ខេត្តបាត់ដំបង ៖ ក្រុមអធិការកិច្ចរបស់ក្រសួងមហាផ្ទៃដែលចុះស៊ើបអង្កេតលើសំណុំរឿងមន្ត្រីយោធភូមិភាគទី៥ម្នាក់ ដែលបានរំលោភទន្ទ្រានយកដីតំបន់០៣ នៅឃុំជ្រៃ ស្រុកមោងប្ញស្សី ថែមទាំងបានព្រមានថា នឹងទម្លាយឈ្មោះមន្ត្រីនានា ដែលជាប់ពាក់ព័ន្ធជាមួយខ្លួនផងនោះ ត្រូវបានបញ្ចប់បេសកកម្មរបស់ខ្លួនហើយ កាលពីចុងសប្ដាហ៏មុននេះ ដោយសន្សល់ទុកនូវការព្រូយបារម្ភរបស់សាមីខ្លួនអំពីជោគវាសនា បើមានចំណាត់ការបន្តតាមផ្លូវច្បាប់ ខណៈលោកចៅហ្វាយស្រុកនេះ បដិសេធថា លោកពុំជាប់ពាក់ព័ន្ធជាមួយមន្ត្រីយោធាទន្ទ្រានយកដីរដ្ឋនោះទេ។
បេសកកម្មស៊ើបអង្កេតដែលមានរយៈពេល០៤ថ្ងៃរបស់ក្រុមអធិការកិច្ចក្រសួងមហាផ្ទៃ ចាប់ពីថ្ងៃទី ១៥ ដល់ថ្ងៃទី១៩ មករា បានធ្វើឡើងយ៉ាងល្អិតល្អន់ តាមលំដាប់លំដោយ ដោយមានគោលដៅស្វែងរកកំហុសឆ្គងរបស់លោកទេព ហន ជាមួយនឹងមន្ត្រីយោធភូមិភាគ៥ម្នាក់ឈ្មោះ អ៊ី សេងហុង ដែលជាប់ព័ន្ធនឹងការទទូលសំណូកសូកប៉ាន់ ជាថ្នូរនឹងការផ្ដល់ឪកាសឲ្យមន្ត្រីយោធារូបនេះ ឈូសឆាយទន្ទ្រានយកដីតំបន់០៣ តាមអំពើចិត្តនៅក្នុងភូមិសាស្ត្រ ឃុំជ្រៃ ស្រុកមោងឬស្សី ដែលជាតំបន់ហាមឃាត់ដោយច្បាប់។ ប៉ុន្តែលោកអភិបាលស្រុករូបនេះបានបដិសេធថា លោកមិនជាប់ពាក់ព័ន្ធជាមួយមន្ត្រីយោធាទន្ទ្រានដីរដ្ឋខាងលើនេះទេ បើទោះជាមន្ត្រីយោធានោះប្រកាន់ជំហរចោទប្រកាន់លោកចៅហ្វាយស្រុករូបនេះថា ធ្លាប់ទទួលប្រាក់សំណូក និងដីស្រែជាច្រើនហិកតានៅតំបន់០៣ពីលោកក្ដី។
អភិបាលស្រុកមោងប្ញស្សី លោក ទេព ហន បានឆ្លើយបំភ្លឺបែបនេះ ជាមួយកោះសន្តិភាព កាលពីព្រឹកថ្ងៃទី២៣ មករា ថា «នៅចំពោះមុខក្រុមការងារដែលចុះធ្វើអធិការកិច្ចប៉ុន្មានថ្ងៃមុននេះ ខ្ញុំបានឆ្លើយប្រាប់គេអស់ហើយ គឺខ្ញុំមិនជាប់ពាក់ព័ន្ធនឹងការទទួលប្រាក់សំណូក ឬ ដីស្រែនៅតំបន់០៣ ពីលោកអ៊ី សេងហុង ទេ សូម្បីមួយម៉ែត្រការ៉េក៏ខ្ញុំគ្មានដីនៅតំបន់០៣នោះដែរ» ។ លោក ទេព ហន មិនបានបរិយាយអ្វីច្រើនទេ ជុំវិញការចោទប្រកាន់នេះ ហើយលោកក៏មិនបាននិយាយច្រើនពីរឿងក្រុមអធិការកិច្ចសួរនាំលោកដែរ ដោយលោកគ្រាន់តែបញ្ជាក់ថា «ខ្ញុំបានឆ្លើយប្រាប់ក្រុមអធិការកិច្ចនោះអស់ហើយ គឺខ្ញុំមិនដែលមានដីនៅតំបន់០៣ទេ»។
