- ភ្នំពេញ
រាជធានីភ្នំពេញ ៖ កាលពីចុងខែមករា ឆ្នាំ២០២៤នេះ ប្រមុខរាជរដ្ឋាភិបាល បានចេញសេចក្តីសម្រេច តែងតាំងក្រុមគ្រូពេទ្យដឹកនាំដោយលោកវេជ្ជបណ្ឌិត ឈាង រ៉ា រដ្ឋមន្ត្រីក្រសួងសុខាភិបាល…
រាជធានីភ្នំពេញ ៖ កាលពីចុងខែមករា ឆ្នាំ២០២៤នេះ ប្រមុខរាជរដ្ឋាភិបាល បានចេញសេចក្តីសម្រេច តែងតាំងក្រុមគ្រូពេទ្យដឹកនាំដោយលោកវេជ្ជបណ្ឌិត ឈាង រ៉ា រដ្ឋមន្ត្រីក្រសួងសុខាភិបាល ដែលជាអតីតប្រធានមន្ទីរពេទ្យកាល់ម៉ែត្រ សម្រាប់ថែទាំព្រះរាជសុខភាព ថ្វាយព្រះករុណា ព្រះមហាក្សត្រ និងសម្តេចម៉ែ។
ថ្មីៗនេះទៀត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ត្រូវបានបញ្ជូនចូលពិនិត្យព្យាបាលជំងឺនៅក្នុងមន្ទីរពេទ្យកាល់ម៉ែត្រ ដែលទើបតែមានអគារថ្មី រួមទាំងបរិក្ខារពេទ្យទំនើបៗផងដែរ ។
ការបង្កើតក្រុមគ្រូពេទ្យចំណានៗ ដែលសុទ្ធតែជាគ្រូពេទ្យខ្មែរយើងទទួលការបណ្តុះបណ្តាលទាំងក្នុងស្រុក និងទាំងនៅបរទេសមានជំនាញច្បាស់លាស់ សម្រាប់ថែទាំព្រះរាជសុខភាពថ្វាយព្រះមហាក្សត្រ និងសម្តេចម៉ែ នាពេលនេះ ត្រូវបានគេមើលឃើញផ្សេងៗគ្នា ។ អ្នកខ្លះថា នៅពេលមានក្រុមគ្រូពេទ្យប្រចាំព្រះរាជវាំងដូច្នេះអាចថា ទៅថ្ងៃមុខព្រះករុណាព្រះមហាក្សត្រ និងសម្តេចម៉ែ នឹងលែងយាងចេញទៅកាន់ប្រទេសចិន ដើម្បីឱ្យក្រុមគ្រូពេទ្យចិនពិនិត្យព្រះរាជសុខភាពរបស់ព្រះអង្គទាំងទ្វេរៀងរាល់៦ខែម្តង ដូចពេលកន្លងមកទៀតហើយ ។
ប៉ុន្តែក៏មានការលើកឡើងដែរថា ក្នុងរាជរដ្ឋាភិបាលអាណត្តិថ្មីនេះបានបង្កើនការយកចិត្តទុកដាក់គិតគូរពីព្រះរាជសុខភាពរបស់ព្រះមហាក្សត្រ និងសម្តេចម៉ែ ហើយក៏ចង់បង្ហាញពីសមត្ថភាពរបស់ក្រុមគ្រូពេទ្យខ្មែរយើងសព្វថ្ងៃ គឺមានជំនាញ និងសមត្ថភាពមិនចាញ់គ្រូពេទ្យបរទេសក្នុងការពិនិត្យ និងព្យាបាលនោះទេ ។
ទន្ទឹមនឹងនេះ កាលពីសប្តាហ៍មុន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ត្រូវបានបញ្ជូនទៅសម្រាកព្យាបាលនៅក្នុងមន្ទីរពេទ្យកាល់ម៉ែត្រនេះរហូតដល់សម្តេចមានសុខភាពប្រសើរឡើង ដូចអ្វីដែលសម្តេច តេជោ ហ៊ុន សែន បានប្រកាសតាមបណ្តាញសង្គមរបស់សម្តេចជូនជនរួមជាតិជ្រាប ។
