ខេត្តប៉ៃលិន ៖ សាលាដំបូងខេត្តដែលទើបនឹងបង្កើតថ្មីបានសម្រេចឃុំខ្លួនជនសង្ស័យចំនួន៧នាក់ ពាក់ព័ន្ធបទល្មើសចែកចាយគ្រឿងញៀនដែលជនត្រូវចោទទាំង៧នាក់នេះត្រូវសមត្ថកិច្ចកងរាជអាវុធហត្ថខេត្តចាប់ខ្លួន កាលពីថ្ងៃទី២០, ២១ និង២៣ ឧសភា នៅភូមិសាស្ត្រទឹកដីខេត្តប៉ៃលិន
ខេត្តប៉ៃលិន ៖ សាលាដំបូងខេត្តដែលទើបនឹងបង្កើតថ្មីបានសម្រេចឃុំខ្លួនជនសង្ស័យចំនួន៧នាក់ ពាក់ព័ន្ធបទល្មើសចែកចាយគ្រឿងញៀនដែលជនត្រូវចោទទាំង៧នាក់នេះត្រូវសមត្ថកិច្ចកងរាជអាវុធហត្ថខេត្តចាប់ខ្លួន កាលពីថ្ងៃទី២០, ២១ និង២៣ ឧសភា នៅភូមិសាស្ត្រទឹកដីខេត្តប៉ៃលិន ។
ការចាប់ខ្លួនជនសង្ស័យទាំង៧នាក់ខាងលើនេះ ត្រូវបានគេដឹងថា នៅថ្ងៃទី២០ ឧសភា ឆ្នាំ២០១១ សមត្ថកិច្ចកងរាជអាវុធហត្ថខេត្តប៉ៃលិន ដឹកនាំដោយលោកព្រះរាជអាជ្ញាអមសាលាដំបូងខេត្ត បានចុះធ្វើការបង្ក្រាបករណីចែកចាយគ្រឿងញៀន១ករណីនៅចំណុចភូមិអូរតាពុកក្រោម សង្កាត់ទូលល្វា ក្រុងប៉ៃលិន ខេត្តប៉ៃលិន ដំបូងឃាត់ខ្លួនជនសង្ស័យ៤នាក់ និងដកហូតថ្នាំញៀនចំនួន១គ្រាប់កន្លះ និងឈានទៅឃាត់ខ្លួនជនសង្ស័យ២នាក់ទៀត ។ ប្រភពព័ត៌មានឱ្យដឹងទៀតថា ជនសង្ស័យ៤នាក់ដំបូង ១-ឈ្មោះសាន់ សះ ភេទស្រី អាយុ៤២ឆ្នាំ ២-ឈ្មោះហាយ រីណា ភេទស្រី អាយុ១៨ឆ្នាំ ៣-ឈ្មោះហាយ ជន ភេទប្រុស អាយុ៤៤ឆ្នាំ និង៤-ឈ្មោះង៉ូវ អាត ភេទប្រុស អាយុ២៧ឆ្នាំ ។
ក្រោយពីឃាត់ខ្លួន និងសាកសួរជនសង្ស័យទាំង៤នាក់រួចមក ពួកគេបានសារភាពថា ថ្នាំញៀនដែលយកមកចែកចាយ និងប្រើប្រាស់ផងដែរនេះ គឺទិញពីឈ្មោះអ៊ុល អេវ ភេទស្រី អាយុ៤១ឆ្នាំ រស់នៅភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ បន្ទាប់ពីទទួលបានចម្លើយសារភាពរបស់ជនសង្ស័យទាំង៤នាក់ហើយ ព្រះរាជអាជ្ញាអមសាលាដំបូងខេត្តប៉ៃលិន បានដឹកនាំកម្លាំងកងរាជអាវុធហត្ថចុះទៅឆែកឆេរផ្ទះរបស់ឈ្មោះអ៊ុល អេវ នៅថ្ងៃទី២១ ឧសភា វេលាម៉ោង៥ល្ងាច ។ លទ្ធផលរកឃើញថ្នាំញៀនចំនួន៧៩៩គ្រាប់ ដែលឈ្មោះនេះបានយកទៅកប់លាក់ទុកនៅក្នុងដីចម្ងាយពីមុខផ្ទះប្រហែល៣០ម៉ែត្រ ។ ពេលរកឃើញវត្ថុតាងថ្នាំញៀនជាង៧០០គ្រាប់នោះហើយ លោកព្រះរាជអាជ្ញាបានអនុញ្ញាតឱ្យសមត្ថកិច្ចកងរាជអាវុធហត្ថឃាត់ខ្លួនឈ្មោះអ៊ុល អេវ ប្រយោជន៍ដើម្បីស្រាវជ្រាវរកទីតាំង ឬឈ្មួញធំជាងគេនាំចូល ឬផលិតគ្រឿងញៀននោះ ។
លោកជុំ ស ប្រធានសាលាដំបូងខេត្តប៉ៃលិន បានជួបតាមទូរស័ព្ទប្រាប់ភ្នាក់ងារកោះសន្តិ ភាពឱ្យដឹងនៅថ្ងៃទី៣០ ឧសភា ថា នេះជាការបង្ក្រាបទទួលបានជោគជ័យយ៉ាងធំធេងដំបូងរបស់ព្រះរាជអាជ្ញាអមសាលាដំបូងខេត្ត ដែលសាលាដំបូងខេត្តនេះ ទើបនឹងបង្កើតឡើងមានប្រព័ន្ធតុលាការងាយស្រួលចាត់ការលើសំណុំរឿងទាំងឡាយ រាប់បញ្ចូលបទល្មើសមជ្ឈិម និងព្រហ្មទណ្ឌ ។
ក្រោយពីបង្ក្រាប និងឃាត់ខ្លួនជនសង្ស័យទាំង៥នាក់ខាងលើនោះមក សមត្ថកិច្ចបានបញ្ចុះបញ្ចូលឱ្យឈ្មោះអ៊ុល អេវ ទំនាក់ទំនងទៅបណ្តាញក្រុមជួញដូរគ្រឿងញៀនគេម្នាក់ទៀតនៅរាជធានីភ្នំពេញ ដើម្បីចាប់ខ្លួន មិនខុសពីពាក្យជីកស្មៅត្រូវជីកទាំងឫស ។ នៅថ្ងៃទី២៣ ឧសភា ឈ្មោះអ៊ុល អេវ និងសមត្ថកិច្ចបានអន្ទងឈ្មោះភុំ ស្រីអូន អាយុ៤២ឆ្នាំ នៅឯរាជធានីភ្នំពេញ ឱ្យយកថ្នាំញៀនទៅលក់ឱ្យគេនៅចំណុចភូមិអូរប្រើស សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ហើយក៏ត្រូវឃាត់ខ្លួន និងដកហូតថ្នាំញៀនបានចំនួន៦.១៧៧គ្រាប់ ។ បន្ទាប់មកបានធ្វើការស្រាវជ្រាវរកឃើញបណ្តាញពួកគេម្នាក់ទៀត គឺឈ្មោះសៀង រី ភេទស្រី អាយុ៤៥ឆ្នាំ ។ សរុបមក ករណីបង្ក្រាបបទល្មើសជួញដូរ និងចែកចាយគ្រឿងញៀន១ករណីខាងលើនេះ សមត្ថកិច្ចកងរាជអាវុធហត្ថខេត្តប៉ៃលិនឃាត់ខ្លួនជនសង្ស័យចំនួន៧នាក់ បញ្ជូនទៅកាន់សាលាដំបូងខេត្ត និងបានសម្រេចធ្វើការឃុំខ្លួនដាក់ពន្ធនាគារជាបណ្តោះអាសន្ន ។ លោកជុំ ស បានឱ្យដឹងថា នេះជាលើកដំបូងហើយក៏ជាករណីបង្ក្រាបបទល្មើសធំមួយដែលមានការចូលរួមសហការពីស្ថាប័នអយ្យការនៅខេត្តប៉ៃលិន ដែលទើបមានស្ថាប័នតុលាការថ្មីមួយ៕
ចែករំលែកព័តមាននេះ