ADផ្ទាំងផ្សព្វផ្សាយពាណិជ្ជកម្ម

ជីករណ្តៅដីមាត់ព្រែកព្រំដែនធ្វើផែ មហាជនកំពុងបារម្ភខ្លាចមានហេតុការណ៍បា.ក់ដី

1 ឆ្នាំ មុន

ស្វាយរៀង
០៧ ខែ កុម្ភៈ ឆ្នាំ ២០២៤ ម៉ោង ១០:៣៣

ខេត្តស្វាយរៀង ៖ មានក្រុមហ៊ុនមួយបានយកអេស្កាវ៉ាទ័រជីករណ្តៅដីនៅជាប់មាត់ព្រែកព្រំដែនក្នុងតំបន់.ស ដើម្បីយកអាចម៌ដីមកចាក់ធ្វើផ្លូវនិងធ្វើផែផ្ទេរទំនិញ និងផ្លាស់ប្ដូរទំនិញទៅប្រទេសវៀតណាម ជាហេតុធ្វើឱ្យមហាជននិងសមត្ថកិច្ចការពារព្រំដែនមានការព្រួយបារម្ភខ្លាចបាក់ដីមាត់រណ្តៅចូលទៅក្នុងព្រែក ដែលជាព្រំនៃខណ្ឌសីមាព្រំដែន ដូច្នេះ សូមឱ្យអាជ្ញាធរមានសមត្ថកិច្ចមេត្តាចុះពិនិត្យមើលផង ។…

ករណីនេះបានកើតឡើងកាលពីព្រឹកថ្ងៃទី៦ កុម្ភៈ ២០២៤ ស្ថិតចំណុចខាងលិចបង្គោលព្រំសីមា លេខ229 /12(1)មាត់ព្រែក ខាងត្បូងផ្លូវខ្សែក្រវាត់ព្រំដែននៃច្រកទ្វារព្រំដែនក្រសាំងជ្រំ ភូម
ក្រសាំងជ្រំ ឃុំក្រួស ស្រុកស្វាយជ្រំ ។

បើតាមសមត្ថកិច្ចការពារព្រំដែនក្រសាំងជ្រំបានឱ្យដឹងថា ករណីក្រុមហ៊ុនយកគ្រឿងចក្រ អេស្ការវ៉ាទ័រជីករណ្ដៅដីយកអាចម៌ដីធ្វើផែផ្លាស់ប្ដូរទំនិញនេះ កើតឡើងចាប់តាំងពីថ្ងៃទី២ កុម្ភៈ ២០២៤ រហូតមកដល់ថ្ងៃទី៦កុម្ភៈ២០២៤នេះ ពេលសមត្ថកិច្ចសួរនាំម្ចាស់គ្រឿងចក្រប្រាប់ថា គេធ្វើតាមមេបញ្ជាពេលសួរថា មេជាអ្នកណា? គេប្រាប់ថា ម្ចាស់ក្រុមហ៊ុនជាប្រធានសភាពាណិជ្ជកម្មខេត្តស្វាយរៀងឈ្មោះសុខ រ៉ាដូ ។

ទាក់ទិនខាងលើនេះដែរ លោកសុខ រ៉ាដូ ប្រធានសភាពាណិជ្ជកម្មខេត្តស្វាយរៀងបានប្រាប់អ្នកសារព័ត៌មានថា គឺធ្វើផែហើយបើចង់បានព័ត៌មានលម្អិតសូមសួរទៅ លោកហែម ពិសិដ្ឋ អភិបាលរងខេត្តស្វាយរៀងវិញ ។

មហាជនបានលើកឡើងថា ជាធម្មតា សមត្ថកិច្ចនៃគណៈកម្មាធិការជាតិកិច្ចការព្រំដែន លោកយកចិត្តទុកដាក់ខ្លាំងណាស់បញ្ហាព្រំដែន សូម្បីការឈួសឆាយត្រាស់ហ្សេសាងសង់ផ្លូវខ្សែក្រវាត់ព្រំដែន ក៏មានការសិក្សាប្រុងប្រយ័ត្នមិនហ៊ានធ្វើឱ្យខូចទ្រង់ទ្រាយដីតាមមាត់ព្រែក ឬក្បែរមាត់ព្រែកដែរ ក្រុមការងារអគ្គនាយកដ្ឋានកងវិស្វកម្ម លោកជីកប្រឡាយខាងក្នុង ដើម្បីយកអាចម៍ដីមកធ្វើផ្លូវ ។

ចំណែកដីនៅចំណុចសូន្យមិនធ្វើអីឱ្យខូចទ្រង់ទ្រាយដើមដែរ ទើបតែក្រុមហ៊ុនមួយនេះ ហ៊ានយកគ្រឿងចក្រជីករណ្តៅដីយកអាចម៌ដីទៅធ្វើផែផ្ទេរទំនិញ បង្កឱ្យមានផលប៉ះពាល់ព្រំដែន និងអាចបាក់ភ្លឺរណ្ដៅដីចូលទៅក្នុងព្រែកក្រវាត់ព្រំដែន ជាព្រែកប្រវត្តិសាស្ត្រ ។ ប្រភពបន្តថា ការជីករណ្តៅដីយកអាចម៍ដីនេះ គឺមានទំហំប្រមាណជាង១០ម៉ែត្រ ទទឹងប្រមាណ៨ម៉ែត្រ ជម្រៅប្រមាណជាង៣ម៉ែត្រ ដោយទុកច្រាំងមាត់រណ្តៅប្រមាណ៣ម៉ែត្រពីព្រែកព្រំដែន។

ទាក់ទិនករណីនេះដែរ លោកហែម ពិសិដ្ឋ អភិបាលរងខេត្តស្វាយរៀង លោកបានមានប្រសាសន៍តាមទូរសព្ទ នារសៀលថ្ងៃទី៦ កុម្ភៈ ប្រាប់អ្នកសារព័ត៌មានយើងថា លោកមិនបានដឹងរឿងនេះទេ ក៏ប៉ុន្តែកន្លងមក ក្រុមហ៊ុននាំស្រូវចេញទៅប្រទេសវៀតណាមបានដាក់សំណើសុំមកឯកឧត្តមអភិបាលខេត្តសាងសង់ផែនៅជិតច្រកទ្វារព្រំដែនក្រសាំងជ្រំ បើមានការជីករណ្តៅដី ជាប់មាត់ព្រែកព្រំដែន ចាំលោកឱ្យលោកអភិបាលស្រុកស្វាយជ្រំចុះទៅពិនិត្យមើល ។