រាជធានីភ្នំពេញ ៖ បុគ្គលិកក្រុមហ៊ុនឯកជនម្នាក់បានស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង៦ល្ងាច ថ្ងៃទី២៨ ឧសភា ឆ្នាំ២០១១ នៅមុខសាលាបឋមសិក្សារកូលាបទី១ វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ បន្ទាប់ពីជនរងគ្រោះជិះម៉ូតូប៉ះដៃចង្កូតជាមួយម៉ូតូមួយគ្រឿងទៀតបណ្តាលឲ្យដួលកណ្តាលថ្នល់ហើយត្រូវរថយន្តកិនចំក្បាល ។
អ្នករត់ម៉ូតូឌុបម្នាក់ដែលឃើញហេតុការណ៍បានឲ្យដឹងថា មុនពេលកើតហេតុជនរងគ្រោះជិះម៉ូតូមួយគ្រឿងធុនសេ១២៥ ស៊េរី២០១០ ពណ៌ខ្មៅ មានគ្នាពីរនាក់ធ្វើដំណើរលើកំណាត់វិថីព្រះស៊ីសុវត្ថិមកពីទិសខាងជើង លុះមកដល់មុខសាលាបឋមសិក្សាកូលាបទីមួយ ស្រាប់តែមានម៉ូតូម៉ាកឃ្លីកបើកបញ្រ្ចាសទិសគ្នា ហើយប៉ះដៃចង្កូតម៉ូតូជនរងគ្រោះ បណ្តាលឲ្យម៉ូតូដួលកណ្តាលថ្នល់។ ស្របពេលនោះ មានរថយន្តកូរ៉េមួយគ្រឿងដែលបើកមកពីក្រោយបានកិនចំក្បាលបុរសរងគ្រោះ បណ្តាលឲ្យស្លាប់ភ្លាមៗនៅនឹងកន្លែងយ៉ាងអាណោចអាធ័ម។ ក្រោយពីដឹងថារថយន្តកិនមនុស្សស្លាប់ អ្នកបើករថយន្តកូរ៉េមិនបានឈប់ទេ គឺបន្ថែមល្បឿនបើកគេចទៅបាត់នៅសល់តែម៉ូតូពីរគ្រឿងនៅកន្លែងកើតហេតុ និងសពជនរងគ្រោះ ។
សមត្ថកិច្ចឲ្យដឹងថា ជនរងគ្រោះដែលរថយន្តកិនធ្លាយខួរមើលទៅគួរឲ្យស្រៀវសាច់នេះ ត្រូវគេស្គាល់ថា ឈ្មោះយ៉េត សំអាង ភេទប្រុស អាយុ២៧ឆ្នាំ ស្រុកកំណើតនៅខេត្តកំពង់ចាម ជាបុគ្គលិកក្រុមហ៊ុនអាយ ស៊ី អឹម ស្នាក់នៅសង្កាត់គីឡូម៉ែត្រលេខ៦ ខណ្ឌឫស្សីកែវ។ នៅកន្លែងកើតហេតុ បន្សល់ទុកម៉ូតូពីរគ្រឿងដែលមួយគ្រឿងធុនសេ១២៥ ស៊េរី២០១០ ពណ៌ខ្មៅ ពាក់ស្លាកលេខកំពត 1AM-1927 និងមួយគ្រឿងទៀតម៉ាកឃ្លីកពាក់ស្លាកលេខភ្នំពេញ 1AC-5633 ។ ម៉ូតូទាំង២គ្រឿង ត្រូវបានយកទៅរក្សាទុកនៅការិយាល័យនគរបាលចរាចរផ្លូវគោកដើម្បីធ្វើការដោះស្រាយ ៕
ចែករំលែកព័តមាននេះ