រាជធានីភ្នំពេញ ៖ ប្រហិតចម្រុះខូចគុណភាពទម្ងន់២តោន ត្រូវបានកម្លាំងជំនាញ នៃស្នងការដ្ឋាននគរបាលរាជធានីភ្នំពេញ ចុះប្រតិបត្តិការបង្ក្រាប និងដកហូតដែលឈ្មួញបានដឹកតាមរថយន្តនាំចូលពីប្រទេសថៃ ។ ស្នងការដ្ឋាននគរបាលរាជធានីភ្នំពេញ បានប្រកាសនៅថ្ងៃទី០៦…
រាជធានីភ្នំពេញ ៖ ប្រហិតចម្រុះខូចគុណភាពទម្ងន់២តោន ត្រូវបានកម្លាំងជំនាញ នៃស្នងការដ្ឋាននគរបាលរាជធានីភ្នំពេញ ចុះប្រតិបត្តិការបង្ក្រាប និងដកហូតដែលឈ្មួញបានដឹកតាមរថយន្តនាំចូលពីប្រទេសថៃ ។
ស្នងការដ្ឋាននគរបាលរាជធានីភ្នំពេញ បានប្រកាសនៅថ្ងៃទី០៦ ខែកុម្ភៈ ឆ្នាំ២០២៤ថា កម្លាំងការិយាល័យនគរបាលប្រឆាំងបទល្មើសសេដ្ឋកិច្ចបានឃាត់រថយន្តម៉ាក Ssang Young Istana ពណ៌ប្រាក់ ពាក់ផ្លាកលេខ ភ្នំពេញ 2T-6216 ដឹកផលិតផលប្រហិតចម្រុះចំនួន២,០០០គីឡូក្រាម គ្មានសុវត្ថិភាព និងមិនអនុលោមភាពផ្នែកបទដ្ឋានព័ត៌មានលក្ខខណ្ឌតម្រូវម្ហូបអាហារដោយគ្មានច្បាប់អនុញ្ញាតពីតំបន់នៃព្រំដែនថៃ ។ ឡានដឹកប្រហិតខុសច្បាប់នេះត្រូវបានប៉ូលិសចាប់ឃាត់ នៅចំណុចដីឡូតិ៍ គ្មានលេខ ក្នុងសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
កម្លាំងការិយាល័យនគរបាលប្រឆាំងបទល្មើសសេដ្ឋកិច្ច បានប្រគល់រថយន្ត និងផលិតផលប្រហិតចម្រុះទម្ងន់២តោន ជូនអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (សាខា ក.ប.ប. រាជធានីភ្នំពេញ) ដើម្បីយកទៅបំផ្លាញចោលតាមនីតិវិធី ។
ករណីនេះ គ្រាន់តែជាហេតុការណ៍ថ្មីមួយតែក៏មិនមែនរឿងថ្មី ហើយក៏ទំនងនឹងមិនមែនជារឿងចុងក្រោយដែរ ។ អ្នកនាំចូលសាច់សត្វ ពងមាន់ពងទា ឬក៏ប្រហិតខូចគុណភាព ចូលពីប្រទេសថៃ វៀតណាម ដឹកតាមឡាន មកលក់នៅភ្នំពេញ ហើយត្រូវ សមត្ថកិច្ចចាប់បាន ។ តាមធម្មតា មុនឆ្លងដែនបានត្រូវឆ្លងកាត់កម្លាំងសមត្ថកិច្ចជំនាញប្រចាំច្រកព្រំដែនមិនចេះតិចឡើយ ។
ក្នុងនោះ ក៏មានវិធីច្រើនយ៉ាងទើបឈ្មួញអាចនាំចូលសាច់សត្វ ប្រហិត ពងមាន់ពងទា ឆ្លងដែនចូលមកលក់ចែកចាយក្នុងផ្ទៃប្រទេសយើងបាន ។ ករណីខ្លះឆ្លងព្រំដែន បានសម្រេចហើយ ត្រូវកម្លាំងសមត្ថកិច្ចចល័តដេញចាប់តាមផ្លូវ ។
រឿងទំនិញឆ្លងដែនចូលដល់ទីក្រុងទើបចាប់បាននាំអោយមានការចោទសួរថា តើទំនិញទាំងនោះឆ្លងដែនបានដោយរបៀបណា? វាប្រាកដជាមានការចន្លោះប្រហោងណាមួយកើតឡើងដោយបិទភ្នែកធ្វើអោយទំនិញទាំងនោះចូលក្រុងបាន ។
ដូច្នេះនៅតាមព្រំដែន ទាំងច្រកតូច ទាំងច្រកធំ ហើយទាំងកម្លាំងសមត្ថកិច្ចជំនាញទាំងអស់ សូមគិតពីសុខភាពប្រជាពលរដ្ឋយើង ជាអ្នកប្រើប្រាស់ និងជាអ្នកទទួលទានផង ។ សូមបង្កើនការត្រួតពិនិត្យ ហើយកម្លាំងសមត្ថកិច្ចជំនាញនៅខាងក្នុង ក៏សូមបន្តចាប់បង្ក្រាប និងត្រួតពិនិត្យតាមផ្សារ ជាប្រចាំបន្តទៀត ។ មានសារធាតុគីមី ជាទំនិញខូចគុណភាព ត្រូវតែបង្ហាញច្បាស់ៗ ហើយចាប់រឹបអូសយកទៅកម្ទេចចោល ។ ដើម្បីសុខភាពនិងជីវិតប្រជាជននោះ យើងមិនត្រូវអោយទំនិញប៉ះពាល់សុខភាពនិងជីវិត ប្រជាជនឆ្លងដែនចូលកម្ពុជាឡើយ៕
ចែករំលែកព័តមាននេះ