ខេត្តកំពង់ស្ពឺ ៖ បុរស២នាក់បានរបួសធ្ងន់ ម្នាក់បែកមុខមាត់ និងម្នាក់ទៀតរងរបួសជើងម្ខាងដោយសារក្រុមកុងត្រូលជជុះឃាត់រ៉ឺម៉កម៉ូតូដឹកធ្យូងជំរិតទារលុយពុំបាន ។ ហេតុការណ៍នេះត្រូវបានមន្ត្រីប៉ូលិសស្រុកសំរោងទង ឱ្យដឹងថា អ្នកបើករ៉ឺម៉កម៉ូតូដឹកធ្យូងចំនួន២នាក់បានរងរបួសធ្ងន់ធ្ងរ បង្កឡើងដោយជន៤នាក់ដែលអះអាងថា
ខេត្តកំពង់ស្ពឺ ៖ បុរស២នាក់បានរបួសធ្ងន់ ម្នាក់បែកមុខមាត់ និងម្នាក់ទៀតរងរបួសជើងម្ខាងដោយសារក្រុមកុងត្រូលជជុះឃាត់រ៉ឺម៉កម៉ូតូដឹកធ្យូងជំរិតទារលុយពុំបាន ។ ហេតុការណ៍នេះត្រូវបានមន្ត្រីប៉ូលិសស្រុកសំរោងទង ឱ្យដឹងថា អ្នកបើករ៉ឺម៉កម៉ូតូដឹកធ្យូងចំនួន២នាក់បានរងរបួសធ្ងន់ធ្ងរ បង្កឡើងដោយជន៤នាក់ដែលអះអាងថាជាប៉េអឹមឃាត់ទារលុយជនរងគ្រោះនៅតាមផ្លូវលេខ៤៤ពីទីរួមខេត្តកំពង់ស្ពឺទៅឱរ៉ាល់ ពេលទារលុយពុំបានក៏វាយនិងបាញ់អ្នកបើករ៉ឺម៉កម៉ូតូឱ្យរងរបួស ។ អ្នកបើករ៉ឺម៉កម៉ូតូរងគ្រោះទាំង២នាក់ម្នាក់ឈ្មោះម៉េង បូរ៉ា ភេទប្រុស អាយុ១៩ឆ្នាំ និងម្នាក់ទៀតឈ្មោះចន្ធី ភេទប្រុស អាយុ២១ឆ្នាំ មានទីលំនៅភូមិត្រពាំងអូល ឃុំព្នាយ ស្រុកសំរោងទង ។
មន្ត្រីប៉ូលិសស្រុកដដែលបានបន្តថា អ្នកបើករ៉ឺម៉កម៉ូតូទាំងពីរនាក់នេះដឹកធ្យូងពីស្រុកឱរ៉ាល់ មកទីរួមខេត្តកំពង់ស្ពឺ ពេលមកដល់ចំណុចភ្នំកូនលោក ឃុំទំពារមាស ស្រុកសំរោងទង នៅម៉ោង៦និង៤០នាទីយប់ ថ្ងៃទី២៧ ឧសភា ក៏ត្រូវបុរសម្នាក់ស្ថិតក្នុងសម្លៀកបំពាក់យោធាបានស្ទាក់ពីមុខឱ្យឈប់ ។ តែដោយរ៉ឺម៉កម៉ូតូជ្រុលហួសបន្តិច ព្រោះផ្ទុកធ្យូងធ្ងន់ ធ្វើឱ្យជនស្លៀកពាក់យោធានោះខឹងក៏វាយនិងដាល់អ្នកបើករ៉ឺម៉កម៉ូតូតែម្តង បណ្តាលឱ្យរងរបួសប៉ោងមុខប៉ោងមាត់យ៉ាងដំណំ ។
