ខេត្តកណ្តាល ៖ សាកសពបុរសម្នាក់ដែលមានស្ថានភាពហើមស្ទើររលួយទៅហើយ អាយុប្រហែល៥០ឆ្នាំ បានអណ្តែតតាមទឹកទន្លេបាសាក់ មកទើរជាប់នៅក្បែរមាត់ច្រាំងត្រើយខាងលិចក្នុងភូមិលេខ១ ឃុំស្វាយរលំ ស្រុកស្អាង ហើយត្រូវបានប្រជាពលរដ្ឋប្រទះឃើញកាលពីវេលាម៉ោង១១ព្រឹក ថ្ងៃទី២៨ ឧសភា និងបានរាយការណ៍ទៅសមត្ថកិច្ច
ខេត្តកណ្តាល ៖ សាកសពបុរសម្នាក់ដែលមានស្ថានភាពហើមស្ទើររលួយទៅហើយ អាយុប្រហែល៥០ឆ្នាំ បានអណ្តែតតាមទឹកទន្លេបាសាក់ មកទើរជាប់នៅក្បែរមាត់ច្រាំងត្រើយខាងលិចក្នុងភូមិលេខ១ ឃុំស្វាយរលំ ស្រុកស្អាង ហើយត្រូវបានប្រជាពលរដ្ឋប្រទះឃើញកាលពីវេលាម៉ោង១១ព្រឹក ថ្ងៃទី២៨ ឧសភា និងបានរាយការណ៍ទៅសមត្ថកិច្ច និងអាជ្ញាធរមូលដ្ឋានចុះទៅពិនិត្យ។
លោកសំ រ៉ាន់ នាយការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលខេត្ត ដែលចុះទៅពិនិត្យសាកសពបានឱ្យដឹងថា សាកសពជនរងគ្រោះមិនមានស្លាកស្នាមណាមួយបញ្ជាក់ថា បានស្លាប់ដោយអំពើឃាតកម្មទេ តែអាចបណ្តាលមកពីលង់ទឹក។ ជនរងគ្រោះមិនត្រូវបានគេស្គាល់អត្តសញ្ញាណឡើយមានអាយុប្រហែលជាង៥០ឆ្នាំ កម្ពស់១,៥៥ម៉ែត្រ សក់ខ្លីល្បាយអាចម៍ខ្លា ពាក់អាវពណ៌សដៃខ្លី ស្លៀកខោជើងវែងពណ៌ ខ្មៅ ចង្កេះកៅស៊ូ មានស្លៀកខោក្នុងជើងខ្លីពណ៌ខ្មៅ ចង្កេះកៅស៊ូ រាងស្គមស្តើង សម្បុរសណ្តែកបាយ។ បើតាមការសន្និដ្ឋាន ជនរងគ្រោះអាចស្លាប់ដោយសារលង់ទឹកទន្លេរយៈពេល៤ទៅ៥ថ្ងៃមកហើយ ព្រោះសាកសពហើមប៉ោងរលួយសាច់។ លោកសំ រ៉ាន់ បានឱ្យដឹងទៀតថា ក្រោយពីពិនិត្យនិងធ្វើកោសល្យវិច័យរួច សាកសពត្រូវបានប្រគល់ទៅឱ្យប៉ូលិសស្រុកស្អាង និងអាជ្ញាធរឃុំស្វាយរលំ ដើម្បីរកទីតាំងបញ្ចុះឱ្យបានសមរម្យក្រែងមានសាច់ញាតិមករក។
ដោយឡែកលោកម៉ាំង ពេច អធិការនគរបាលស្រុកស្អាងបានឱ្យដឹងថា សាកសពបុរសនេះត្រូវបានដឹកតាមរថយន្តសាមុយរបស់ស្នងការដ្ឋាននគរបាលខេត្តយកទៅបូជានៅវត្តឈូងលៀប ឃុំរកាខ្ពស់ ស្រុកស្អាង ដើម្បីរក្សាទុកធាតុក្រែងលោមានក្រុមគ្រួសារសាច់ញាតិមកទទួលយក គឺមិនបានបញ្ចុះទេ ។ លោកក៏បានអំពាវនាវដល់ប្រជាពលរដ្ឋដែលមានបាត់សមាជិកក្នុងគ្រួសារមានភិនភាគដូចខាងលើ សូមមកទាក់ទងជាមួយអាជ្ញាធរមូលដ្ឋាន ឬមកកាន់វត្តឈូងលៀប ដើម្បីទទួលយកធាតុរបស់ជនរងគ្រោះ ៕
ចែករំលែកព័តមាននេះ