ខេត្តស្ទឹងត្រែង ៖ ឈើប្រណីតប្រភេទបេងនិងគ្រញូងដែលគេស្តុកទុកនៅមាត់កំពង់ស្តៅស្ថិតក្នុងភូមិស្តៅ ឃុំស្តៅ ស្រុកសេសាន បម្រុងដឹកចេញមកកាន់ទីរួមខេត្តបានត្រូវកម្លាំងជំនាញរដ្ឋបាលព្រៃឈើខេត្ត សហការជាមួយកម្លាំងស្រុកសេសាន ចុះបង្ក្រាបកាលពីវេលាម៉ោង៥ល្ងាច ថ្ងៃទី២៨ ឧសភា
ខេត្តស្ទឹងត្រែង ៖ ឈើប្រណីតប្រភេទបេងនិងគ្រញូងដែលគេស្តុកទុកនៅមាត់កំពង់ស្តៅស្ថិតក្នុងភូមិស្តៅ ឃុំស្តៅ ស្រុកសេសាន បម្រុងដឹកចេញមកកាន់ទីរួមខេត្តបានត្រូវកម្លាំងជំនាញរដ្ឋបាលព្រៃឈើខេត្ត សហការជាមួយកម្លាំងស្រុកសេសាន ចុះបង្ក្រាបកាលពីវេលាម៉ោង៥ល្ងាច ថ្ងៃទី២៨ ឧសភា។
លោកលី គន នាយផ្នែករដ្ឋបាលព្រៃឈើខេត្តបានឱ្យដឹងថា ក្នុងការចុះបង្ក្រាបនេះ ឈើប្រភេទបេង និង គ្រញូងត្រូវបានរឹបអូសយកមករក្សាទុកនៅខណ្ឌរដ្ឋបាលព្រៃឈើតែមិនទាន់បានវាស់វែងនៅឡើយទេ ព្រោះជាប់ភារកិច្ចចុះវាស់ឈើក្នុងក្រុមហ៊ុនបង់ពន្ធចូលរដ្ឋសិន ហើយនឹងធ្វើការវាស់វែងបន្ទាប់ពីនេះ ។
ប្រភពព័ត៌មានពីមន្ត្រីរដ្ឋបាលព្រៃឈើមួយរូបទៀតបានឱ្យដឹងថា ឈើទាំងនេះ គឺឈ្មួញប្រមូលទិញពីតំបន់នានាក្នុងភូមិសាស្ត្រស្រុកសៀមប៉ាង នៅត្រើយខាងកើតទន្លេ រួចបញ្ជូនមកត្រើយខាងលិចដើម្បីដាក់រថយន្តដឹកចូលទីរួមខេត្តដោយលួចលាក់ ក្នុងនោះមានឈើបេងអារជាសន្លឹកប្រវែង២ម៉ែត្រ២តឹក ដាក់ទូកមកទម្លាក់នៅមាត់កំពង់ត្រៀមដាក់រថយន្ត និងឈើគ្រញូងមួយគំនរទៀតមានចំនួន៣៦ដុំ ក៏ត្រូវប្រមូលយកមកខណ្ឌ រដ្ឋបាលព្រៃឈើខេត្តដែរ។ ចំណែកម្ចាស់ឈើពេលកម្លាំងចុះបង្ក្រាបបានគេចខ្លួនបាត់អស់។
ដោយឡែកប្រភពព័ត៌មានពីកំពង់ចម្លងស្តៅនិយាយថា ឈើបេងដែលត្រូវរដ្ឋបាលព្រៃឈើចាប់រឹបអូសនេះមានចំនួន៣ម៉ែត្រគូប ព្រោះទូកដែលដាក់នេះអាចផ្ទុកបានតែប៉ុណ្ណឹង នេះបើតាមធ្លាប់ដឹកកន្លងមកតែនេះគ្រាន់តែជាព័ត៌មានក្រៅផ្លូវការប៉ុណ្ណោះ រង់ចាំធ្វើការវាស់វែងសិន ទើបដឹងច្បាស់ពិតប្រាកដ ។ ឈើប្រណីតទាំងនេះត្រូវបានរក្សាទុកនៅក្នុងខណ្ឌរដ្ឋបាលព្រៃឈើខេត្តរង់ចាំធ្វើការវាស់វែងត្រឹមត្រូវនិងចុះកំណត់ហេតុ៕
ចែករំលែកព័តមាននេះ