រឿងសុរា! ប្រធានបទក្តៅពាក់ព័ន្ធគ្រោះថ្នាក់ចរាចរណ៍ តោះមកដឹងដើមកំណើតទឹករីករាយ ឬសុរា(ស្រា)
រាជធានីភ្នំពេញ ៖ រយៈពេលប៉ុន្មានខែចុងក្រោយនេះ មានករណីគ្រោះថ្នាក់ចរាចរណ៍រន្ធ.ត់ជាច្រើន
រាជធានីភ្នំពេញ ៖ រយៈពេលប៉ុន្មានខែចុងក្រោយនេះ មានករណីគ្រោះថ្នាក់ចរាចរណ៍រន្ធ.ត់ជាច្រើន
រាជធានីភ្នំពេញ ៖ រយៈពេលប៉ុន្មានខែចុងក្រោយនេះ មានករណីគ្រោះថ្នាក់ចរាចរណ៍រន្ធ.ត់ជាច្រើនបានកើតឡើង រួមមានការបុក-រត់ និង ការបុករៈ បណ្តាលឱ្យមានមនុស្សជាច្រើនបានបាត់បង់ជីវិតយ៉ាងអណោធអធម៌លើដងផ្លូវ ដែលភាគច្រើនគឺបណ្តាលមកពីជនបង្កត្រូវបានរកឃើញថាផឹកគ្រឿងស្រវឹង ឬស្រា ជាដើម។ រហូតមហាជនបានស្នើឱ្យបន្ធូរដៃក្នុងការផ្សព្វផ្សាយគ្រឿងស្រវឹង ក៏ដូចជាការរឹតបណ្តឹងការត្រួតពិនិត្យដោយសមត្ថកិច្ច។
ងាកមករឿងគ្រឿងស្រវឹង ឬហៅថាសុរា ឬស្រានេះ ថាតើសុរា មានដើមកំណើតកើតនៅទីណា ប្រទេសណា ? អ្នកបង្កើតស្រាឈ្មោះអ្វី? សម្ដេចព្រះព្រហ្មរតនមុនី ពិន សែម សិរីសុវណ្ណោ បានមានថេរដីកាថា អាត្មាសូមលើកយកវត្ថុនិទានយកមកសម្តែងប្រាប់ រឿងសុរានេះកើតនៅនគរពារាណសី ប្រទេសឥណ្ឌា ក្នុងនគរពារាណសីនឹងមានព្រានព្រៃម្នាក់ ឈ្មោះសុរៈព្រាន គាត់ជាអ្នកបរបាញ់សត្វក្នុងព្រៃ ។ គាត់ធ្វើដំណើរទៅក្នុងព្រៃ ដើរបរបាញ់សត្វ ។
ព្រះអង្គមានសង្ឃដីកាបន្តថា ពេលមួយនោះ គាត់ធ្វើដំណើរដើររុកក្នុងព្រៃ ក៏ឃើញដើមជ្រៃមួយដើមធំ បែកមែកសាខា មានអាយុរាប់រាយឆ្នាំ ជាជ្រៃកាល់ ដល់តែដើមជ្រៃធំអញ្ចឹង វាពុកដើម ហើយកណ្តាលមែកសាខានឹងវាពុកអស់ទៅ វាកើតហៅថាព្រង់ ឬហៅថាល្អាងធម្មជាតិនឹង ។
សម្ដេចព្រះព្រហ្មរតនមុនី ពិន សែម សិរីសុវណ្ណោ បានមានថេរដីកាបន្តថា ក្នុងព្រង់ដើមជ្រៃនោះ មានផ្លែជ្រៃទុំជ្រុះធ្លាក់ចូលទៅក្នុងព្រង់ជ្រៃនោះ រួចមានសត្វបក្សាបក្សី និងសត្វសេកជាដើម បានពាំនាំផ្លែឈើមកបរិភោគ ដូចជាស្រូវសាលីអីជាដើមនឹង