ខេត្តស្វាយរៀង ៖ មានរថយន្ត១គ្រឿងដឹកទំនិញសំពីងសំពោងតាមដងផ្លូវលើកំណាត់ផ្លូវលេខ៣១៤D ឆ្ពោះទៅប៉ុស្តិ៍ច្រកទ្វារព្រំដែនអន្តរជាតិព្រៃវល្លិ៍ ខណៈមកដល់ចំណុចវត្តត្រពាំងលាច ក្នុងភូមិត្រពាំងលាច ឃុំប្រសូតិ ស្រុកស្វាយទាប បានធ្លាយបាវធ្លាក់កំទេចជ័រហូរពេញថ្នល់ចាប់ពីចំណុចវត្តត្រពាំងលាច រហូតដល់ស្ពានតាដាវ ធ្លាក់ទាំងបាវមកតែម្តង និងហូរចេញពីបាវរហូតជិតដល់ច្រកទ្វាព្រំដែនអន្តរជាតិព្រៃវល្លិ៍ ស្ថិតនៅភូមិថ្មី ឃុំថ្មី ស្រុកកំពង់រោទ៍។
ករណីរយន្តដឹកទំនិញសំពីងសំពោងធ្លាយបាវធ្លាក់កំទេចជ័ររាយប៉ាយតាមដងផ្លូវនេះកើតឡើងនៅវេលាម៉ោង១១និង០០នាទីព្រឹកថ្ងៃទី២៦ មករា ២០២៤ នៅចំណុចភូមិត្រពាំងលាច ឃុំប្រសូតិរហូតដល់ច្រកទ្វារព្រំដែនអន្តរជាតិព្រៃវល្លិ៍ ឃុំថ្មី ស្រុកកំពង់រោទ៍។
បើតាមសមត្ថកិច្ចបានឲ្យដឹងថា រថយន្តដឹកទំនិញសំពីងសំពោងម៉ាកហ៊ីយ៉ាន់ដាយ ពាក់ស្លាកលេខភ្នំពេញ 4A-2216 ដឹកទំនិញប្រភេទជ័រអេតចាយ យកទៅលក់ឲ្យឈ្មួញវៀតណាមដឹកចេញទៅប្រទេសវៀតណាម ។
ប្រភពបន្តថា ករណីនេះ ដោយសារអ្នកបើកបរធ្វេសប្រហេស បើកបរមិនបានមើលកញ្ចក់ក្រោយ គិតតែបើកបរទៅមុខមិនខ្វល់ ផ្ទុកទំនិញសំពីងសំពោង ជ្រុះធ្លាក់តាមដងផ្លូវ ។ នេះសំណាងល្អហើយមិនបង្កឲ្យគ្រោះថ្នាក់អ្នកធ្វើដំណើរតាមដងផ្លូវ បើរបូតបាវមកលើផ្លូវ អាចគ្រោះថ្នាក់ដល់អ្នកធ្វើដំណើរជិះម៉ូតូ ។
មហាជនបានសំណូមពរដល់សមត្ថកិច្ចតាមដងផ្លូវ គួរតែរឹតបន្តឹងដល់ម្ចាស់រថយន្តដឹកទំនិញសំពីងសំពោងនេះផងទាន កុំឲ្យមានរថយន្តដឹកសំពីងសំពោងខុសបច្ចេកទេសធ្វើចរាចរណ៍តាមដងផ្លូវអាចគ្រោះថ្នាក់ដោយយថាហេតុដល់អ្នកធ្វើដំណើរ៕
ចែករំលែកព័តមាននេះ