ADផ្ទាំងផ្សព្វផ្សាយពាណិជ្ជកម្ម

Picture

អាមេរិក​កា.ត់​ទោ.ស​បុរស​ម្នាក់​ឱ្យ​ជាប់​គុក​ព្រោះ​បង្ខំ​ប្រពន្ធ​រំលូត​កូន

2 អាទិត្យ មុន

ទីក្រុង​ហូស​ស្តុន​ (Houston)៖ ​ថ្មី​ៗ​នេះ​ តុលាការ​សា​លា​ដំបូង​នៅ​រដ្ឋ​តិច​សាស់​ ប្រទេស​អាមេរិក ​សម្រេច​ផ្ដន្ទា​ទោស​បុរស​ម្នាក់​​ឱ្យ​ជាប់​ពន្ធ​នា​គារ​រយៈ​ពេល​១៨០​ថ្ងៃ​ (៦​ខែ​) និង​ព្យួរ​ទោស​រយៈ​ពេល​១០​ឆ្នាំ​ដើម្បីពិនិត្យ​មើល​គំនិត​​មារ​យាទ និង​អាកប្ប​កិរិយា​របស់​ទណ្ឌិត​រូប​នេះ​ថា​តើ​គាត់​កែ​ខ្លួន ឬ​មិន​កែ​ខ្លួន​នៅ​ក្នុង​សំណុំ​រឿង​បង្ខំ​ឱ្យ​ប្រពន្ធ​របស់​ខ្លួន​លេប​ថ្នាំ​រំលូត​កូន​​។…

ទីក្រុង​ហូស​ស្តុន​ (Houston)៖ ​ថ្មី​ៗ​នេះ​ តុលាការ​សា​លា​ដំបូង​នៅ​រដ្ឋ​តិច​សាស់​ ប្រទេស​អាមេរិក ​សម្រេច​ផ្ដន្ទា​ទោស​បុរស​ម្នាក់​​ឱ្យ​ជាប់​ពន្ធ​នា​គារ​រយៈ​ពេល​១៨០​ថ្ងៃ​ (៦​ខែ​) និង​ព្យួរ​ទោស​រយៈ​ពេល​១០​ឆ្នាំ​ដើម្បីពិនិត្យ​មើល​គំនិត​​មារ​យាទ និង​អាកប្ប​កិរិយា​របស់​ទណ្ឌិត​រូប​នេះ​ថា​តើ​គាត់​កែ​ខ្លួន ឬ​មិន​កែ​ខ្លួន​នៅ​ក្នុង​សំណុំ​រឿង​បង្ខំ​ឱ្យ​ប្រពន្ធ​របស់​ខ្លួន​លេប​ថ្នាំ​រំលូត​កូន​​។

បុរស​ឈ្មោះ​មេសុន ហឺ​រីង (Mason Herring) អាយុ​៣៩​ឆ្នាំ​មិន​មែនជា​មនុស្ស​មិន​យល់​ច្បាប់​ទេ។​​ គាត់​ធ្វើ​ដល់​មេធាវី​​ប្រចាំ​ទី​ក្រុង​ហូស​ស្តុន​ ហើយ​នៅ​តែ​ប្រព្រឹត្ត​​បទ​ល្មើស​​ថែម​​ទៀត​។ គាត់​ឆ្លើយ​សារ​ភាព​ថា​​គាត់​ពិត​ជា​បាន​បង្ក​ការ​រង​គ្រោះ​​ចំពោះ​កុមារ​​​ និង​បំពាន​ស្ត្រី​កំពុង​មាន​គភ៌​។ មុន​ដំបូង​ រដ្ឋ​អាជ្ញា​ចោទ​ធ្ងន់​ជាង​​នេះ,​ ចោទ​​​ពី​បទ​ឧក្រិដ្ឋ​​បង្ខំ​ឱ្យ​នារីរង​គ្រោះ​លេប​ថ្នាំ​រំលូត​កូន​។