ជាការពិត ក្រុមគ្រូពេទ្យខ្មែរ ឆ្លងកាត់ការបណ្តុះបណ្តាល និងមានជំនាញពិនិត្យព្យាបាលមិនចាញ់ពេទ្យបរទេសនោះទេ ។ ពលរដ្ឋខ្មែរយើងមិនតិចលាននាក់ទេ ដែលទទួលការពិនិត្យព្យាបាលក្នុងស្រុក ។ ជាងនេះទៅទៀត ព្រឹត្តិការណ៍ថ្មីៗនេះអំឡុងពេលកូវីដ១៩ ឆ្លងរាតត្បាតចាប់ពីឆ្នាំ២០២០ រហូតដល់អំឡុងឆ្នាំ២០២១ ជាឧទាហរណ៍ជាក់ស្តែងដែលបង្ហាញពីសមត្ថភាពរបស់ក្រុមគ្រូពេទ្យខ្មែរយើង ។ ទាំងការទប់ស្កាត់ការឆ្លងរាលដាល និងទាំងការចាក់វ៉ាក់សាំងបង្ការជំងឺកូវីដ១៩ គឺកងទ័ពអាវសនេះហើយជាក្រុមជួរមុខប្រយុទ្ធប្រឆាំងនឹងមេរោគផ្លូវដង្ហើមដ៏កំណាច ។ នេះនិយាយពីស្ថានភាពលើសមរភូមិ ។
ចំណែកនៅក្នុងមន្ទីរពេទ្យវិញ កាលពីអំឡុងពេលបិទខ្ទប់កូវីដនោះ ពលរដ្ឋខ្មែរយើងស្ទើរតែទាំងអស់មិនអាចចេញក្រៅប្រទេស ដើម្បីទៅពិនិត្យព្យាបាលនៅក្រៅប្រទេសឡើយ ទោះជាអ្នកនោះមានលទ្ធភាព និងមានលុយកាក់សម្រាប់ចំណាយលើការចេញក្រៅ ដើម្បីជួបពេទ្យនៅសិង្ហបុរី នៅថៃ ឬក៏នៅវៀតណាម ក៏ដោយ ។ កាលណោះ មានតែក្រុមគ្រូពេទ្យខ្មែរយើងនេះហើយជាអ្នកពិនិត្យព្យាបាលមិនថា ជំងឺអ្វីនោះទេ ។
នៅមន្ទីរពេទ្យសប្បុរសធម៌ គន្ធបុប្ផា ដែលពិនិត្យព្យាបាលកុមារដោយមិនគិតថ្លៃ នៅប្រទេសកម្ពុជាយើងក៏មានគ្រូពេទ្យស្ទើរតែទាំងអស់ ជាជនជាតិខ្មែរយើង ដែលមានចំណេះ និងជំនាញរាប់ទាំងការវះកាត់ផងដែរ ។ កុមារកម្ពុជាយើង មិនតិចលាននាក់ទេដែលជាសះស្បើយ ក្រោយពីទទួលនូវការពិនិត្យព្យាបាល និងការវះកាត់ពីស្នាដៃរបស់វេជ្ជបណ្ឌិតខ្មែរយើងនៅក្នុងមន្ទីរពេទ្យគន្ធបុប្ផា ។
ក៏ប៉ុន្តែជាធម្មតាទេ វិជ្ជាជីវៈគ្រូពេទ្យប្រៀបដូចជា អាវុធមុខពីរដូចគ្នានឹងថ្នាំពេទ្យដែរ ។ ព្យាបាលអ្នកជំងឺ ពិសេសការវះកាត់ ក៏អាចមិនជោគជ័យ១០០ភាគរយ ដែលអាចនឹងមានអ្នកជំងឺខ្លះត្រូវបានគ្រូពេទ្យប្រឹងប្រែងអស់ពីសមត្ថភាពហើយ តែនៅតែមិនអាចជួយសង្គ្រោះបាន ។ តែក្នុងនាមជាគ្រូពេទ្យ ច្បាស់ណាស់ថា ពួកគាត់បានប្រឹងប្រែង និងប្រើជំនាញប្រកបដោយក្រមសីលធម៌ និងវិជ្ជាជីវៈរបស់ខ្លួនក្នុងការជួយសង្គ្រោះអ្នកជំងឺ ។
