ខេត្តរតនគិរី ៖ រថយន្តមួយគ្រឿងដឹកគល់ធ្នង់ពកពេញប្រៀបតែម្ដង បម្រុងចេញទៅក្រៅប្រទេស តែត្រូវបានកម្លាំងកងរាជអាវុធហត្ថក្រុងបានលុង ស្ទាក់បង្ក្រាបចាប់បានភ្លាមៗហើយក៏ប្រគល់ឱ្យខណ្ឌរដ្ឋបាលព្រៃឈើខេត្តចាត់ការបន្ត ។ ការស្ទាក់ឃាត់បានរថយន្តនោះបាន កើតឡើងនៅយប់ថ្ងៃទី០២ ខែកុម្ភៈ…
ខេត្តរតនគិរី ៖ រថយន្តមួយគ្រឿងដឹកគល់ធ្នង់ពកពេញប្រៀបតែម្ដង បម្រុងចេញទៅក្រៅប្រទេស តែត្រូវបានកម្លាំងកងរាជអាវុធហត្ថក្រុងបានលុង ស្ទាក់បង្ក្រាបចាប់បានភ្លាមៗហើយក៏ប្រគល់ឱ្យខណ្ឌរដ្ឋបាលព្រៃឈើខេត្តចាត់ការបន្ត ។ ការស្ទាក់ឃាត់បានរថយន្តនោះបាន កើតឡើងនៅយប់ថ្ងៃទី០២ ខែកុម្ភៈ ឆ្នាំ២០២៤ ត្រង់ចំណុចមុខសាលាអន្ទេវសិកដ្ឋាន ក្នុងភូមិថ្មដា សង្កាត់បឹងកន្សែង ក្រុងបានលុងខេត្តរតនគិរី ។
តាមប្រភពបង្ហើបថារថយន្តដឹកគល់ធ្នង់នោះ បើកបរចេញពីភូមិសាស្ត្រស្រុកវើនសៃបោះពួយយ៉ាងលឿន តាមផ្លូវជាតិលេខ78A ឆ្លងកាត់ស្រុកអូរជុំ សំដៅចូលមកក្រុងបានលុង និងបន្តទៅមុខទៀតតែត្រូវកម្លាំងកងរាជអាវុធហត្ថបង្ក្រាបបានតែម្ដង ។ នៅក្នុងការបង្ក្រាបនោះដែរ គេឃើញឃាត់ខ្លួនបានទាំងអ្នកបើកបររថយន្ត និងព្រូឡានម្នាក់ផងដែរបញ្ជូនមកឱ្យជំនាញ ។
រថយន្តដែលដឹកបទល្មើសប្រភេទគល់ឈើពកធ្នង់ដ៏មានតម្លៃខាងលើនេះ កម្លាំងកងរាជអាវុធហត្ថ ក្រុងបានលុងបានឱ្យដឹងថា រថយន្តនោះម៉ាកកូរ៉េទម្ងន់៥តោន ពាក់ស្លាកលេខក្រុងព្រះសីហនុ 3A-3338 ។
ហើយការដឹកជញ្ជូននោះជាជើងទី៣ហើយដែលរថយន្តមួយគ្រឿងនេះ បានធ្វើសកម្មភាពល្មើសដោយលោតឆត្រដើម្បីយកទៅលក់នៅស្រុកវៀតណាម ប៉ុន្ដែលើកនេះក៏ត្រូវកម្លាំងយើងចាំស្ទាក់ចាប់បង្ក្រាប និងរឹបអូសយកឱ្យខាងតែបានតែម្ដង ។ ប្រភពផ្សេងទៀតសុំមិនបញ្ចេញឈ្មោះបានបង្ហើបថា ម្ចាស់ឈើពកធ្នង់ខាងលើនោះ គឺជាសមត្ថកិច្ចនគរបាលខេត្តម្នាក់និងម្នាក់ទៀតជាមន្ត្រីកងរាជអាវុធហត្ថនៅខេត្តរតនគិរីនេះឯង ដែលពួកគេបានទៅប្រមូលទិញនៅខាងស្រុកវ៉ើនសៃ ដើម្បីយកទៅធ្វើអាជីវកម្មមិនស្របច្បាប់ទៅក្រៅប្រទេស ។
ប្រភពដដែលបានបន្តបង្ហើបថា ឈ្មួញនៅក្រៅស្រុកបានប្រគល់កញ្ចប់ប្រាក់ឱ្យទៅមន្ត្រីកងរាជអាវុធហត្ថខេត្តម្នាក់ ជាអ្នកចាត់ចែងរត់ការផងដែរ តែដោយសារគេរត់ការនៅមានចន្លោះប្រហោង ទើបបែកការផ្តើមឱ្យមានការអាក់អន់ស្រពន់ចិត្តក៏ចាត់កម្លាំងក្រុងចុះបង្ក្រាបតែម្ដងទៅ ។
បច្ចុប្បន្ន វត្ថុតាងរួមមានគល់ឈើពកធ្នង់ និងមធ្យោបាយដឹកជញ្ជូនគឺរថយន្តកូរ៉េមួយគ្រឿង អ្នកបើកបរនិងព្រូម្នាក់ផងនោះកំពុងស្ថិតនៅក្នុងមន្ទីរកសិកម្មខេត្តរតនគិរីនៅឡើយ ។ ហើយមកដល់ពេលនេះជំនាញព្រៃឈើហាក់នៅមិនទាន់បានបើកកៅស៊ូតង់ដែលគ្របជិតនោះ ដើម្បីពិនិត្យឱ្យបង្ហាញមហាជនទូទៅឱ្យបានឃើញផងទេ ។
អ្នកបើកបរក៏អាចបម្លាស់ទីរថយន្ដនោះបានយ៉ាងងាយម្ដង ទៅចតខាងស្ដាំដៃម្ដងទៅខាងឆ្វេងនៃមន្ទីរកសិកម្មតាមអំពើចិត្តគេសង្ស័យមិនយូរមិនឆាប់របូតរលូតចេញទៅបាត់ហើយបន្ដដឹកជញ្ជូនដូចដើមវិញដដែលហើយ ព្រោះឈ្មួញឈើដឹងចិត្តដឹងថ្លើមដឹងដល់ប្រមាត់អ្នកចាប់ទៀតផង ។ បើគ្មានចោរលួចធំៗខុសច្បាប់ តើអញបានផលពីណា?…ហេ! ហេ!..នឹងហើយពួកអ្នកឯងរត់ការមិនស្មើគ្នា ។
ក្រុមអ្នកកាសែតសួរ លោកលី សុផាន នាយរងខណ្ឌរដ្ឋបាលព្រៃឈើខេត្តរតនគិរី តាមទូរសព្ទសុំបំភ្លឺលោកឆ្លើយយ៉ាងខ្លីថា មិនបានដោះលែងទេ គឺកំពុងបន្តនីតិវិធីតាមផ្លូវច្បាប់ គ្មានឈើអ្វីល្អទៀត មានតែគល់ឈើគ្រាក់(ខ្លឹម) ដែលជាឈើមានតម្លៃបំផុត សម្រាប់កែច្នៃធ្វើសង្ហារឹម ។
ព័ត៌មានបន្ថែមនឹងមានផ្សាយជូននៅលើកោះសន្តិភាព ។
ចែករំលែកព័តមាននេះ