ឬក៏ផ្លែទំពាំងបាយជូរ ដែលវាពាំបានយកមកបរិភោគនៅកន្លែងនឹង រួចហើយស្រូវនោះបានជ្រុះធ្លាក់ចូលទៅក្នុងព្រង់នឹង ហើយផ្លែឈើអ្វីៗធ្លាក់ចូលទៅក្នុងព្រង់នឹង ។ ខែវស្សា ភ្លៀងមក ទឹកភ្លៀងវាដក់ក្នុងព្រង់ល្អាងនឹងឯង ។ ហើយវាមានផ្លែជ្រៃ និងផ្លែអ្វីៗផ្សេងទៀតដែលត្រាំនៅក្នុងព្រង់នឹង ដល់ត្រាំយូរទៅវាផ្អូម វាកើតជាពពុះ ព្រោះវាលាយដោយជាតិផ្លែឈើ ។
ដល់ខែប្រាំង ត្រូវកម្តៅព្រះអាទិត្យមក ក៏ធ្វើឱ្យទឹកនឹងបានស្អាតល្អទៅ មានជាតិខ្លាំងឡើង ព្រោះវាមានជាតិជូរ ដល់អញ្ចឹងទៅមានពពួកសត្វបក្សាបក្សី ពពួកសេក ពពួកពពូល ដែលជាពពួកសត្វស្លាបជាដើមនឹង ខែរដូវប្រាំង ក៏ឃើញព្រង់នឹងឯង ក៏នាំគ្នាទៅផឹកទឹកព្រង់នឹង ដល់ទឹកនឹងវាមានជាតិខ្លាំង ដល់ផឹកទៅ ជាតិទឹកនឹងធ្វើឱ្យសត្វនឹងស្រវឹង ដល់ស្រវឹងទៅ វាក៏ទន់ជើង ទន់ស្លាប ។ សូម្បីពពួកសត្វសេកវាទុំលើមែកឈើនឹងមិនបានទេ វាធ្លាក់មកប្រតោងពីក្រោមមែកសួនឹង ហើយសត្វណាដទៃទៀតនឹងស្រវឹង ហើយក៏ធ្លាក់ពីលើដើមជ្រៃ មកនៅក្រោមដើមជ្រៃ ហើយស្លាបសុទ្ធតែលា ព្រោះតែវាស្រវឹង ហើយសត្វទាំងអស់នោះ សត្វណាមានភាសាអីក៏និយាយចចេចចចាច ដូចថា វាសប្បាយរីករាយ ដោយបញ្ចេញសូរស័ព្ទសំឡេងគ្រប់តែសត្វនឹងឯង ។ ជាពិសេសសត្វស្លាបដែលវាធ្លាក់ក្រោមដើមជ្រៃ អត់ហោះហើរ ព្រោះវាស្រវឹងទន់ជើង ទន់ស្លាប ។
ដល់ចឹងសុរៈព្រាននឹងក៏ដើរទៅដល់ដើមជ្រៃនឹង ឮសូរសត្វពួកបក្សាបក្សី ស្រែកយំខ្ញៀវខ្ញាកងរំពង ដល់ពេលគាត់ដើរទៅដលើ ក៏ឃើញសត្វស្លាបទាំង់នឹងធ្លាក់នៅក្រោមដើមជ្រៃ ហើយនៅពេលឃើញព្រានមកដល់ ក៏ពពួកសត្វទាំងអស់នឹងអត់ហើរដែរ ហើរទៅណារួច ព្រោះវាស្រវឹង ទន់ស្លាបអស់ ។
