ADផ្ទាំងផ្សព្វផ្សាយពាណិជ្ជកម្ម

Picture

ពលរដ្ឋជាង១០០នាក់ ​ផ្ទុះ​ការ​តវ៉ា​បិទផ្លូវមុខ​ក្រុមហ៊ុនបុរី​ប្រ៊ី​លាន ស៊ី​ធី ដើម្បី​ឱ្យ​ដោះស្រាយសង​លុយ​វិញ

2 អាទិត្យ មុន
  • សៀមរាប

ខេត្តសៀមរាប​៖ នៅ​ថ្ងៃ​ទី​១២ ខែ​កុ​ម្ភៈ ឆ្នាំ​២០២៤ នេះ ប្រជាពលរដ្ឋ​មក​ពី​បណ្តា​ខេត្ត​ប្រមាណ​ជាង​១០០

ខេត្តសៀមរាប​៖ នៅ​ថ្ងៃ​ទី​១២ ខែ​កុ​ម្ភៈ ឆ្នាំ​២០២៤ នេះ ប្រជាពលរដ្ឋ​មក​ពី​បណ្តា​ខេត្ត​ប្រមាណ​ជាង​១០០ នាក់ នាំ​គ្នា​ផ្ទុះ​ការ​តវ៉ា ធ្វើការ​បិទផ្លូវ ដើម្បី​ទាមទារ​សុំ​ឱ្យ​លោកជំទាវ​ ឡេ​ង ចាន់​ណា ម្ចាស់​ក្រុមហ៊ុន បុរី ប្រ៊ី​លាន ស៊ី​ធី ចេញ​មុខ​មក​ដោះស្រាយ ជាមួយ​ពួក​គាត់ សង​លុយ​វិញ ក្នុង​ការ​យក​លុយ​ពី​ពួក​គាត់ ដែលបាន​ខ្ចីប្រាក់​ពី​ធនាគារ មក​ដាក់​លុយ​ឱ្យ​ក្រុមហ៊ុន​នេះ ដើម្បី​ចង់បាន​ការ​ប្រាក់​ខ្ពស់ ក្នុង​ការ​លក់​ផ្ទះល្វែង ជូន​អតិថិជន​ទិញ​ភ្លាម ចំណេញ​ភ្លេ​ត ដែល​មាន​ទីតាំង​ស្ថិត​នៅ​ភូមិ​តា​វៀន សង្កាត់​សាលា​កំរើក ក្រុងសៀមរាប ខេត្តសៀមរាប ។

បើ​តាម​ប្រភព​ពី​អ្នកគ្រប់គ្រង​ទាំង​២៥​ក្រុម ហៅ​ថា (​ធី​ម​ទាំង​២៥ ) ដែល​ជា​អ្នក​ដើរ​គៀងគរ ផ្សព្វផ្សាយ​តាម​លំនៅ​ដ្ឋា​ន​បងប្អូន​ប្រជាពលរដ្ឋ តាម​បណ្តា​ក្រុង ខេត្ត ឬ​ជនបទ​ផង​នោះ បាន​និយាយ​រៀបរាប់​ទាំង​អួល​ដើម​ក នៅ​ថ្ងៃ​ទី​១២ ខែកុម្ភៈ ឆ្នាំ​២០២៤​នេះ​ថា ពួក​គាត់​បាន​ទៅ​ខ្ចី​លុយ​ពី​ធនាគារ ឯកជន និង​ប្រមូលប្រពល​រដ្ឋ​រង​គ្រោះជា​ច្រើន​នាក់ មក​តាម​បណ្តា​ខេត្ត​ផ្សេង​ៗ និង​នៅ​ក្នុងស្រុក និង​ក្រៅប្រទេស ដើម្បី​យក​លុយ​ក្នុង​ម្នាក់​ៗ​រាប់​ម៉ឺន​ដុល្លារ មក​ដាក់​ឱ្យ​ក្រុមហ៊ុន​បុរី ប្រ៊ីលាន សុធី ចង់​បាន​ស៊ី​ការប្រាក់ខ្ពស់ បែរជា​ខាត​ទាំងដើម​ទាំង​ចុងអស់​។

​អ្នកគ្រប់គ្រង​ទាំង​២៥ក្រុម បាន​បន្ត​ថា ក្នុង​ការ​បិទផ្លូវ​នេះ គឺ​ពួក​គាត់​ចង់បាន​ឱ្យ​ម្ចាស់​ក្រុមហ៊ុន បុរី ប្រ៊ីលាន សុធី ​ចេញ​មុខ​ដោះស្រាយ យក​លុយ​មក​សង​ឱ្យ​ពួក​គាត់​ទាំងអស់​គ្នា​វិញ​តែ​ប៉ុណ្ណោះ បើ​មិន​ដោះស្រាយ​ទេ ពួក​គាត់​រៀបចំ​ឯកសារ ដើម្បី​រក​មេធាវី​ម្នាក់​១ ប្តឹង​ទៅ​តុលា​ការ ដើម្បី​រក​យុត្តិធម៌​ឱ្យ ព្រោះ ប្រជាពលរដ្ឋ​បាន​ប្តឹង​ពួក​គាត់​ជាអ្នកហៅ​ពួក​គាត់​យក​លុយ​មក​ឱ្យ​ពួក​ខ្ញុំ​ ។

