱ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០២៤ នគរបាលព្រហ្មទណ្ឌកម្រិតស្រាល បានធ្វើការនាំខ្លួនឈ្មញរកស៊ីទិញ-លក់ដីម្នាក់បញ្ជូនទៅតុលាការ ដោយជាប់ពាក់ព័ន្ធពីបទ ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន ។
ជនត្រូវចោទឈ្មោះ រីម ភក្ដី ភេទប្រុស អាយុ៣៧ ឆ្នាំ មានទីលំនៅផ្ទះលេខ២៥៥ ផ្លូវជាតិលេខ២ ភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តាមដីកាបង្គាប់ឱ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញបានបញ្ជាក់ថា ជនត្រូវចោទបានដាក់ឱ្យស្ថិតក្រោមការពិនិត្យពីបទ.ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីឆ្នាំ២០១៩ រហូតដល់ឆ្នាំ២០២០ តាមមាត្រា៣៧៧ មាត្រា៣៧៨ នៃក្រមព្រហ្មទណ្ឌ និងមាត្រា២៣១ នៃច្បាប់ស្ដីពីឧបករណ៍អាចជួញដូរបាន និងប្រតិបត្តិការទូទាត់សាច់ប្រាក់ ។
យល់ឃើញថា ជនត្រូវចោទឈ្មោះ រីម ភក្ដី ត្រូវបានចោទប្រកាន់ពីបទល្មើសព្រហ្មទណ្ឌ ដែលត្រូវផ្តន្ទាទោសដាក់ពន្ធនាគារ ហើយចៅក្រមស៊ើបសួរបានបង្គាប់ឱ្យចូលខ្លួន តែជនត្រូវចោទមិនបានចូលឆ្លើយ ដោះសារចំពោះការចោទប្រកាន់នោះទេ ថែមទាំងគេចខ្លួនបាត់ ។
ដោយយោងទៅលើតំណាងអយ្យការបានឯកភាពឱ្យចេញដីកាបង្កប់ឱ្យចាប់ខ្លួន ជនត្រូវចោទឈ្មោះ រីម ភក្ដី ដូច្នោះដើម្បីធានាសណ្ដាប់ធ្នាប់សាធារណៈ ចៅក្រមស៊ើបសួរគប្បីចេញដីកាបង្គាប់ ឱ្យសមត្ថកិច្ចចាប់ខ្លួនឈ្មួញរកស៊ីទិញលក់ដីខ្យល់រូបនេះ យកមកដាក់ពន្ធនាគារដើម្បីអនុវត្តទោសទៅតាមផ្លូវច្បាប់ ៕
ចែករំលែកព័តមាននេះ