ជនរងគ្រោះឈ្មោះម៉េង បូរ៉ា ដែលរងរបួសកំពុងសម្រាកព្យាបាលនៅក្នុងមន្ទីរពេទ្យបង្អែកខេត្ត និយាយថា ពេលបុរសនោះវាយខ្លួនហើយក៏ដើរចូលប៉ុស្តិ៍របស់គេវិញ ឯខ្លួនក៏បើករ៉ឺម៉កម៉ូតូបន្តដំណើរមកកាន់ទិសផ្សារកំពង់ស្ពឺទៀត ។ ពេលមកដល់លើខ្នងទំនប់អូរគគីរ ស្ថិតក្នុងឃុំតាំងក្រូច ក៏មានរថយន្តមួយគ្រឿងនិងម៉ូតូមួយគ្រឿងបើកតាមមកឃាត់ខ្លួនឱ្យឈប់ដោយពួកគេមានគ្នា៤នាក់ ។ ដោយខ្លាចទទួលរងការវាយដំទៀត ខ្លួននិងឈ្មោះចន្ធី បានចុះរត់ទៅផ្ទះលក់បាយលើខ្នងទំនប់ តែត្រូវពួកគេតាមវាយពួកខ្លួនថែមទៀត ។ ចំណែកឈ្មោះចន្ធី ត្រូវក្រុមកុងត្រូលជជុះនោះដេញវាយនិងបាញ់ដោយកាំភ្លើងខ្លីមួយគ្រាប់ត្រូវចំស្មងជើងបណ្តាលឱ្យបាក់ជើងម្ខាងផងដែរ ហើយក្រោយពេលកើតហេតុពួកខ្លួនត្រូវបានដឹកបញ្ជូនមកកាន់មន្ទីរពេទ្យ ។ ជនរងគ្រោះឈ្មោះម៉េង បូរ៉ា បាននិយាយថា ក្នុងចំណាមជនទាំង៤នាក់នោះមានម្នាក់ស្លៀកពាក់ឯកសណ្ឋានយោធា និង៣នាក់ទៀតស្លៀកពាក់ស៊ីវិល ។ ឈ្មោះចន្ធីត្រូវជនម្នាក់ស្លៀកពាក់ស៊ីវិលបាញ់បណ្តាលឱ្យបាក់ជើងម្ខាងត្រូវបានបញ្ជូនទៅកាន់មន្ទីរពេទ្យព្រះកុសុមៈ ដោយសាររងរបួសធ្ងន់ធ្ងរ ចំណែកខ្លួនសម្រាកព្យាបាលនៅមន្ទីរពេទ្យបង្អែកខេត្ត ។
គេពុំទាន់ដឹងថា ក្រុមជនបង្ករបួសស្នាមនោះជាប៉េអឹមឬយោធាឬយ៉ាងណានោះទេ បើតាមអ្នករងរបួសប្រាប់ថា រាល់លើកពួកគាត់ដឹកធ្យូងឆ្លងកាត់តាមផ្លូវលេខ៤៤ នេះមានកុងត្រូលជជុះជាច្រើនដាក់ពេលយប់ជម្រិតទារលុយពួកគាត់តែពេលថ្ងៃរលាយអស់។ ដូច្នេះសូមអាជ្ញាធរខេត្តនិងមន្ត្រីមានសមត្ថកិច្ចជួយធ្វើអន្តរាគមន៍ផង ព្រោះពួកនេះបន្លំពាក់ស្បែកខ្លា ដើម្បីផលប្រយោជន៍ខ្លួនប៉ុណ្ណោះ ។
នៅព្រឹកថ្ងៃទី២៨ ឧសភា ការសាកសួរទៅបញ្ជាការដ្ឋានកងរាជអាវុធហត្ថខេត្ត និងប៉ូលិសខេត្តទទួលបានការបដិសេធថា ពុំមានកម្លាំងឈរជើងទារលុយពីអ្នកបើករ៉ឺម៉កទេ តែទោះបីយ៉ាងណា ករណីនេះសមត្ថកិច្ចនឹងធ្វើការស្រាវជ្រាវដើម្បីរកមុខសញ្ញាក្រុមជនដៃដល់ដើម្បីចាប់ខ្លួនយកមកផ្តន្ទាទោស ៕
ចែករំលែកព័តមាននេះ