ទីក្រុងវ៉ាស៊ីនតោន៖ មេធាវីឯកជនរបស់លោកបៃដិន លោកបប់បូអឺ (Bob Bauer) ថ្លែងថាគាត់បានធ្វើដំណើរទៅជួបអ្នកប្រឹក្សាពិសេស និងអគ្គរដ្ឋអាជ្ញាដើម្បីកើតទុក្ខមិនសុខចិត្តនូវអ្វីដែលគាត់យល់ថាជាការមាក់ងាយ និងមិនចាំបាច់ទាល់តែសោះចំពោះគម្រោងធ្វើតេស្តសមត្ថភាពចងចាំរបស់លោកបៃដិន។ លោកបូអឺថ្លែងប្រាប់ទូរទស្សន៍ស៊ីប៊ីអែស (CBS)…
ទីក្រុងវ៉ាស៊ីនតោន៖ មេធាវីឯកជនរបស់លោកបៃដិន លោកបប់បូអឺ (Bob Bauer) ថ្លែងថាគាត់បានធ្វើដំណើរទៅជួបអ្នកប្រឹក្សាពិសេស និងអគ្គរដ្ឋអាជ្ញាដើម្បីកើតទុក្ខមិនសុខចិត្តនូវអ្វីដែលគាត់យល់ថាជាការមាក់ងាយ និងមិនចាំបាច់ទាល់តែសោះចំពោះគម្រោងធ្វើតេស្តសមត្ថភាពចងចាំរបស់លោកបៃដិន។ លោកបូអឺថ្លែងប្រាប់ទូរទស្សន៍ស៊ីប៊ីអែស (CBS) ថានេះជារបាយការណ៍ដែលប្រាសចាកបរិបទបច្ចុប្បន្នឆ្ងាយពេកហើយ។ នេះជាការបំពេញការងារដ៏ខ្ជីខ្ជាឱ្យតែរួចពីដៃ។
ក្រុមប្រឹក្សាពិសេស (special counsel) ធ្លាប់ស៊ើបអង្កេតចង់ដឹងថាតើលោកបៃដិនបានយកឯកសារសម្ងាត់របស់ជាតិទៅផ្ទះរបស់លោកដែរឬទេកាលលោកធ្វើជាសមាជិកព្រឹទ្ធសភា និងក្រោយមកទៀតធ្វើជាអនុប្រធានាធិបតីជំនាន់លោកអូបាម៉ា? បន្ទាប់ពីសួរចុះសួរឡើងទៅ ក្រុមប្រឹក្សាយល់ថាដូចជាគ្មានចំណុចណាដែលអាចចោទប្រកាន់លោកបៃដិនទៅតុលាការបាន។ ប៉ុន្តែនៅក្នុងដំណើរការស៊ើបអង្កេត និងសាកសួរលោកបៃដិននោះលេចចេញបញ្ហាផ្សេងមួយទៀត។ ពួកគេរកឃើញថាការចងចាំរបស់លោកបៃដិនធ្លាក់ចុះខ្លាំង។
សូម្បីតែកូនប្រុសរបស់លោកដែលស្លាប់តាំងពីឆ្នាំ២០១៥ក៏លោកមិនអាចចងចាំបានដែរ។ និយាយដល់ចំណុចកូនរបស់គាត់ដែលស្លាប់នោះ លោកបៃដិនផ្ទុះកំហឹងយ៉ាងខ្លាំង។ គាត់យល់ថាពួកគេមិនគួរយកបញ្ហានេះមកនិយាយទេ។ នៅពេលពួកគេសួរសំណួរនោះទៅគាត់ គាត់គិតក្នុងចិត្តថាតើគួរដែរអីសួរសំណួរអីចឹងៗ?