លុះសុរៈព្រានឃើញបែបនេះ ក៏ឈរសម្លឹង ហើយឆ្ងល់ថា យី! ចុះពពួកសត្វស្លាបទាំងអស់នេះវាយ៉ាងមិច បានជាបញ្ចេញសូរស័ព្ទសំឡេងស្រែកកោកកាកទាំងគ្នា ដូចជារាំ ច្រៀង កងរំពង ហើយឆ្ងល់ទៀតថាតើយ៉ាងមិចបានជាវាធ្លាក់មកនៅនឹងដី ព្រានក៏ឈររំពឹងគិត និងពិចារណាថាតើហេតុអី ។ ដល់តែឈររំពឹងគិតក៏សង្ស័យថាក្នុងដើមជ្រៃនឹងមានអីហើយ ? បន្ទាប់មកព្រានក៏ឡើងលើដើមជ្រៃនឹង ក៏ឃើញព្រង់ឈើពុកនឹង ឃើញទឹកឡើងក្រហម ហើយគិតថា ប្រហែលជាទឹកនេះឯង ដល់អញ្ចឹង ព្រានក៏ដកស្រង់ពិសោធន៍សាកមើល ព្រានក៏ក្បង់ទឹកនឹងបរិភោគសាកមើល (ទឹកនឹងវាមានជាតិហាងដូចសុរាយើងអញ្ចឹង) ហើយគាត់ក៏លេបបន្តិចទៅ មនុស្សដែលមិនធ្លាប់ជួបជាតិស្រវឹង ដល់តែផឹកបន្តិចបន្តួចទៅ វាធ្វើឱ្យស្រវឹងភ្លាម ដល់ស្រវឹងទៅ គាត់នឹងក៏សប្បាយចិត្ត រីករាយម្នាក់ឯង នឹកឃើញចង់ច្រៀងលេងតែឯង សប្បាយជាមួយសត្វតែម្នាក់ឯងអញ្ចឹងទៅ ។ បន្ទាប់មកគាត់ក៏ចុះមកក្រោមដើមជ្រៃ ស្រវឹងហើយ ឃើញសត្វ ក៏នឹកឃើញចង់បរិភោគសាច់សត្វនឹង ក៏វាយសត្វនឹង យកមកដុត មកអាំងសត្វនឹងបរិភោគតែម្នាក់ឯង សប្បាយរីករាយច្រៀងតែម្នាក់ឯង ។ នៅពេលស្វាងអស់ជាតិស្រានឹង ក៏ថា យី! ទឹកនេះធ្វើឱ្យរីករាយ សប្បាយទេតើ ក៏ឱ្យឈ្មោះថា ទឹករីករាយ ។
នៅពេលព្រានស្វាង ក៏ចាប់សត្វស្លាបទាំងអស់នឹងចង១បាច់ ហើយទឹកបំពង់ តាមធម្មតា ព្រានព្រៃគេមានទឹកបំពង់ឫស្សីដូចបំពង់ទឹកត្នោត សម្រាប់ដាក់ទឹកស្ពាយយកទៅព្រៃនឹង ក្រែងរកទឹកបរិភោគមិនបានក្នុងព្រៃនឹង ទាល់តែមានទឹកបំពង់នឹង បន្ទាប់មកព្រានក៏ស្ពានសត្វទាំងអស់នឹង និងយកទឹកបំពង់ចាក់ចោល ក៏ឡើងទៅដងទឹករីករាយនឹងអោយពេញបំពង់ឫស្សី ហើយគាត់ក៏ធ្វើដំណើរចេញដើរតទៅទៀត ក៏ធ្វើដំណើរទៅជួបអាស្រមតាបសមួយនៅនឹងមាត់ស្ទឺងនឹង ស្ទឹងនឹងនៅដល់សព្វថ្ងៃនឹងក្នុងនគរពារាណសីនឹង ដែលគេហៅថា ស្ទឹងវរណី ។ ហើយតាបសដែលនៅទីនឹងឈ្មោះវរណីតាបស វររុណតាបស គាត់ទៅចម្រើនឈាននៅទីនឹង ។