ទន្ទឹមនឹងនេះ ក្រុមគ្រូពេទ្យមួយចំនួនដែលធ្វើការងារច្រើន ហើយហត់នឿយ និងមានអារម្មណ៍មិនល្អជាមួយអ្នកជំងឺ ឬសាច់ញាតិអ្នកជំងឺតាមរយៈការប្រើប្រាស់ពាក្យសម្តី មិនល្អខ្លះនោះក៏ត្រូវបានគេលើកឡើងជាហូរហែ ។ ប៉ុន្តែក្រុមគ្រូពេទ្យយើង ក៏ត្រូវតែសម្រួលអារម្មណ៍ ហើយកែប្រែចំណុចខ្វះខាតនេះ ។ ធម្មតាទេនរណាក៏ដោយក៏មានការទទួលខុសត្រូវ និងធ្វើការរៀងៗខ្លួនតាមជំនាញ។ ដូច្នេះបើការងារច្រើនហត់នឿយ ត្រូវតែសម្រាក ហើយប្តូរអ្នកផ្សេងមកធ្វើជំនួសក្នុងឥរិយាបថសមរម្យ ដូចពាក្យចាស់ថា «ថោកអីនឹងដៃ ថ្លៃអីនឹងមាត់»។
ថ្នាក់ដឹកនាំមន្ទីរពេទ្យ ក៏សូមបន្តផ្សព្វផ្សាយ និងណែនាំដល់គ្រូពេទ្យឱ្យបន្តគោរពឱ្យបានខ្ជាប់ខ្ជួននូវសីលធម៌ និងវិជ្ជាជីវៈគ្រូពេទ្យ ។ ជាការពិតសព្វថ្ងៃនៅតាមមន្ទីរពេទ្យរដ្ឋបានកែលម្អច្រើនរួចមកហើយ ពិសេសបង្កើតឱ្យមានក្រុមអ្នកផ្តល់ព័ត៌មាន និងអ្នកនាំផ្លូវសម្រាប់អ្នកជំងឺមកសួរនាំរកកន្លែងពិនិត្យព្យាបាលតាមអាការៈជំងឺរបស់ខ្លួន ។
ការបន្ថយតម្លៃពិនិត្យព្យាបាល នៅតាមមន្ទីរពេទ្យរដ្ឋ រួមទាំងការគិតពីអាយុជីវិតអ្នកជំងឺជារឿងសំខាន់ជាងការតម្រូវឱ្យអ្នកជំងឺ និងក្រុមគ្រួសារអ្នកជំងឺត្រូវបង់លុយមុនពិនិត្យព្យាបាលក៏ត្រូវតែថ្នាក់ដឹកនាំដោះស្រាយ ខណៈដែលពេលនេះ ប្រជាពលរដ្ឋយើងកាន់តែច្រើន មានបណ្ណសមធម៌ ឬក៏បណ្ណក្រីក្រ ក៏ដូចជាអ្នកមានបណ្ណប.ស.ស ត្រូវបានពិនិត្យព្យាបាលជំងឺ ដោយមិនគិតថ្លៃ ។
ជាសរុបទៅ ការបង្កើតក្រុមគ្រូពេទ្យ ដើម្បីប្រចាំការពិនិត្យ និងថែទាំព្រះរាជសុខភាពថ្វាយព្រះមហាក្សត្រ និងសម្តេចម៉ែ ក៏ដូចជា វត្តមានរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញចូលពិនិត្យព្យាបាលជំងឺក្នុងមន្ទីរពេទ្យកាល់ម៉ែត្រ កាន់តែផ្តល់ទំនុកចិត្តបន្ថែមទៀតដល់ប្រជាពលរដ្ឋខ្មែរយើង ក្នុងការប្រើប្រាស់សេវាពិនិត្យព្យាបាល នៅមន្ទីរពេទ្យរបស់ខ្មែរយើង។
អ្នកធ្លាប់ចេញទៅពេទ្យនៅក្រៅប្រទេសខ្លះក៏គួរតែសាកល្បងចូលពេទ្យស្រុកយើងម្តងមើល ព្រោះអ្នកចេញទៅពេទ្យនៅវៀតណាម ថៃ និងនៅសិង្ហបុរី បានចំណាយលុយច្រើនក្នុងការធ្វើដំណើរស្នាក់នៅហូបចុក មុនចូលដល់មន្ទីរពេទ្យ។ តែដើម្បីឱ្យពលរដ្ឋខ្មែរយើងមានទំនុកចិត្ត ហើយកាន់តែមានទំនុកចិត្តលើពេទ្យក្នុងស្រុកកាន់តែច្រើនក៏ស្ថិតនៅលើក្រុមគ្រូពេទ្យរបស់យើង ជាតួអង្គសំខាន់ជាងណាៗទាំងអស់ ៕
ចែករំលែកព័តមាននេះ