​អ្នកគ្រប់គ្រង​ទាំង​២៥​ក្រុម បាន​បញ្ជាក់​ថា ពលរដ្ឋ​ខ្លះ​ធ្វើ​ដំណើរ​តាម​រថយន្ត​តាក់​ស៊ី ខ្លះ​រថយន្ត​ផ្ទាល់ខ្លួន បាន​មក​ជួបជុំ ធ្វើការ​តវ៉ា​នៅ​មុខ​ក្រុមហ៊ុន បុរី ប្រ៊ីលាន ស៊ី​ធី ផ្ទះល្វែង ដើម្បី​ឱ្យ​លោកជំទាវ​ ឡេ​ង ចាន់​ណា ម្ចាស់​ក្រុមហ៊ុន​ចេញ​មុខ​មក​ដោះស្រាយ​ចំពោះ មុខ​អតិថិជន នៅ​ក្នុង​នោះ​ផង​ដែរ​.​។

ចំណែក​ពលរដ្ឋ​រង​គ្រោះ បានឱ្យ​ដឹង​ថា ពួក​គាត់​បាន​យក​លុយ​មក​ដាក់​ឱ្យទៅ​ក្រុមហ៊ុន ដែល​មាន​អ្នកខ្លះ​២​ម៉ឺន​ដុល្លារ រ​ហូត​ទៅ​៥​ម៉ឺ​ន​ដុល្លារ គេ​និង​ឱ្យ​ការ​ប្រាក់​ខ្ពស់ ៤​ភាគរយ​% ក្នុង​១​ម៉ឺន​ដុល្លារ បាន​ចំនួន​៤០០​ដុល្លារ​នៃ​ការ​ប្រាក់ ។ ហើយ​ពួក​គាត់​បានការ​ប្រាក់​ទាំង​អស់នោះ​ ត្រឹម​រយ​:​ពេល​៣​ខែ​គត់ ក្រៅពី​នោះ​បាន​ត្រឹម​សន្យា​ខ្យល់​ពី​ក្រុមហ៊ុន រហូត​ពួក​គាត់​ទ្រាំ​លែង​បាន ដោយ​បំណុល​ត​គ្នា​ពីធនា​គារ ​គេ​ចេះ​តែ​សង្កត់ និង​គំរាម​គំ​ហែង​យក​នេះ​យក​នោះ​ពី​ពួក​គាត់ ហើយ​ការ​សន្យា​របស់​ក្រុម​ហ៊ុន មិន​មាន​ប្រសិទ្ធភាព ទើប​ពួក​គាត់​នាំ​គ្នា​មក​ក្រុមហ៊ុន​ធ្វើការ​តវ៉ា ដើម្បី​ឱ្យ​ក្រុមហ៊ុន​ចូលខ្លួន​ដោះស្រាយ​តាម​កិច្ចសន្យា ។

ជុំវិញ​ករណី​បិទផ្លូវ​នេះ​ដែរ អាជ្ញាធរ​បាន​ឱ្យ​ដឹងថា ក្រោយ​មាន​ផ្ទុះ​ការ​តវ៉ា​រវាង​ពលរដ្ឋ និង​ក្រុម​ហ៊ុន បុរី ប្រ៊ីលាន សុធី ដែល​មាន​ម្ចាស់​​គឺលោកជំទាវ​ ឡេ​ង ចាន់​ណា នេះ​ត្រូវ​បាន​សម្រប​សម្រួល​ឱ្យ​បែក​គ្នា​អស់ហើយ ។ អាជ្ញាធរ​បាន​បញ្ជាក់​ទៀត​ថា បន្ទាប់​ពី​បំបែក​គ្នា​អស់ ពួក​គាត់​បាន​និយាយ​ថា នឹង​ប្រមូល​ផ្តុំ​គ្នា​ឡើង​ទៅ​ភ្នំពេញ ធ្វើការ​តវ៉ាបន្ត​ទៀត នៅ​មុខ​ក្រុមហ៊ុន ប្រី លាន សុធី និងអ្នកគ្រប់គ្រងទាំង២៥ក្រុម បានត្រៀម​ឯកសាររួច​ហើយ ដាក់ជូន​មេធាវី ដើម្បី​ដាក់​ពាក្បណ្តឹងទៅ​កាន់​តុលាការខេត្តសៀមរាប ដើម្បី​ឱ្យ​ជួយ​រក​យុត្តិធម៌ជូន​ពួក​គាត់ទាំងអស់គ្នាផងព្រោះ​ធនាគារ​រឹបអូស​យក​ដីធ្លី​របស់​ពួក​គាត់​ដែរ​ ៕​

អត្ថបទសរសេរ ដោយ

កែសម្រួលដោយ