រាជធានីភ្នំពេញ ៖ សាលាដំបូងរាជធានីភ្នំពេញ កាលពីថ្ងៃទី២៩ មករា បានចេញសេចក្ដីប្រកាស ស្ដីពីការផ្តន្ទាទោសលើជនជាប់​ចោទ២​នាក់ ពាក់ព័ន្ធករណីជួញដូរគ្រឿងញៀ.ន ដែលមានទម្ងន់ជិត៣ គីឡូក្រាម ដាក់ពន្ធនាគារម្នាក់មួយជីវិត ។

យោងតាមសេច​ក្ដីប្រកាសព័ត៌មានរបស់សាលាដំបូងរាជធានីភ្នំពេញ បានឱ្យដឹងថា ជនជាប់ចោទ២ នាក់ ក្នុងនោះម្នាក់ឈ្មោះ ឆៃ អារ៉ារ៉ា ភេទប្រុស អាយុ​៣៣​ឆ្នាំ និងម្នាក់ទៀតឈ្មោះ យឹម យីម៉េង ភេទប្រុស អាយុ៣៥​ឆ្នាំ ត្រូវបានផ្តន្ទាទោសដាក់ពន្ធនាគារម្នាក់មួយជីវិត និងពិន័យជាប្រាក់ចូលថវិការដ្ឋចំនួន ៥០.០០០.០០០ រៀល ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀ.ន តាមមាត្រា៤០ នៃច្បាប់ស្ដីពីការត្រួតពិនិត្យគ្រឿងញៀ.ន ដែលប្រព្រឹត្តនៅចំណុចផ្ទះជួលលេខ៣០អូ ផ្លូវលេខ២៦៥ ក្រុមទី៤២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ កាលពីថ្ងៃទី០១ ខែ វិច្ឆិកា ឆ្នាំ២០២២ កន្លងទៅនេះ ។

សូមជម្រាបថា កាលថ្ងៃទី១២ ខែមករា ឆ្នាំ២០២៤ ក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានបើកសវនាការជំនុំជម្រះ សំណុំរឿងពាក់ព័ន្ធរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀ.ន ដែលសមត្ថកិច្ចចាប់ខ្លួនជនសង្ស័យ២នាក់ និងបានដកហូតវត្ថុតាងសារធាតុញៀនទម្ងន់ ២.៨៩៤,៣៥​ក្រាម ។ ពេលពិនិត្យភស្តុតាង និងលទ្ធផលកោសល្យវិច័យរបស់អាជ្ញាធរជាតិប្រយុទ្ធប្រឆាំងគ្រឿងញៀ.ន បានបញ្ជាក់ថា ជាគ្រឿងញៀ.នប្រភេទក្រាមម្សៅថ្លា មេតំហ្វេតាមីន ដែលមានកម្រិតភាពសុទ្ធ ៧២,០២% ៕