ខេត្តស្វាយរៀង ៖ យ៉ាងហោចណាស់ សាច់បង្កកចំនួន១០២តោន និង៦០០គីឡូក្រាម ដែលឈ្មួញដឹកពីប្រទេសវៀតណាម ឆ្លងដែនចូលមកកម្ពុជា ចំនួន០៤រថយន្តកុងតឺន័រ បម្រុងដឹកឆ្ពោះទៅរាជធានីភ្នំពេញនោះ ត្រូវបានសមត្ថកិច្ច…
ខេត្តស្វាយរៀង ៖ យ៉ាងហោចណាស់ សាច់បង្កកចំនួន១០២តោន និង៦០០គីឡូក្រាម ដែលឈ្មួញដឹកពីប្រទេសវៀតណាម ឆ្លងដែនចូលមកកម្ពុជា ចំនួន០៤រថយន្តកុងតឺន័រ បម្រុងដឹកឆ្ពោះទៅរាជធានីភ្នំពេញនោះ ត្រូវបានសមត្ថកិច្ច នាំយកទៅទម្លាក់ទុកក្នុងរណ្ដៅ ត្រៀមដុតបំផ្លាញចោល នៅថ្ងៃស្អែកនេះ ។
សមត្ថកិច្ចដឹកយកមកទម្លាក់ទុកក្នុងរណ្ដៅនេះ ធ្វើកើតឡើងនៅវេលាម៉ោង៩និង០០នាទីព្រឹក ថ្ងៃទី០៣ ខែកុម្ភៈ ឆ្នាំ២០២៤ នៅចំណុចទីលានចាក់សំរាម ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ។ ហើតនឹងដុតកម្ទេចចោលនៅព្រឹកថ្ងៃស្អែកនេះ ។
បើតាមមន្ត្រីក.ប.ប សាខាខេត្តស្វាយរៀង បានឲ្យអ្នកសារព័ត៌មានយើងថា សាច់បង្កក ប្រភេទជើងមាន់ ដែលសមត្ថកិច្ចបង្ក្រាបបាន ចំនួន០៤រថយន្តកុងតឺន័រនេះ ស្មើ១០២,៦០០គីឡូក្រាម នឹងត្រូវយកមកទម្លាក់នៅទីលានចាក់សំរាម ត្រៀមធ្វើពិធីដុតកម្ទេចចោលនៅព្រឹកថ្ងៃទី៤ ខែកុម្ភៈ ស្អែកនេះហើយ ។
ប្រភពបង្ហើបឲ្យដឹងថា សាច់បង្កក ០៤រថយន្តកុងតឺន័រនេះ ដឹកពីប្រទេសវៀតណាម ចូលមកតាមក្រុងបាវិត ដោយគ្មានលិខិតអនុញ្ញាត ពីស្ថាបន័សមត្ថកិច្ចជំនាញ ហើយជាពិសេស ក្រោយពីពិនិត្យគុណភាព គឺឃើញថា ការដាក់ក្នុងទូបង្កកសីតណ្ហភាពមិនគ្រប់តាមស្តង់ដា (-)១២អង្សាសេក្រោមសូន្យ ទេ! គឺបានត្រឹមតែ(-២)អង្សាសេ ទៅ(-)៤អស្សាសេ តែប៉ុណ្ណោះ។ ហើយរយៈពេល០៣ថ្ងៃ មិនឃើញម្ចាស់ក្រុមហ៊ុនណាម្នាក់ ដែលនាំសាច់បង្កកចូលនោះ មកដោះស្រាយឡើយ ទើបក្រុមការងារសម្រេចដុតកម្ទេចចោល តែម្តង ។
សូមរំលឹកថា សមត្ថកិច្ចជំនាញ(ក.ប.ប) ខេត្តស្វាយរៀង សហការជាមួយកម្លាំងកងរាជអាវុធហត្ថខេត្ត និងមន្ត្រីសាខាគយ និងរដ្ឋាករខេត្តស្វាយរៀង ស្ទាក់ឃាត់រថយន្តកុងតឺន័រ ចំនួន០៤គ្រឿង ដែលសង្ស័យដឹកបទល្មើសកាលពីវេលាម៉ោង០៥និង៤០នាទីល្ងាចថ្ងៃទី៣១ ខែមករា ឆ្នាំ២០២៤ នៅលើកំណាត់ផ្លូវជាតិលេខ១៣ ស្ថិតក្នុងភូមិអកនាគ សង្កាត់សង្ឃ័រ ក្រុងស្វាយរៀង ។
