ខេត្តមណ្ឌលគិរី ៖ តាមសេចក្ដីរាយការណ៍បឋមឱ្យដឹងថា កាលពីថ្ងៃទី៣១ ខែមករា ឆ្នាំ២០២៣ ស្ត្រីជាម្ដាយ និងបុរសជាគូដណ្ដឹងបានទៅប្តឹងសមត្ថកិច្ចនគរបាលមូលដ្ឋាន ករណីបាត់កូនក្រមុំជន​ជាតិព្នងម្នាក់ ខណៈនាងបានចេញពីផ្ទះ ដើម្បីដើររកក្របីនៅវាល​ស្រែ ។

កូនក្រមុំ​ដែលបាត់ខ្លួន១រូបនោះឈ្មោះ ខ្វិន យូ អាយុ១៦​ឆ្នាំ ​ជាជនជាតិព្នង មុខរបរកសិករ រស់នៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ។

តាមការបំភ្លឺពីម្ដាយ និងគូដណ្ដឹងរបស់​នាងក្រមុំ​ដែលបាត់ខ្លួន បាន​ឱ្យដឹងថា មុនពេលកើតហេតុ កូនស្រីរបស់គាត់បានចេញទៅឃ្វាល​ក្របី​កាលពីថ្ងៃទី៣០ ខែមករា ឆ្នាំ២០២៤ វេលាម៉ោងប្រហែល​១២ និង៣០​នាទីថ្ងៃត្រង់ បានប្រាប់គាត់ជាម្ដាយថា ម៉ែបាត់ក្របីហើយ ។ ស្រាប់តែនាងបានជិះម៉ូតូ១ គ្រឿង ម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ មណ្ឌលគិរី 1A-4787 ដើម្បីចេញទៅរកក្របី ។

ស្ត្រីជាម្តាយបានបន្ត​ថា លុះពេលនាងចេញទៅបាត់មួយថ្ងៃ រហូតដល់ម៉ោង៦ព្រឹកថ្ងៃទី៣១ ខែមករា ឆ្នាំ២០២៤ នៅមិនទាន់ឃើញកូន​ស្រីគាត់ត្រឡប់មកផ្ទះវិញ គាត់ក៏ប្រញាប់ប្រញាល់ទូរស័ព្ទទាក់ ទងបងប្អូនសាច់ញាតិ និងដើរសួរតាមផ្ទះអ្នកស្រុក ឱ្យជួយរក ប៉ុន្តែមិនមានដំណឹងសោះ ។

ស្ត្រីជាម្តាយបានបន្តទៀត​ថា ដោយហេតុតែបាត់កូនក្រមុំពេញមួយយប់មួយថ្ងៃនោះហើយ ទើបគាត់ជាម្ដាយ និងគូដណ្ដឹងរបស់នាងក្រមុំ សម្រេចចិត្តទៅដាក់បណ្ដឹងនៅសមត្ថកិច្ច្ នៃអធិការដ្ឋាននគរបាលស្រុកអូររាំង ដើម្បីឱ្យជួយអន្តរាគមន៍ និងស្វែងរកស្រី ដែលបាត់ខ្លួនមិនដឹងមូលហេតុអ្វីនោះ ៕