តាមពិត កុំថាឡើយនិយាយទៅដល់សមត្ថភាពចងចាំរបស់លោកបៃដិន សូម្បីតែអាយុរបស់លោកដែលបច្ចុប្បន្នអាយុ៨១ឆ្នាំទៅហើយក៏ជាការព្រួយបារម្ភផងដែរ។ ពួកអ្នកគាំទ្រគណបក្សប្រជាធិបតេយ្យត្រូវជាប់រវល់ឆ្លើយតបនឹងចម្ងល់ថាតើលោកបៃដិនដែលមានអាយុចំណាស់នេះហើយលោកអាចនៅកាន់តំណែងជាអគ្គបញ្ជាការកងទ័ពដែរឬទេ។ ជំទាវទី១អាមេរិក លោកស្រីជីលបៃដិន (Jill Biden) បានសរសេរលិខិតមួយច្បាប់ផ្ញើជូនក្រុមអ្នកគាំទ្រដែលតែងតែផ្ដល់ថវិកាសម្រាប់ចុះឃោសនាបោះឆ្នោត និងដាក់ជាសំណួរថាតើការធ្វើអត្ថាធិប្បាយនោះនៅក្នុងចេតនានយោបាយឬយ៉ាងណា។
មេធាវីលោកបៃដិន (បប់បូអឺ) បានលើកឡើងអំពីបញ្ហានេះ (ការចេញរបាយការណ៍ថាលោកបៃដិនចុះខ្សោយការចងចាំ) ដែលគេបញ្ជូនទៅប្រធានក្រុមប្រឹក្សាពិសេស និងអគ្គរដ្ឋអាជ្ញា។ លោកយល់ថាធ្វើបែបនេះខុសពីទម្លាប់របស់ក្រសួងយុត្តិធម៌។ តាមធម្មតា បើតុលាការមិនទាន់ចោទប្រកាន់នរណាម្នាក់ គេមិនត្រូវធ្វើបុរេវិនិច្ឆ័យ (ឬធ្វើអត្ថាធិប្បាយលម្អៀង) ទៅលើអ្នកនោះទេ។
ប៉ុន្តែការតវ៉ារបស់មេធាវីលោកបៃដិនគ្មានប្រសិទ្ធភាព។ យោងតាមមេធាវីរូបនេះ, ច្បាស់ណាស់ថាអគ្គរដ្ឋអាជ្ញាចង់ចេញរបាយការណ៍ថាលោកបៃដិនភ្លេចភ្លាំងច្រើនដោយទាញយកបទសម្ភាសរបស់ក្រុមប្រឹក្សាពិសេសធ្វើជាសម្អាង។ មេធាវីចង់មានន័យថាអគ្គរដ្ឋអាជ្ញាចង់ថាលោកបៃដិនភ្លេចភ្លាំងច្រើនខ្លួនឯង ប៉ុន្តែយកប្រភពផ្សេងធ្វើជាឯកសារយោង។
ទោះជាមេធាវីយល់ឃើញបែបនេះក្ដី ប៉ុន្តែអគ្គរដ្ឋអាជ្ញារងប្រកាសគាំទ្ររបាយការណ៍នោះ (របាយការណ៍ថាលោកបៃដិនភ្លេចភ្លាំងច្រើន)។ អគ្គរដ្ឋអាជ្ញារងរូបនេះយល់ថានៅក្នុងដំណើរការស៊ើបអង្កេតព្រហ្មទណ្ឌ (ស៊ើបចង់ដឹងថាតើលោកបៃដិនមានបានលួចឯកសារសម្ងាត់យកទៅផ្ទះរបស់គាត់ដែរឬទេ?) គេត្រូវជជីកសួរដល់ឫសគល់នៃបញ្ហា។
ដូច្នេះ គេមិនអាចយោគយល់ឃើញគាត់ចាស់ហើយកុំសូវសួរគាត់ច្រើនពេកនោះទេ។ គេត្រូវតែសួរឱ្យបានអស់អាចម៍អស់នោម។ និយាយដោយសាមញ្ញ របាយការណ៍ស៊ើបអង្កេត (រឿងឯកសារសម្ងាត់) មិនបានផ្សព្វផ្សាយជាសាធារណៈទេ។ ប៉ុន្តែបែរជាផ្សាយលទ្ធផលសាកសួររបស់ក្រុមប្រឹក្សាពិសេសដែលរកឃើញថាលោកបៃដិនភ្លេចភ្លាំងច្រើនទៅវិញ។ តាមត្រូវ, របាយការណ៍នោះគួរណាស់រក្សាទុកជាឯកសារលាក់ការណ៍ផ្ទៃក្នុង (confidential) របស់ក្រសួងយុត្តិធម៌៕
ប្រភព៖ Associated Press
https://apnews.com/article/biden-memory-classified-documents-election-9a519ea3f9ec514187d10e758c6535ac
ចែករំលែកព័តមាននេះ