ពេលព្រានព្រៃឈ្មោះសុរៈ ទៅដល់ក៏បានជួបតាបសនោះ និងនិយាយអធិប្បាយរៀបរាប់ពីរឿងទឹកដក់នៅក្នុងដើមជ្រៃនោះថា ទឹកនេះបរិភោគទៅធ្វើឱ្យរីករាយសប្បាយចិត្ត ក៏បបួលតាបសនោះបរិភោគទឹកសាកមើល ។ នៅពេលតាបសបរិភោគសាកទឹកនឹងទៅ ក៏ធ្វើឱ្យសប្បាយរីករាយតែ២នាក់នឹងសុរៈព្រាន ហើយធ្វើឱ្យតាបសស្រវឹង ដាច់ឈាន ព្រោះសុរា ក៏ចង់បរិភោគសាច់សត្វ តែតាបស មិនបរិភោគសាច់សត្វទេ គាត់បរិភោគតែមើមឈើ និងផ្លែឈើព្រៃ តែដល់ពេលស្រវឹងហើយ ក៏ចង់បរិភោគសាច់សត្វ និងវាយសត្វ អាំងក្លែម ជាមួយសុរៈព្រាន និងសប្បាយតែ២នាក់នឹងឯង ។ លុះដល់អស់អំណាចសុរាទៅ តាបស និងសុរៈព្រាន ក៏គិតគ្នា ថាយី ទឹកនេះធ្វើឱ្យសប្បាយរីករាយ បើសិនណាយើងយកទឹកនឹងទៅថ្វាយព្រះរាជា នៅក្រុងពារាណសី ទ្រង់សោយទៅសប្បាយ យើងប្រាកដជាបានរង្វាន់ហើយ ក៏ត្រឡប់ទៅដងទឹករីករាយថ្វាយព្រះរាជា ដោយចូលទៅថ្វាយទាំង២នាក់ ហើយតាបសនោះលែងបួស ព្រោះដាច់ឈានហើយ ។
នៅពេលចូលទៅគាល់ ព្រះមហាក្សត្រពារាណសី ទ្រង់សួរថា តើអ្នកទាំង២នឹងចូលគាល់មានការអី? ពួកគាត់ក៏រៀបរាប់ប្រាប់ថា ទូលបង្គំមានទឹករីករាយសប្បាយ នឹកឃើញដល់ព្រះអង្គ ចង់យកមកថ្វាយព្រះអង្គសោយនឹងបានរីករាយសប្បាយចិត្ត ។ បន្ទាប់មកព្រះអង្គទ្រង់ក៏សួររករឿង រករ៉ាវដំណើរដើមទងសព្វគ្រប់អស់ សុរៈព្រានក៏និយាយរៀបរាប់ពីរឿងគាត់ដើរទៅជួបដើមជ្រៃ ឃើញសត្វស្លាបវារីករាយសប្បាយធ្លាក់នៅក្រោមដើមជ្រៃ ដោយសត្វសេកស្រវឹងវាដើរប្រតោងពីក្រោមមែកឈើ ដែលធម្មតាវាដើរពីលើមែកឈើ ។ ក្រោយពីស្តេចទ្រង់ស្តាប់តាបស និងសុរៈព្រានរៀបរាប់ចប់ ព្រះអង្គទ្រង់ក៏ចង់សោយសាកមើល ដល់ចឹងព្រះអង្គក៏សោយសាកមើល ដល់ចឹងវាជ្រាប មនុស្សមិនធ្លាប់ប៉ះ ដល់ប៉ះតែបន្តិចបន្តួចទៅវាជ្រាប បើអ្នកជោកជាំហើយដល់អស់១លីត្រ ២លីត្រ ។ នៅពេលព្រះមហាក្សត្រសោយទៅ លោកសប្បាយរីករាយមែន វាអស់ទុក្ខ អស់ភ័យ ។ នៅពេលស្វាងទៅ ព្រះអង្គប្រាប់ទៅអ្នកទាំង២ថា ទឹកនឹងកើតនៅទីកន្លែងណា ចូរអ្នកទៅរក្សា ហើយសូមឱ្យអ្នកទៅដងទឹកនឹងយកមកថ្វាយយើង ហើយព្រះមហាក្សត្រសព្វព្រះទ័យ លោកក៏ប្រទានរង្វាន់ដល់អ្នកទាំង២ ដូចបំណងដែលពួកគាត់មែន ។
