ខេត្តក្រចេះ ៖ មន្ត្រីរដ្ឋបាលព្រៃឈើបានឱ្យដឹងថា រយៈពេលមួយខែរថយន្តដឹកឈើប្រណីតរួមទាំងឈើអារល្មើសច្បាប់គ្រប់ប្រភេទចំនួនជាង១១ម៉ែត្រគូបត្រូវបានបង្រ្កាប និងចាប់រឹបអូសបាន ដោយមន្រ្តីផ្នែករដ្ឋបាលព្រៃឈើក្រចេះសហការជាមួយកងកម្លាំងប្រដាប់អាវុធក្នុងខេត្តក្នុងយុទ្ធនាការបង្រ្កាបចំនួន៧ករណី
ខេត្តក្រចេះ ៖ មន្ត្រីរដ្ឋបាលព្រៃឈើបានឱ្យដឹងថា រយៈពេលមួយខែរថយន្តដឹកឈើប្រណីតរួមទាំងឈើអារល្មើសច្បាប់គ្រប់ប្រភេទចំនួនជាង១១ម៉ែត្រគូបត្រូវបានបង្រ្កាប និងចាប់រឹបអូសបាន ដោយមន្រ្តីផ្នែករដ្ឋបាលព្រៃឈើក្រចេះសហការជាមួយកងកម្លាំងប្រដាប់អាវុធក្នុងខេត្តក្នុងយុទ្ធនាការបង្រ្កាបចំនួន៧ករណី។
មានរថយន្តចំនួន៧គ្រឿង ក្នុងនោះមានរថយន្តកាមរីចំនួន៥គ្រឿង និងរថយន្តកូរ៉េ២គ្រឿងត្រូវបានចាប់រឹបអូសរួមជាមួយឈើអារសរុបចំនួនជាង១១ម៉ែត្រគូប ក្នុងនោះមានឈើប្រណីតប្រភេទគ្រញូង នាងនួន និងធ្នង់ ជាង៧ម៉ែត្រគូប និងឈើអារប្រភេទលេខ១ និងលេខ២ជាង៣ម៉ែត្រគូប ដែលតួលេខនេះគិតពីត្រឹមថ្ងៃទី៦ ឧសភា ដល់ ២៧ ឧសភា ។ នេះបើតាមរបាយការណ៍របស់មន្រ្តីផ្នែករដ្ឋបាលព្រៃឈើក្រចេះ។
បច្ចុប្បន្ននេះ ទោះបីជាក្រុមឈ្មួញធ្វើសកម្មភាពលួចដឹកឈើប្រណីតខុសច្បាប់មានរូបភាពតូចតាចក្តី ក៏ក្រុមសមត្ថកិច្ចប្រដាប់អាវុធដោយសហការជាមួយស្ថាបន័រដ្ឋបាលព្រៃឈើក្នុងដែនសមត្ថកិច្ចរបស់ខ្លួននៅតែតាមប្រមាញ់បានជាបន្តបន្ទាប់ នៅលើផ្លូវជាតិលេខ៧ ។ ជាក់ ស្តែង កាលពីល្ងាចថ្ងៃទី២៨ ឧសភា កម្លាំងសមត្ថកិច្ចចម្រុះបានចុះសហការតាមប្រមាញ់បានរថយន្តស៊េរីទំនើបមួយគ្រឿងម៉ាកកាមរីឆ្លាម ពណ៌ក្រហម ពុំមានស្លាកលេខ នៅចំណុចឃុំសណ្តាន់ ស្រុកសំបូរ ខណៈរថយន្តមួយគ្រឿងនេះមានផ្ទុកឈើប្រណីតខុសច្បាប់ និងព្យាយាមបើករត់គេច ហើយសមត្ថកិច្ចបានឆែកឆេររកឃើញមានផ្ទុកឈើគ្រញូងចំនួន៥ដុំធំ ស្មើនឹង២២៣គីឡូក្រាម។
ជុំវិញកិច្ចប្រតិបត្តិការរបស់កម្លាំងសមត្ថកិច្ចទៅលើរថយន្តដឹកឈើល្មើសច្បាប់នេះ លោកព្រាប សុធារ៉ា នាយផ្នែករដ្ឋបាលព្រៃឈើក្រចេះបានឱ្យដឹងថា ការចុះបង្រ្កាបបទល្មើសដឹកជញ្ជូនឈើក្នុងដែនសមត្ថកិច្ចរបស់លោក គឺធ្វើឡើងក្រោមការដឹកនាំរបស់ព្រះរាជអាជ្ញាអមសាលាដំបូងខេត្ត ដោយមានការសហការរវាងកងកម្លាំងប្រដាប់អាវុធ មានយោធា និងប៉េអឹមខេត្តរួមជាមួយមន្រ្តីផ្នែករដ្ឋបាលព្រៃឈើ និងតាមបណ្តាសង្កាត់ពាក់ព័ន្ធធ្វើការចល័តតាមចំណុចភូមិសាស្រ្តចាប់ឃាត់រឹបអូសបានជាបន្តបន្ទាប់។
លោកនាយផ្នែកបានបញ្ជាក់ថា ទោះបីជាក្នុងសកម្មភាពបង្រ្កាបនេះសមត្ថកិច្ចមិនបានចាប់ឃាត់ជនណាម្នាក់ក៏ពិតមែន តែជនដែលជាម្ចាស់រថយន្តនិងម្ចាស់ឈើនោះ គឺសមត្ថកិច្ចបាននិងកំពុងធ្វើការស្រាវជ្រាវរកអត្តសញ្ញាណ ដើម្បីមានវិធានការបន្តតាមនីតិវិធី។ រីឯសម្ភារជាវត្ថុតាងទាំងអស់ដែលបានពីការចាប់និងរឹបអូសនេះត្រូវបានរក្សាទុកនៅស្ថានីយបណ្តុះកូនឈើខ្សារ ស្ថិតក្នុងឃុំដារ ស្រុកចិត្របុរី រង់ចាំមានវិធានការបន្តតាមផ្លូវច្បាប់ ៕
ចែករំលែកព័តមាននេះ