​អ្នក​ស្រី​ខា​ថឺរីន (Catherine) ជា​ប្រពន្ធ​ដែល​បាន​ដាក់​ពាក្យ​សូម​លែង​លះ​គ្នា​​ ថ្លែង​នៅ​ក្នុង​អង្គ​សវនា​ការ​ថា​ការ​​កាត់​ទោស​ឱ្យ​​ជាប់​គុក​ប៉ុណ្ណឹង​មិន​គ្រប់​គ្រាន់​ទេ​។ អ្នក​ស្រី​ថ្លែង​ថា​កូន​ទី​បី​របស់​អ្នក​ស្រី​​កើត​មិន​គ្រប់​ខែ​ទេ​ កើត​មុន​កាល​កំណត់​ដប់​អាទិត្យ​។ ឥឡូវ​នេះ កូន​នោះ​ហាក់​ដូច​ជា​មិន​សូវ​​មាន​បញ្ញា​ឈ្លាស​វៃ​ប៉ុន្មាន​ទេ​​ ហើយ​ត្រូវ​​​​​យក​ទៅ​​ជួប​​គ្រូ​ពេទ្យ​៨​ដង​ក្នុង​មួយ​អាទិត្យ​។ ​​

អ្នក​ស្រីមិន​ជឿ​ថា​ដាក់​គុក​បុរស​នេះ​រយៈ​ពេល​១៨០​ថ្ងៃ​អាច​ឱ្យ​អ្នក​ស្រី និ​ងកូន​រក​ឃើញ​ពន្លឺ​យុត្តិ​ធម៌​បាន​ទេ​​ដែល​បុរស​នេះ​ប៉ុន​ប៉ង​មនុស្ស​ឃាត​​ទៅ​លើ​​កូន​នេះ​​​រហូត​ដល់​៧​ដង​។ អ្នក​ស្រី​ប្រាប់​អាជ្ញាធរ​ថា​​​កាល​ពី​ខែ​មីនា ឆ្នាំ​២០២២​ ស្វាមី​ចាប់​ផ្ដើម​និយាយ​ប្រៀន​ប្រដៅ​អ្នក​ស្រី​ថា​ឧស្សាហ៍​ផឹក​ទឹក​ឱ្យ​បាន​គ្រប់​គ្រាន់​ប្រយ័ត្ន​ខ្វះ​ជាតិ​ទឹក​។ គាត់​ក៏​ឆ្លៀត​ហុច​ទឹក​ឱ្យ​អ្នក​ស្រី​ផឹក​។​ ​គ្រាន់​តែ​ផឹក​ទឹក​កែវ​ដំបូង​មិន​បាន​ប៉ុន្មាន​ផង​​​ ​អ្នក​ស្រី​មាន​អារម្មណ៍​មិន​ស្រួល​ខ្លួន​ទាល់​តែ​សោះ​ ចេះ​តែ​ធេង​ធោង​នៅ​ក្នុង​ខ្លួន​។

បុរស​នេះ​ពិត​ជា​មាន​ល្បិច​ច្រើន​ណាស់​បើ​យោង​តាម​ប្រពន្ធ​របស់​គាត់​​និយាយ​នៅ​ក្នុង​តុលាការ​​​​។ ជួន​កាល​គាត់​ហុច​ទឹក​ដែល​លាយ​ថ្នាំ​រំលូត​កូន​​ទៅ​ឱ្យ​ប្រពន្ធ​​ផឹក​​។ ជួន​កាល​គាត់​ហុច​ទឹក​ក្រូច​កំប៉ុង​ដាក់​ថ្នាំ​រំលូត​កូន​នៅ​ក្នុង​នោះ​​​បើក​គម្រប​ហើយ​ស្រេច​។ ទង្វើ​អីចឹង​ៗ​ធ្វើ​ឱ្យ​អ្នក​ស្រី​សង្ស័យ​ ហើយ​មិន​ផឹក​ទេ​។ ក្រោយ​មក​អ្នក​ស្រី​រើ​កកាយ​សំរាម​ឃើញ​កញ្ចប់​ថ្នាំ​​​រំលូត​កូន​។

