សាលក្រមប្រកាសផ្តន្ទាទោសវីល្លៀម គ័ង ដាក់ពន្ធនាគារ៦ឆ្នាំ
- ភ្នំពេញ
រាជធានីភ្នំពេញ ៖ អតីតមេបក្សខ្មែរក្រោក លោកសុខ សុវណ្ណវឌ្ឍនាសាប៊ុង ហៅ William Guang ដែលជាមេខ្លោង ដឹកនាំប្លន់ផ្ទះអ្នកលក់ឡេល្បីឈ្មោះ…
រាជធានីភ្នំពេញ ៖ អតីតមេបក្សខ្មែរក្រោក លោកសុខ សុវណ្ណវឌ្ឍនាសាប៊ុង ហៅ William Guang ដែលជាមេខ្លោង ដឹកនាំប្លន់ផ្ទះអ្នកលក់ឡេល្បីឈ្មោះ ( ឧកញ៉ាអ៊ាន សៀវម៉ី ) កាលពីអំឡុងចុងឆ្នាំ ២០២១ កន្លងទៅនោះ ត្រូវបានសាលាដំបូងរាជធានីភ្នំពេញ ប្រកាសសាលក្រមផ្ដន្ទាទោស កាលពីរសៀលថ្ងៃទី២៩ មករា ឆ្នាំ២០២៤ នេះ ពាក់ព័ន្ធទៅនឹងករណីស្ទាក់ប្លន់ម្ចាស់បុរីម៉នដានី នៅឯខេត្តកំពង់ស្ពឺ មិនបានសម្រេច ។
សាលក្រមបានធ្វើឡើងជាសាធារណៈ ដោយមានលោកស្រីឈុន ដាវី ជាប្រធានក្រុមប្រឹក្សាជំនុំជម្រះ លោកចៅក្រមធាម ច័ន្ទពិសិដ្ឋ និងលោកចៅក្រម កេត សុជាតិ ជាចៅក្រមប្រឹក្សា និងមានវត្តមានលោក សានសុភៈ ជាតំណាងអយ្យការ នៅចំពោះមុខជនជាប់ចោទ៤នាក់ ដែលមានអតីតមេបក្សខ្មែរក្រោក ឈ្មោះសុខ សុវណ្ណវឌ្ឍនាសាប៊ុង ជាប់ចោទពីបទ.ប៉ុនប៉ងលួចមានស្ថានទម្ងន់ទោស និងកាន់កាប់អាវុធ ដោយគ្មានការអនុញ្ញាត ប្រព្រឹត្តនៅផ្លូវជាតិលេខ៣ ស្រុកគងពិសី ខេត្តកំពង់ស្ពឺ កាលពីអំឡុងខែវិច្ឆិកា ឆ្នាំ ២០២១ ។
សាលក្រមសម្រេចផ្ដន្ទាទោសលើជនជាប់ចោទ ៖
១-ឈ្មោះ សុខ សុវណ្ណវឌ្ឍនាសាប៊ុង ភេទប្រុស អាយុ៤៤ឆ្នាំ ហៅសុខ សុវណ្ណវឌ្ឍនាសាប៊ុង ហៅវីល្លៀម គ័ង ដាក់ពន្ធនាគារកំណត់៦ឆ្នាំ ។ ២-ឈ្មោះគេច ម៉ាច ហៅអាតឿ ភេទប្រុស អាយុ២៦ឆ្នាំ ដាក់ពន្ធនាគារកំណត់៤ឆ្នាំ ។ ៣-ឈ្មោះ អោរ៉ា ម៉ន ភេទប្រុស អាយុ៣៧ឆ្នាំ ដាក់ពន្ធនាគារកំណត់៥ឆ្នាំ ។ ៤-ឈ្មោះសុវណ្ណ រ៉ានុត ភេទប្រុស អាយុ២៦ឆ្នាំ ដាក់ពន្ធនាគារកំណត់៥ឆ្នាំ ។
សូមជម្រាបថា កាលពីថ្ងៃទី០២ ខែសីហា ឆ្នាំ២០២២ លោកស្រី ឈុន ដាវី ប្រធានក្រុមប្រឹក្សាជំនុំជម្រះ បានប្រកាសសាលក្រមផ្តន្ទាទោសជនជាប់ចោទខាងលើម្តងរួចមក ហើយក្នុងសំណុំរឿងប្លន់ផ្ទះឧកញ៉ាអ៊ាន សៀវម៉ី ដែលជាអ្នកលក់ផលិតផលតាមអនឡាញ ។
សំណុំរឿងនោះ ត្រូវបានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោសជនជាប់ចោទមេខ្លោង និងបក្សពួកក្រុមចោរប្លន់ចំនួន៧នាក់ មានឈ្មោះសុខ សុវណ្ណវឌ្ឍ នាសាប៊ុង ហៅវិល្លាមគ័ង ភេទប្រុស អាយុ៤៤ឆ្នាំ ( ជាមេខ្លោង ) ដាក់ពន្ធនាគារកំណត់៩ឆ្នាំបក្សពួក ជាបុរសចំនួន៤នាក់ ម្នាក់ៗដាក់ពន្ធនាគារកំណត់៨ឆ្នាំ និងស្ត្រី២នាក់ ម្នាក់ៗដាក់ពន្ធនាគារកំណត់៦ឆ្នាំ ពីបទសមគំនិតលួចមានស្ថានទម្ងន់ទោស និងពីបទប្រើប្រាស់ឯកសារសាធារណៈក្លែង ។