លោកអភិបាលស្រុករូបនេះ បានរំលឹកពីប្រវត្តិដែលលោកកាន់តំណែងជាអភិបាលស្រុកនេះបន្តិចក្នុងបំណងជួយសម្រាលបន្ទុកខ្លះៗ ដូច្នេះដែរថា «បើតាមខ្ញុំដឹង មន្ត្រីយោធាឈ្មោះ អ៊ី សេងហុង នេះ បានឈូសឆាយរំលោភយកដីតំបន់០៣ខាងលើ ចាប់តាំងពីអំឡុងឆ្នាំ២០១៦ ឬឆ្នាំ២០១៧ មកម្ល៉េះ ហើយកាលនោះ ខ្ញុំនៅកាន់តំណែងជាអភិបាលស្រុករុក្ខគិរីនៅឡើយទេ រហូតដល់ឆ្នាំ២០១៨ ទើបខ្ញុំប្ដូរមកកាន់តំណែងជាអភិបាលស្រុកមោងប្ញស្សី។ ដូច្នេះ ខ្ញុំមកមិនទាន់សកម្មភាពឈូសឆាយដីតំបន់០៣ របស់មន្ត្រីយោធារូបនេះទេ»។
ដោយឡែក លោក អ៊ី សេងហុង ជាមន្ត្រីយោធាម្នាក់ ដែលសំបូរទៅដោយរឿងអាស្រូវដីធ្លី ហាក់មិនបានបដិសេធទេ ចំពោះការចោទប្រកាន់ថា លោកបានឈូសឆាយរំលោភយកដីតំបន់០៣ នៅឃុំជ្រៃ ស្រុកមោងប្ញស្សី ហើយលោកក៏នៅតែប្រកាន់ជំហរដែរ ដែលលោកបានអះអាងថា មានមន្ត្រីមួយចំនួនក្នុងស្រុកមោងប្ញស្សី ធ្លាប់ទទួលបានផលប្រយោជន៍ពីលោក (ប្រាក់និងដីស្រែ)។
លោកបានចង្អុលចំៗ ជាពិសេស ទៅលើលោក ទេព ហន អភិបាលស្រុកមោងប្ញស្សីតែម្ដង ដែលថា «ទទូលលុយក៏ច្រើន ដីក៏ច្រើន» បើទោះជាពេលនេះ លោកអភិបាលស្រុករូបនេះ បានព្យាយាមឆ្លើយរលាស់ដៃក្ដីយករួចខ្លួន ។
លោក អ៊ី សេងហុង បានបំភ្លឺប្រាប់កោះសន្តិភាពនៅព្រឹកថ្ងៃទី ២៣ មករា នេះថា លោកពិតជាធ្លាប់បានឲ្យលុយមួយចំនួន និងដីស្រែជាច្រើនហិកតាទៅលោកទេព ហន ក្នុងអំឡុងពេលលោកកំពុងចាប់ផ្ដើមឈូសឆាយដីតំបន់០៣នោះ ។ លោក សេងហុង បានបញ្ជាក់ថា ក្រោយពីរាជរដ្ឋាភិបាលសើររើរឿងដីតំបន់០៣ ស្រាប់តែខាងជលផល និងលោកអភិបាលស្រុក ធ្វើរបាយការណ៍ប្ដឹងលោកទៅតុលាការដោយចោទថា លោកបានកាន់កាប់ដីតំបន់០៣ នេះចំនួន១៦,៨០ហិកតា។
ប៉ុន្តែមកដល់ពេលនេះ លោកបានសម្រេចប្រគល់ដីទាំងអស់នោះជូនតុលាការអស់ហើយ ដើម្បីបញ្ចប់រឿង តែខាងអធិការកិច្ចនៅតែចុះសួរនាំបន្ត ដោយផ្ដោតទៅលើ «សារជាសំឡេងរបស់លោកដែលនិយាយពីរឿងអ្នកជាប់ពាក់ព័ន្ធជាមួយលោក» ហើយលោកក៏បានទទូលស្គាល់ថា
«សារជាសំឡេងដែលបានបែកធ្លាយនោះ ពិតជាសំឡេងរបស់ខ្ញុំមែន»។
សូមរំលឹកថា ក្រោយពីស្ថាប័នជលផល និងអាជ្ញាធរស្រុកមោងប្ញស្សី ដាក់ពាក្យបណ្ដឹងទៅតុលាការ ដោយប្ដឹងចោទលោក អ៊ី សេងហុង ថា ឈូសឆាយទន្ទ្រានកាន់កាប់ដីព្រៃលិចទឹកនៅក្នុង