អ្នក​ស្រី​​ក៏​​ដំឡើង​កាមេរ៉ា​​ដើម្បី​ឃ្លាំ​មើល​សកម្ម​ភាព​របស់​គាត់​។​ ​នៅ​ក្នុង​វីឌីអូ​ឃ្លីប​មួយ​ឈុត​ ​អ្នក​ស្រី​ឃើញ​ស្វាមី​​​កំពុង​លាយ​សារ​​ធាតុ​អ្វី​ម៉្យាង​ចូល​ទៅ​ក្នុង​កែវ​ទឹក​​។ អ្នក​ស្រី​ក៏​បាន​ប្រគល់​វីឌីអូ​នោះ​ទៅ​ឱ្យ​សមត្ថ​កិច្ច​ដើម្បី​ទុក​ធ្វើ​ជា​ភស្តុ​តាង​​។​ ​ក្រោយ​ការ​កាត់​ទោស​នេះ មេធាវី​របស់​ជន​ជាប់​ចោទ​​យល់​ថា​​​ការ​​សារ​ភាព​ទោស និង​ការ​ផ្ដន្ទា​ទោស​នេះ​​អាច​ទទួល​យក​បាន​។ ​មេធាវី​​​​សោក​ស្ដាយ​​មិន​គួរ​មាន​រឿង​នេះ​កើត​ឡើង​ទេ​​។ ប៉ុន្តែ​​យ៉ាង​ហោច​ណាស់​ក៏​​កូន​ក្ដី​របស់​​ខ្លួន​បាន​ឆ្លើយ​សារ​ភាព​កំហុស​គ្រប់​យ៉ាង​​​។​

បើ​ពិនិត្យ​មើល​ប្រវត្តិ​សាវតារ​គូ​ស្វាមី​-ភរិយា​នេះ គេ​ដឹង​ថា​អ្នក​ទាំង​២​មាន​បញ្ហា​រកាំ​រកូស​រក​តែ​លែង​លះ​គ្នា​ជា​យូរ​មក​ហើយ ហើយ​បាន​​​រស់​នៅ​បែក​គ្នា​​ក៏​យូរ​ហើយ​ដែរ​។ ពួក​គេ​​ធ្លាប់​​​រក​សេវា​ប្រឹក្សា​យោបល់​​នៅ​ពេល​​ដឹង​ថា​​នារី​ជា​ភរិយា​មាន​គភ៌​ក្នុង​ផ្ទៃ​។ ពេល​ឮ​ដូច្នេះ បុរស​ជា​ស្វាមី​ស្ដាប់​មិន​ចូល​ត្រចៀក​ទេ​ព្រោះ​​គាត់​ចង់​ដោះ​ដៃ​ចេញ​ទាំង​ស្រុង​។ ​​ពេល​នោះ​​គាត់​​មាន​ទំនាក់​ទំនង​ជា​មួយ​នារី​​ម្នាក់​​ដែល​ស្គាល់​គ្នា​នៅ​កន្លែង​ធ្វើ​ការ​។ គាត់​ប្រាប់​ប្រពន្ធ​ថា​​ទុក​កូន​ធ្វើ​អី, ទុក​​កូន​​​នាំ​ឱ្យ​ប៉ះ​ពាល់​ផែន​ការ​លែង​លះ​គ្នា​ទៅ​វិញ​ទេ​​ ហើយ​ធ្វើ​ឱ្យ​អ្នក​ដទៃ​មើល​មក​គាត់​ជា​មនុស្ស​ឆ្កួត​លេលា​ (jerk man)។​ នេះ​បើ​យោង​តាម​ឯក​សារ​របស់​តុលាការ​​៕​

ប្រភព៖ Associated Press និង​ប្រភព​ដទៃ​ទៀត
https://apnews.com/article/abortion-texas-guilty-plea-sentence-c5e6a1b71ddf8cfdcf0258fb5b7bff23
https://nypost.com/2024/02/11/news/mason-herring-sentenced-to-180-days-in-jail-for-drugging-wife/#

អត្ថបទសរសេរ ដោយ

កែសម្រួលដោយ