ឈើអារលេខ១ ប្រភេទសុក្រំ ចំនួន២០កំណាត់ ដែលមានមុខកាត់ធំៗ ត្រូវក្រុមឈ្មួញលាក់ទុកក្នុងព្រៃចម្ការចេកនោះ ត្រូវបានកម្លាំងរដ្ឋបាលព្រៃឈើប្រទះឃើញ និងដកហូតយកទៅរក្សាទុកនៅផ្នែករដ្ឋបាលព្រៃឈើស្រុករវៀង
ខេត្តព្រះវិហារ ៖ ឈើអារលេខ១ ប្រភេទសុក្រំ ចំនួន២០កំណាត់ ដែលមានមុខកាត់ធំៗ ត្រូវក្រុមឈ្មួញលាក់ទុកក្នុងព្រៃចម្ការចេកនោះ ត្រូវបានកម្លាំងរដ្ឋបាលព្រៃឈើប្រទះឃើញ និងដកហូតយកទៅរក្សាទុកនៅផ្នែករដ្ឋបាលព្រៃឈើស្រុករវៀង ដើម្បីធ្វើកំណត់ហេតុចាត់ការបន្តតាមនីតិវិធីច្បាប់ព្រៃឈើ ។ ចាប់បានតែឈើដែលគេកា.ប់ និងអាររួចរាល់ អត់ចាប់បានមនុស្សទេ សង្ស័យតេ មានអ្នកលួ.ចប្រាប់ទេដឹង?
ការបង្ក្រាប និងការដកហូតនោះ រួមមានកម្លាំងរដ្ឋបាលព្រៃឈើរវៀង ដឹកនាំដោយលោក ស៊ុំ សុវុត្ថា នាយផ្នែករដ្ឋបាលព្រៃឈើរវៀង និងលោក ធី រតនៈ សហការជាមួយលោក យឹម វាសនា និងលោក ឃឿន សុធារ័ត្ន និងមន្ត្រីខណ្ឌរដ្ឋបាលព្រៃឈើខេត្តព្រះវិហារ លោក សម ប្រុស បានធ្វើឡើងកាលពីវេលាម៉ោង៤និង៣៥នាទីរសៀល ថ្ងៃទី២៦ ខែមករា ឆ្នាំ២០២៤ នៅត្រង់ចំណុចភូមិឈ្នួន ឃុំរួសរាន់ ស្រុករវៀង ខេត្តព្រះវិហារ ។
ប្រភពពីកម្លាំងជំនាញ បានប្រាប់ឱ្យដឹងថា ឈើដែលដកហូតបាននោះ គឺជាឈើអារលេខ១ ប្រភេទសុក្រំ ចំនួន២០កំណាត់ ដែលមានមុខកាត់២៥សង្ទីម៉ែត្រ ប្រវែង២,៥ម៉ែត្រទៅ៣ម៉ែត្រ ដែលបានដាក់ការសង្ស័យថា គឺជាឈើក្រុមឈ្មួញមុខដដែលៗ យកមកលាក់ទុកក្នុងព្រៃចម្ការចេក និងដឹកចេញបន្តទៅលក់ឱ្យឈ្មួញខាងក្រៅ ហើយក៏ត្រូវបានកម្លាំងជំនាញប្រទះឃើញធ្វើការរឹបអូសតែម្ដង ។
ពាក់ព័ន្ធក្នុងការដកហូតឈើខាងលើនេះ ក៏មានការចូលរួមពីលោកមេឃុំរួសរាន់ មេភូមិឈ្នួន និងប្រជាការពារកម្លាំងប៉ុស្តិ៍រដ្ឋបាលឃុំរួសរាន់ផងដែរ ។ ចំណែកវត្ថុតាងទាំងនោះ ត្រូវបានយកមកថែរក្សាទុកនៅផ្នែករដ្ឋបាលព្រៃឈើស្រុករវៀង ដើម្បីកសាងសំណុំរឿងចាត់ការទៅតាមច្បាប់ព្រៃឈើ៕
ចែករំលែកព័តមាននេះ