អ្នកទាំង២ក៏បានទៅដងទឹករីករាយនឹងយកទៅថ្វាយព្រះមហាក្សត្រ ហើយទឹកនោះវាមិនមានច្រើនអី លុះទៅដងមិនបានប៉ុន្មានវាក៏អស់ទឹកនឹងទៅ ។ ដល់កាលណាវាអស់ទឹកនឹងទៅ អ្នកទាំង២ក៏នាំគ្នាគិតថាធ្វើមិចអោយវាកើតទឹកនឹងទៀត ។ បន្ទាប់មកពួកគាត់ក៏ទៅពិនិត្យមើលឃើញគ្រាប់ផ្លែឈើ និងឃើញស្រូវ ក៏គិតថា ទឹកនឹងកើតពីរបស់ទាំងអស់នឹង លែងគិតចង់បានតាមបែបធម្មជាតិហើយ ទើបគាត់ច្នៃប្រឌិតឡើង ដល់ច្នៃប្រឌិតទៅ ក៏បានកើតទៅជាជាតិសុរាឡើងខ្លាំងដូចគ្នាអញ្ចឹង ក៏យកទៅថ្វាយព្រះរាជាបន្តទៅទៀត ហើយអ្នកទាំង២នឹងមានតួនាទីជាអ្នកទៅជារកទឹករីករាយថ្វាយស្តេច ឬជាអ្នកផលិតស្រាថ្វាយស្តេច ។ រួចហើយគមិនដឹងអោយឈ្មោះទឹកនោះជាទឹកអ្វី ក៏ប៉ុន្តែអ្នកទាំង២នោះហៅទឹករីករាយ ដល់តែមិនដឹងអោយឈ្មោះអី គេក៏ពិចារណាថា បើអញ្ចឹងអោយឈ្មោះអ្នកដែលទៅឃើញទឹកនោះមុនគេ គឺសុរៈព្រាននឹងឯង បានគេអោយឈ្មោះថា សុរា នោះគឺជាឈ្មោះអ្នកដែលទៅឃើញ ម្យ៉ាងទៀត ខ្លះគេហៅថាវរណី ឬទឹកវរណី ក៏បានដែរ គឺមកពីឈ្មោះតាបសនោះឯង តែវរណីនោះក៏បាត់ទៅ នៅតែសុរា ។
កាលដែលបង្កើតសុរាពីការផ្សំនឹងកើតឡើង ក៏ធ្វើស្រានឹងលក់ពេញស្រុក ដល់ប្រជាពលរដ្ឋបានទឹកសុរាយកទៅបរិភោគ ក៏ធ្វើឱ្យសប្បាយរីករាយគ្រប់គ្នា ក៏នាំគ្នាសេពសុរាទាំងប្រុសទាំងស្រី ធ្វើឱ្យវិនាសអស់នគរ៣ ទី១គឺនគរពារាណសី ជាអ្នកផលិតស្រានោះឯង ទី២គឺនគរសាវត្ថី និងទី៣គឺនគរសាកែននឹងឯង ។ ប្រជាពលរដ្ឋនៅក្នុងប្រទេសទាំងនោះលែងរកស៊ី រកចុកអស់ហើយ ផឹកទាំងប្រុសទាំងស្រី ទាំងចាស់ ទាំងក្មេង អត់គិតរកស៊ីអីទេ ទៅជាដូចជាសត្វតិរច្ឆាន ព្រោះផឹកទៅស្រវឹង ដេកតាមចិញ្ចើមថ្នល់ ។ ទំរាំដល់ព្រះរាជាលោកដឹង វិនាសអស់ប្រជាពលរដ្ឋ ទើបទ្រង់បានបង្កើតជាច្បាប់ ហាមសុរា ហាមប្រជាពលរដ្ឋបរិភោគសុរាជ្រុលហួសហេតុពេក ទំរាំបានហាម រាជបញ្ញត្តនោះចេញ ប្រជាពលរដ្ឋក៏គោរពរាជបញ្ញត្តនោះទៅ ក៏ថយផឹកមកវិញ ក៏មានស្មារតី មានវិញ្ញាណធម្មតាឡើងវិញ ៕
ចែករំលែកព័តមាននេះ