រាជធានីភ្នំពេញ ៖ សាលាដំបូងរាជធានីនៅថ្ងៃទី៣០ ឧសភា នេះបាននិងសម្រេចធ្វើការឃុំខ្លួនបុរសម្នាក់ អតីតប្រធានផ្នែកគ្រប់គ្រងសម្ភាររោងចក្រភីភីអឹម ជារោងចក្រផលិតឱសថ ស្ថិតនៅភូមិព្រៃជី សង្កាត់ចោមចៅ ខណ្ឌដង្កោ ដែលមានគំនិតប៉ុនប៉ងធ្វើសកម្មភាពដុតរោងចក្រចំនួន៣ដង តែមិនបានសម្រេច ព្រោះតែរឿងច្រណែនឈ្នានីសនឹងប្រាក់ខែ
រាជធានីភ្នំពេញ ៖ សាលាដំបូងរាជធានីនៅថ្ងៃទី៣០ ឧសភា នេះបាននិងសម្រេចធ្វើការឃុំខ្លួនបុរសម្នាក់ អតីតប្រធានផ្នែកគ្រប់គ្រងសម្ភាររោងចក្រភីភីអឹម ជារោងចក្រផលិតឱសថ ស្ថិតនៅភូមិព្រៃជី សង្កាត់ចោមចៅ ខណ្ឌដង្កោ ដែលមានគំនិតប៉ុនប៉ងធ្វើសកម្មភាពដុតរោងចក្រចំនួន៣ដង តែមិនបានសម្រេច ព្រោះតែរឿងច្រណែនឈ្នានីសនឹងប្រាក់ខែ ។ ជនសង្ស័យដែលសាលាដំបូងសម្រេចឃុំខ្លួននេះ ឈ្មោះញូង ចំណាន អាយុ២១ឆ្នាំ ស្នាក់នៅផ្ទះលេខ៤៨Eo ផ្លូវលេខ១០១៩ សង្កាត់ភ្នំពេញថ្មី ខណ្ឌសែនសុខ មុខរបរជាប្រធានផ្នែកគ្រប់គ្រងសម្ភាររោងចក្រភីភីអឹម នោះតែម្តង។
ទាក់ទិននឹងការឃុំខ្លួនជនសង្ស័យខាងលើនេះ លោកវរសេនីយ៍ឯកប៉ុល រតនា អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃបានឱ្យដឹងថា ឈ្មោះញូង ចំណាន មានគំនិតប៉ុនប៉ងដុតរោងចក្រភីភីអឹម ចំនួន៣លើកមកហើយ តែទាំង៣លើកនេះអគ្គិភ័យមិនបានឆេះទាំងស្រុងទេ ពោលគឺមានអន្តរាគមន៍ទាន់ពេលវេលា ។ លោកប៉ុល រតនា បានបន្តថា រោងចក្រភីភីអឹម ផលិតឱសថត្រូវជនមិនស្គាល់មុខប៉ុនប៉ងដុតកម្ទេចចំនួន៣លើក គឺលើកទី១-នៅថ្ងៃទី២៣ ឧសភា ២០១១ លើកទី២-នៅថ្ងៃទី២៤ ឧសភា និងលើកទី៣-នៅថ្ងៃទី២៦ ឧសភា ២០១១ ។
ក្រោយពីរោងចក្រត្រូវរងនូវការដុតបំផ្លាញនោះ អ្នកគ្រប់គ្រងរោងចក្រក៏ដូចជាមេធាវីការពារផលប្រយោជន៍ក្រុមហ៊ុនបានដាក់ពាក្យបណ្តឹងទៅកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ចំណាត់ការយ៉ាងឱ្យមានប្រសិទ្ធភាព។ លោកឧត្តមសេនីយ៍ឯកម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ដាក់ផែនការទៅលោកអ៊ិន បូរ៉ា ប្រធាននាយកដ្ឋាននគរបាលព្រហ្មទណ្ឌឱ្យចាត់ការលើពាក្យបណ្តឹងនេះជាបន្ទាន់ ។ បន្ទាប់ពីមានការឯកភាពរបស់លោកឧត្តមសេនីយ៍ទោ ប្រធាននាយកដ្ឋានរួចហើយ លោកប៉ុល រតនា បានប្រើប្រាស់កម្លាំងជំនាញឱ្យទៅប្រមូលបុគ្គលិក-កម្មកររោងចក្រ ប្រមាណជាង២០នាក់ ក្នុងនោះមានឈ្មោះញូង ចំណាន ម្នាក់ផង ដើម្បីសាកសួរ និងមានការយល់ព្រមពីតំណាងអយ្យការផងដែរ ។ តាមព័ត៌មានពីលោកប៉ុល រតនា បានឱ្យដឹងថា ក្រោយពីសាកសួរ និងបានចាក់រូបភាពវីដេអូ ដែលដាក់បង្កប់នៅក្នុងរោងចក្រ បានពិនិត្យឃើញថា ក្នុងនោះមានបង្ហាញពីសកម្មភាពទាំងឡាយរបស់ជនជាប់ពាក់ព័ន្ធ និងមិនពាក់ព័ន្ធក្នុងការដុតបំផ្លាញរោងចក្រផលិតឱសថ ។
ពិតណាស់ ទាំងចម្លើយសារភាព ទាំងសកម្មភាពក្នុងវីដេអូដែលជាប់រូបភាព បានឱ្យសមត្ថកិច្ចកំណត់មុខសញ្ញាតែម្នាក់គត់ ធ្វើសកម្មភាពដុតរោងចក្រ គឺឈ្មោះញូង ចំណាន នេះ ហើយក៏មិនខុសពីចម្លើយសារភាពរបស់ឈ្មោះញូង ចំណាន ថា គេប៉ុនប៉ងដុតរោងចក្រ ក៏ព្រោះតែប្រណែនទៅនឹងប្រាក់ខែ ដែលខ្លួនទទួលបានត្រឹម៨០ទៅ៩០ដុល្លារប៉ុណ្ណោះក្នុង១ខែ។ ដោយឡែកមិត្តគេម្នាក់ទៀតតួនាទីជាប្រធានផ្នែកដែលទទួលបានប្រាក់ខែ រហូតដល់ទៅជាង៣០០ដុល្លារ គឺវាខុសគ្នាឆ្ងាយពេក ។
ប្រការនេះហើយបានជាគេប៉ុនប៉ងដុតរោងចក្រ ដើម្បីព្រមានថៅកែកុំឱ្យជិះជាន់កម្លាំងពលកម្មគេខ្លាំងពេក ។ ទោះជាយ៉ាងណាក្តី ឈ្មោះញូង ចំណាន ត្រូវបានតុលាការរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្នរង់ចាំការស៊ើបអង្កេតបន្ត និងឈានទៅបើកសវនាការផ្តន្ទាទោសតាមផ្លូវច្បាប់។ រីឯមនុស្សជាង២០នាក់មានបុរស-នារី អនុញ្ញាតឱ្យវិលត្រឡប់ទៅធ្វើការជាធម្មតាវិញ ៕
ចែករំលែកព័តមាននេះ