ចំណែកបុរសម្នាក់ទៀតឈ្មោះម៉ាច ដែលបានរត់គេចខ្លួនត្រូវបានតុលាការចេញដីកាបង្គាប់ឱ្យតាមចាប់ខ្លួន យកមកអនុវត្តទោសក្នុងពន្ធនាគារកំណត់៦ឆ្នាំ ។ សាលក្រមដដែលបានសម្រេចឱ្យក្រុមនេះ រួមគ្នាសង ទៅដើមបណ្តឹងចំនួន៥០ម៉ឺនដុល្លារអាមេរិក និងសងសំណងជំងឺចិត្តចំនួន២០០លានរៀលទៀតផង ។
សូមរំលឹកទៀតថា ក្រោយពេលចាប់ឃាត់ខ្លួន ដោយកម្លាំងសមត្តកិច្ចកងរាជអាវុធហត្ថរាជធានីភ្នំពេញ ពាក់ព័ន្ធនឹងករណីដឹកនាំបក្សពួកចូលផ្ទះអ្នកលក់ឡេអនឡាញដ៏ល្បីម្នាក់ ( ឧកញ៉ាអ៊ាន សៀវ ម៉ី ) ដោយ បន្លំខ្លួនថា ជាសមត្ថកិច្ចក្រសួងចុះមកអនុវត្តដីកា រួចក៏ធ្វើសកម្មភាពភ្ជង់ប្លន់ប្រមូលយកទ្រព្យសម្បត្តិ គ្រឿងអលង្ការមានតម្លៃជាច្រើន កាលពីវេលាម៉ោង១០ និង៥០នាទីព្រឹកថ្ងៃ ទី១៩ ខែធ្នូ ឆ្នាំ ២០២១ នៅ ចំណុចផ្ទះវីឡាលេខV01 ស្ថិតក្នុងភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យរួចមក មេចោរ ប្លន់ William Guang បានសារភាពថា កន្លងមក ពួកខ្លួនបានធ្វើសកម្មភាពប្លន់ចំនួន២លើក ។
ក្នុងនោះ លើកទី ១-នៅថ្ងៃទី២៥ ខែវិច្ឆិកា ឆ្នាំ២០២១ បានធ្វើសកម្មភាពប្លន់ម្ចាស់បុរីម៉នដានី នៅស្រុក គងពិសី ខេត្តកំពង់ស្ពឺ តែមិនបានសម្រេច ព្រោះនៅថ្ងៃធ្វើសកម្មភាព ស្រាប់តែជនរងគ្រោះមិនបានជិះនៅ ក្នុងរថយន្តដែលពួកខ្លួនបាស្ទាក់ប្លន់ ហើយពួកគេក៏ក្លែងធ្វើជាសួរនាំក្នុងនាម សមត្ថកិច្ចខណៈពេលនោះខ្លួនមិនបានចូលរួមទេ គឺឱ្យតែកូនចៅ៥នាក់អាវុធវែង១ដើម អាវុធខ្លី២ដើម និងក្លែងឯកសណ្ឋានសមត្ថកិច្ច ចុះទៅធ្វើសកម្មភាព ។
លើកទី២-នៅថ្ងៃទី១៩ ខែធ្នូ ឆ្នាំ២០២១ ខ្លួនបានប្រើរូបភាពដូចលើកទី១ដែរ គឺក្លែងឯកសណ្ឋានសមត្ថកិច្ច និងក្លែងដីកាបង្គាប់ឱ្យនាំខ្លួនចុះទៅធ្វើសកម្មភាពប្លន់យកទ្រព្យសម្បត្តិនៅផ្ទះ អ្នកលក់ឡេអនឡាញ ឈ្មោះអ៊ា ន សៀវ ម៉ី បានសម្រេចហើយគេចខ្លួនបានត្រឹមតែមួយយប់ ក៏ត្រូវបាន អាវុធហត្ថរាជធានីភ្នំពេញ ក្រោមការដឹកនាំបញ្ជាផ្ទាល់ ពីសំណាក់ លោកឧត្តមសេនីយ៍ឯក រ័ត្ន
ស្រ៊ា ង មេបញ្ជាការរង អាវុធហត្ថលើផ្ទៃប្រទេសនិងជាមេបញ្ជាការអាវុធហត្ថរាជធានីភ្នំពេញចុះបង្ក្រាប ៕
ចែករំលែកព័តមាននេះ