សមត្ថកិច្ច បានបង្ហើបនាពេលនោះថា មានគេរាយការណ៍ថា មានរថយន្តកុងតឺន័រដឹកសាច់បង្កក ចំនួន០៤កុងតឺន័រ បានធ្វើចរាចរណ៍ ចេញពីក្រុងបាវិត តាមផ្លូវជាតិលេខ១ មកដល់ចំណុចផ្លូវបំបែកជាបួន ក្នុងភូមិបាក់រនាស់ ក្រុងស្វាយរៀង រួចបត់ស្តាំឆ្ពោះទៅទិសខាងជើង លើកំណាត់ផ្លូវជាតិលេខ១៣ លុះមកដល់ចំណុចភូមិអកនាគ សង្កាត់សង្ឃ័រ ក្រុងស្វាយរៀង ទើបសមត្ថកិច្ចឃាត់សួរនាំ ពិនិត្យឃើញថា រថយន្តកុងតឺន័រទាំង០៤គ្រឿង ដឹកសាច់បង្កក ពិតប្រាកដមែន ។
ប្រភពបន្តទៀតថា ក្រោយពីមន្ត្រីជំនាញ ឃាត់រថយន្តទាំង០៤គ្រឿងនោះ ដោយមានការសម្របសម្រួលពីលោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង បានកាត់ស៊ីលបើកទូរកុងតឺន័រ ពិនិត្យបានរកឃើញជើងមាន់បង្កកជាច្រើនពាន់កេះ ក្នុងទូកុងតឺន័រ។
ប្រភពបន្តទៀតថា សមត្ថកិច្ចបានឃាត់ខ្លួនអ្នកបើកបរចំនួន ៤នាក់ រួមមាន ៖
ទី១-ឈ្មោះ ផាត ជាតិ បើកកុងតឺន័រ លេខ SZLU9415762(40) ដែលមានស្លាកលេខ ភ្នំពេញ 3E-7413 ។
ទី២-ឈ្មោះ មុំ សូត្រ បើកកុងតឺន័រលេខ HMMU5490786(40) ស្លាកលេខភ្នំពេញ 3F-0648 ។
ទី៣-ឈ្មោះ សោម រិទ្ធី បើកកុងតឺន័រលេខ SZLU9430540(40) ពាក់ស្លាកលេខភ្នំពេញ 3F-9610។
ទី៤-ឈ្មោះ សេង សុវណ្ណដេត បើកបរកុងតឺន័រលេខ HDMU5591398(40) ពាក់ស្លាកលេខភ្នំពេញ 3B-6322 ។
បើតាមចម្លើយសារភាព អ្នកបើកបររថយន្ត បានបញ្ជាក់ប្រាប់ថា ទំនិញសាច់បង្កកទាំងអស់នេះ គឺបាននាំចូលពីប្រទេសវៀតណាម ឆ្លងដែនចូលមកចំណុចសូន្យ នៃច្រកទ្វាព្រំដែនអន្តរជាតិក្រុងបាវិត រួចហើយបានផ្ទេរទូកុងតឺន័រ នៅចំណុចសូន្យមកកាន់កម្ពុជា តាមមាត់ច្រកទ្វាព្រំដែនអន្តជាតិបាវិត ហើយដឹកទៅមាត់ច្រកទ្វារតំបន់ព្រំដែនដូង ស្រុករមាសហែក ។ ហើយទំនិញទាំងអស់នេះ គឺជារបស់ក្រុមហ៊ុន SBL ដែលមានទីតាំងនៅក្រុងបាវិត ។
