ខេត្តស្វាយរៀង ៖ ប្រជាកសិកររស់នៅភូមិគោតែក ដែលមានដីស្រែ នៅតាមបន្ទាត់ព្រំដែន នៅពេលធ្វើស្រែប្រាំង គឺទិញទឹកពីប្រទេសវៀតណាម ដើម្បីបូមដាក់ស្រូវ ដោយប្រជាពលរដ្ឋលើកឡើងថា នៅខែប្រាំង នៅតំបន់គោកតែក គឺខ្វះប្រភពទឹក ហើយប្រឡាយគោកអស់ទឹក ដូច្នេះត្រូវទិញទឹកពីប្រទេសវៀតណាម ។
ប្រជាពលរដ្ឋ បានលើកឡើងបែបនេះ កាលពីរសៀលថ្ងៃទី០២ ខែកុម្ភៈ ឆ្នាំ២០២៤ នៅចំណុចច្រករបៀងព្រំដែនគោកតែក ស្ថិតនៅភូមិគោកតែក ឃុំចន្ទ្រា ស្រុកចន្ទ្រា ។
ប្រជាពលរដ្ឋ លើកឡើងថា ប្រជាកសិករខ្មែរយើង ធ្វើស្រែប្រាំង ក្នុង១ឆ្នាំ០២ដង ហើយត្រូវទិញទឹកពីប្រទេសវៀណាម ក្នុង១ហិកតា ជាមធ្យមតម្លៃ១លាន៥សែនដុង ស្មើលុយខ្មែរជាង២០ម៉ឺនរៀល ដោយគិតចាប់ផ្តើមពីពេល ភ្ជួររាស់ ព្រោះស្រូវ រហូតទទួលផលច្រូតកាត់ ដូច្នេះ២ដង ត្រូវចំណាយប្រាក់ ៥០ម៉ឺនរៀល ។
ប្រជាពលរដ្ឋ បានលើកឡើងទៀតថា ខ្មែរយើង ធ្វើស្រែប្រាំង បានតែ២ដងទេ ក្នុងមួយឆ្នាំ រីឯវៀតណាមគេធ្វើបានច្រើនដង ដោយគេមានប្រភពទឹកគ្រប់គ្រាន់ មានប្រព័ន្ធធារាសាស្ត្រត្រឹមត្រូវ អាចទាញទឹកស្រោចស្រប់ស្រែ បានគ្រប់រដូវ ចំណែកខ្មែរយើងនៅភូមិគោកតែក ខ្វះប្រភពទឹក ដូច្នេះដីស្រែមួយចំនួន ត្រូវទុកចោល ដោយខែប្រាំងនេះ ប្រឈមការខ្វះទឹកដាក់ស្រែ។
ប្រជាពលរដ្ឋដដែល លើកឡើងបន្ដែមថា ហើយការទិញទឹកពីប្រទេសវៀតណាមយកមកធ្វើស្រែនេះ គឺទិញរាល់ឆ្នាំ ដោយយើងខ្វះប្រព័ន្ធធារាសាស្ត្រ មានប្រឡាយ ក៏ប៉ុន្តែខែប្រាំង រីងទឹកអស់ ពីប្រឡាយ ។
ប្រជាពលរដ្ឋ បន្តទៀតថា តាមព្រំដែនបច្ចុប្បន្ន មានការអភិវឌ្ឍន៍ ខ្សែក្រវ៉ាត់ព្រំដែន នៅភាគខាងលិច នៅស្រុកកំពង់រោទ៌ និងស្រុកស្វាយជ្រំ គេមានប្រភពទឹក តាមព្រដែន ប្រភពទឹកពីទន្លេវ៉ៃគោ បឹង នៅសហរុកចន្ទ្រា មានបឹងមាន អូរ មានព្រែក ដែរ ក៏ប៉ុន្តែ ត្រូវបានគេលក់ឲ្យឯកជន កាន់កាប់គ្រប់គ្រង។ ភូមិគោកតែក ខ្វះទឹកទាញទឹក មកប្រើប្រាស់មិនបាន បើបុកអណ្តូងទឹកមានជាតិជូរ ប្រើប្រាស់លើដំណាំស្រូវអត់កើត ។
ប្រជាពលរដ្ឋ អោយដឹងទៀតថា ទោះបីជាយ៉ាងណាក៏ដោយ ប្រជាកសិកររស់នៅជិតព្រំដែន នៅមានសំណាងដែរ អាចទិញទឹកពីប្រទេសវៀតណាម ធូរថ្លៃអាចទទួលយកបាន។ ហើយស្រូវមានតម្លៃខ្ពស់ លក់ឲ្យវៀតណាម ក្នុង១គីឡូក្រាម តម្លៃ១,៣០០រៀល ប្រាក់ខ្មែរ អាចផ្គត់ផ្គង់ជីវភាពបានល្អប្រសើរ ។
ប្រជាពលរដ្ឋ ក៏បានបញ្ជាក់ដែរថា ឃុំចន្ទ្រា ជាតំបន់ចំពុះទា មានសក្តានុពល នាបច្ចុប្បន្ន បើពីមុន គ្មានអ្នកណាចង់មករស់នៅទេគ្រាន់តែឮថា ព្រំដែន ក៏ប៉ុន្តែរាជរដ្ឋាភិបាល បានអភិវឌ្ឍន៍ខ្សែក្រវ៉ាត់ព្រដែន និងហេដ្ឋារចនាសម្ពន្ធ័ ពីភូមិឃុំរហូតដល់ព្រំដែន ដូច្នេះព្រំដែន ភូមិគោកតែក និងក្លាយជាតំបន់សេដ្ឋកិច្ច នៅពេលអនាគត់ ៕
ចែករំលែកព័តមាននេះ