រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា ប្រទេសនានា លើពិភពលោក…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា ប្រទេសនានា លើពិភពលោក បាននិងកំពុងទទួលរងឥទ្ធិពលពីជម្លោះភូមិសាស្ត្រនយោបាយ ការប្រជែងឥទ្ធិពល របស់មហាអំណាច និងបញ្ហាផ្សេងៗទៀត។
ថ្លែងក្នុងពិធីបិទសន្និបាត បូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា ព្រឹកថ្ងៃទី០៦ ខែកុម្ភៈ ឆ្នាំ២០២៤ នាទីស្តីការក្រសួង សម្តេចធិបតី បានវាយតម្លៃខ្ពស់ចំពោះសមិទ្ធផល ដែលក្រសួងមួយនេះសម្រេចបាន កាលពីឆ្នាំ២០២៣កន្លងទៅ ក្រោមកិច្ចសហការពីគ្រប់ភាគីពាក់ព័ន្ធ ក្នុងន័យកែលម្អវិស័យសង្គមកិច្ច អតីតយុទ្ធជន និងយុវនីតិសម្បទា សំដៅជម្រុញភាពធន់ នៃសេដ្ឋកិច្ចគ្រួសារ លើកកម្ពស់ជីវភាពប្រជាជន និងកាត់បន្ថយភាពក្រីក្រតាមរយៈ ការគាំពារគ្រួសារក្រីក្រ ក្រុមជនងាយរងគ្រោះក្នុងគ្រួសារក្រីក្រ និងគ្រួសារងាយរងហានិភ័យ នៅកម្ពុជា ។
សម្តេចធិបតីនាយករដ្ឋមន្ត្រី បានគូសបញ្ជាក់ថា ៖ «ជាការពិត កម្ពុជាក៏ដូចជាប្រទេសនានា នៅលើពិភពលោក បាននិងកំពុងទទួលរងឥទ្ធិពលពីជម្លោះភូមិសាស្ត្រនយោបាយ ការប្រជែងឥទ្ធិពលរបស់មហាអំណាច សង្គ្រាម ការប្រែប្រួលអាកាសធាតុ ជំងឺឆ្លង និងបញ្ហាផ្សេងៗ ទៀតជាច្រើន» ។
សម្តេចធិបតី បានបន្ថែមថា ជាបច្ច័យទាំងនេះ ព្រមទាំងស្ថានភាពរងគ្រោះ និងងាយរងគ្រោះដូចជាការសេពគ្រឿងញៀន ការជួញដូរមនុស្ស បញ្ហាជរាភាព និងពិការភាព ព្រមទាំងអំពើហិ.ង្សាក្នុងគ្រួសារ និងការរំលោភបំពានលើកកុមារ សុទ្ធតែជាបញ្ហា និងជាក្តីកង្វល់ របស់យើង ដែលរាជរដ្ឋាភិបាល ត្រូវយកចិត្តទុកដាក់ និងដោះស្រាយ ដើម្បីលើកស្ទួយជីវភាព និងសុខុមាលភាពរបស់ប្រជាជន សំដៅសម្រេចបាននូវចក្ខុវិស័យរបស់សម្តេចតេជោ ហ៊ុន សែន ក្នុងការប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ។
សម្តេចនាយករដ្ឋមន្ត្រី បានបន្តថា ជាមួយចក្ខុវិស័យ ដែលជាក្តីស្រមៃរបស់ប្រជាជនកម្ពុជាគ្រប់រូបរាជរដ្ឋាភិបាលនីតិកាលទី៧ និងបន្តបន្ទាប់ នៃរដ្ឋសភា ក្រោមការដឹកនាំរបស់គណបក្សប្រជាជន កម្ពុជា ប្តេជ្ញាបន្តអភិវឌ្ឍន៍ប្រព័ន្ធគាំពារសង្គមនៅព្រះរាជាណាចក្រកម្ពុជាឱ្យមាន លក្ខណៈប្រមូលផ្តុំ សង្គតិភាព ប្រសិទ្ធភាព សមធម៌ និងចីភាព ដោយឈរលើស្មារតី មិនបោះបង់ពលរដ្ឋណាម្នាក់ តាមរយៈការផ្តោតកិច្ចអន្តរាគមន៍របស់រាជរដ្ឋាភិបាលលើគ្រួសារក្រីក្រ ក្រុមជនងាយរងគ្រោះ និងគ្រួសារងាយរងហានិភ័យ ។
ជាមួយគ្នានោះដែរ សម្តេចធិបតី បានគូសបញ្ជាក់ថា គោលនយោបាយរបស់រាជរដ្ឋាភិបាល នៅគ្រប់អាណត្តិទាំងអស់ គឺធ្វើយ៉ាងណាឱ្យប្រទេសយើងបានរីកចំរើនតាម រយៈការធ្វើឱ្យប្រជាពលរដ្ឋរបស់យើងមានភាពរីកចំរើន កាត់បន្ថយភាពក្រីក្រ និងលើកកម្ពស់ជីវភាពរបស់យើង ។
ប្រមុខរាជរដ្ឋាភិបាល បានលើកឡើងថា ការដាក់ចេញ នូវនយោបាយឈ្នះឈ្នះ ដើម្បីបញ្ចប់សង្គ្រាមទទួលបាននូវសន្តិភាព និងការឯកភាពជាតិពេញលេញ គឺជាការបង្កើតនូវបរិស្ថានចាំបាច់ ដែលអាចឱ្យយើងអនុវត្តន៍ដោយជោគជ័យ នូវយុទ្ធសាស្ត្រត្រីកោណ និងយុទ្ធសាស្ត្របញ្ចកោណកន្លងទៅ ដោយភាពក្រីក្រ នៃប្រជាជនរបស់យើងត្រូវបានកាត់បន្ថយពីជាង ៥០% នៅឆ្នាំ១៩៩៧ មកត្រឹម ១៧% នៅឆ្នាំនេះ ដែលកើនបន្តិចនៅមុនកូវីដ-១៩ យើងមានទាបជាងនេះ។ កំណើនសេដ្ឋកិច្ចរបស់យើង មានប្រមាណ ៧% តាំងពីពេល ដែលយើងទទួលបានសន្តិភាពរហូតមកទល់ពេលផ្ទុះនូវជំងឺកូវីដ-១៩ បានន័យថា ជីវភាពរបស់យើងមានការរីកចំរើន អ្នកដែលធ្លាប់នៅក្រោមបន្ទាត់ នៃភាពក្រីក្របានក្លាយជាអ្នកដែលមានជីវភាពមធ្យម និងអ្នកដែលមានជីវភាព មធ្យមជាច្រើន បានវិវត្តន៍ទៅជាអ្នកមានជីវភាពខ្ពស់នៅក្នុងរយៈពេល ២០ឆ្នាំក្រោយពីការបិទបញ្ចប់ សង្គ្រាមនៅកម្ពុជា តែផ្ទុយទៅវិញវាជាការគួរឱ្យសោកស្តាយខ្លាំងណាស់ដែលជម្ងឺកូវីដ-១៩ បានចូលមកដល់ ប្រសិនបើគ្មានវាទេនោះមិនដឹងថាប្រទេសរបស់យើង ឈានដល់ណា ទៅហើយនោះទេ ៕
ចែករំលែកព័តមាននេះ