បើតាមការអះអាងរបស់ឈ្មោះ ពេញ សារ៉េត ម្ចាស់ឡានកុងតឺន័រ ភេទប្រុស អាយុ៤០ឆ្នាំ មានអស័យដ្ឋាននៅចោមចៅ រាជធានីភ្នំពេញ បានប្រាប់សមត្ថកិច្ចថា ទំនិញទាំង០៤កុងតឺន័រ មិនបានដាក់ឯកសារ ដឹកទំនិញ មកជាមួយទេ ហើយរថយន្តនេះ គឺមានទិសដៅទៅច្រកដូងបន្តទៀត (ចំណុចនេះ មហាជនហួសចិត្ត ចេះឆ្លើយទៅរួចថា ដឹកសាច់បង្កកចេញពីវៀតណាមចូលមកខ្មែរ ហើយដឹកចូលទៅវៀតណាមវិញ) ។
បើតាមលោកប្រធានសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការខ្លែងបន្លំ(ក.ប.ប) ខេត្តស្វាយរៀង បានឲ្យដឹងថា នៅវេលាម៉ោង២២និង១៥នាទីយប់ថ្ងៃទី៣១ ខែមករា មន្ត្រីក.ប.ប និងមន្ត្រីពាក់ពន្ធ័ បានកាត់ស៊ីលកុងតឺន័រ ទាំង០៤គ្រឿង មកត្រួតពិនិត្យ ជាលទ្ធផល ៖
១.កុងតឺន័រលេខ SZLU9430540(40) មានសីតណ្ហភាព -៥អង្សាសេ (ធៀបនឹងស្តង់ដា-១២អង្សាសេ) ។
២.កុងតឺន័រលេខ SZLU9415762 (40) មានសីតណ្ណហភាព -២.៩អស្សាសេ (បើធៀបនឹងស្តង់ដា-១២អង្សាសេ) ។
៣.កុងតឺន័រលេខ HMMU5490786(40) មានសីតណ្ហភាព -៦-៤ អង្សាសេ (ធៀបនឹងស្តង់ដា-១២អង្សាសេ) ។
៤.កុងតឺន័រលេខ HDMU5591398(40) មានសីតណ្ណហភាព -២.៥អង្សាសេ (ធៀបនឹងស្តង់ដា-១២អស្សាសេ) ។
ប្រភពបន្តថា ក្រោយពីបានធ្វើការពិសោធន៍ ដោយរថយន្តចល័តរួចមក ជាលទ្ធផលសំណាកជើងមាន់ ដែលបានដកចេញពីទូកុងតឺន័រទាំង០៤នេះ ឃើញថា ពុំមានសារធាតុគីមីហាមឃាត់ FORMALIN នោះទេ ។
ពាក់ព័ន្ធនឹងករណីនេះ លោក ហៀង ដារ៉ា ប្រធាន (ក.ប.ប) ខេត្តស្វាយរៀង បានផ្តល់ព័ត៌មានថា សាច់បង្កក(ជើងមាន់) ចំនួនជាង១០២តោននេះ ត្រៀមដុតកម្ទេចចោល នៅថ្ងៃស្អែកទី០៤ ខែកុម្ភៈ ស្អែកនេះ ។ ចំណែកឯអ្នកបើកបររថយន្តទាំង៤នាក់ និងបុរសម្នាក់ដែលអះអាងខ្លួនថា ជាម្ចាស់រថយន្តកុងតឺន័រទាំង៤គ្រឿងនោះ ត្រូវបានសមត្ថកិច្ចឃាត់ខ្លួន ព្រមទាំងរថយន្តយកទៅបញ្ជាការដ្ឋានកងរាជអាវុធហត្ថខេត្តស្វាយរៀង ដើម្បីរងចាំធ្វើការដោះស្រាយ នៅពេលក្រោយ ៕
ចែករំលែកព័តមាននេះ