«តំបន់០៣» ទំហំជាង១៦ហិកតា នៅក្នុងអំឡុងខែឧសភា ឆ្នាំ២០២៣ កន្លងទៅ លោក សេងហុង ហាក់ខឹងសម្បារ និងអ្នកប្ដឹងនេះយ៉ាងខ្លាំង រហូតទ្រាំមិនបានក៏បាននិយាយផ្ញើសារជាសំឡេងទៅកាន់ប្រធានសហគមន៍ម្នាក់នៅក្នុងមូលដ្ឋាន ដែលសម្លេងនេះ ត្រូវបានគេចែករំលែកតៗគ្នាតាមប្រព័ន្ធ«តេឡេក្រាម» ដែលមានខ្លឹមសារហែកកេរ្ដិ៍មន្ត្រីនានា ដែលធ្លាប់ទទួលផលប្រយោជន៍ពីលោក ហើយបែរជាប្ដឹងលោកទៅតុលាការ។ ជាពិសេស មន្ត្រីយោធារូបនេះព្រមានទម្លាយរឿងសំណូកសូកប៉ាន់ រវាងរូបលោកជាមួយលោកអភិបាលស្រុកមោងប្ញស្សីតែម្ដង។
លោក អ៊ី សេងហុង ត្រូវគេស្គាល់ថា លោកជាមន្ត្រីយោធភូមិភាគទី៥ តែការងាររបស់លោក ហាក់មមារញឹកខ្លាំងបំផុតរឿងប្រព្រឹត្ត «ឈូសឆាយរំលោភយកដីព្រៃលិចទឹកក្នុងតំបន់៣» ដែលជាតំបន់ហាមឃាត់ដោយច្បាប់ ធ្វើជាកម្មសិទ្ធិផ្ទាល់ខ្លួន ។ ទីតាំងដែលមន្ត្រីរូបនេះ រំលោភបំពានយក ត្រូវគេរាយការណ៏ថា ភាគច្រើននៅក្នងភូមិសាស្ត្រ ឃុំជ្រៃ ស្រុកមោងប្ញស្សី ដែលពេលនេះកំពុងប្រឈមនឹងផ្លូវច្បាប់ផងដែរ ។
តាមរយៈសារជាសំឡេងដែលបានបែកធ្លាយ លោក អ៊ី សេងហុង ហាក់បានចង្អុលមុខចំៗ ចំពោះមន្ត្រីមួយចំនួន ដែលបានរំលោភបំពានយកដីតំបន់៣ ជាមួយខ្លួននាពេលកន្លងមក ។ ជាពិសេសលោក ទេព ហន អភិបាលស្រុកមោងប្ញស្សីតែម្ដង ដែលលោកសេងហុង បានចោទថា «បានដីពីលោកច្រើនហិចតាហើយ ថែមទាំងយកលុយពីលោកយ៉ាងច្រើនទៀត»។ នៅក្នុងសារជាសម្លេងដែលគេចែករំលែកបន្តគ្នានោះ មន្ត្រីយោធារូបនេះ បាននិយាយក្នុងន័យដើមថា « រឿងដីនេះមុននឹងធ្វើ គឺតាមរយៈអាជ្ញាធរដែនដីទាំងអស់ ចឹងលោកហន (ចៅហ្វាយស្រុក) ក៏ទទូលផល… លុយផង ដីផង ទាំងលោកវ៉ាន់ លោកអី… ក៏ទទួលគ្រប់គ្នា ។
បើនិយាយទៅក្នុងស្រុក ទទួលគ្រប់គ្នាទាំងអស់។ ចឹងការងារ ដែលខ្ញុំចូលតុលាការ បើសិនគេសួរ… ខ្ញុំត្រូវតែនិយាយ ត្រូវតែឆ្លើយទាំងអស់។ ព្រោះលោកហន (ចៅហ្វាយស្រុក) យកលុយក៏ច្រើន និងយកដី០៥ហិចតា។ លោកវ៉ាន់ ០៥ហិចតា ហើយខ្ញុំធ្វើឲ្យម៉ាស្អាតទាំងអស់… ទើបបានខ្ញុំសុខ។ បើលោកអស់ហ្នឹងមិនបានទទូលផលទេ គឺខ្ញុំធ្វើអត់បានទេ។ ចឹងការងារអស់នេះខ្ញុំត្រូវតែនិយាយ…»។
ខ្លឹមសារមួយផ្នែក នៃសម្លេងនោះ មន្ត្រីយោធារូបនេះ ត្រូវគេសន្និដ្ឋានថា បាននិយាយសំដៅទៅកាន់មនុស្សម្នាក់ ដែលលោកធ្លាប់គោរពយ៉ាងស្និតស្នាលកន្លងមក ក្នុងការធ្វើការងាររួមគ្នាកន្លងមក។លោក សេងហុង បានលើកឡើងទៅកាន់មនុស្សនោះថា « ដូចបង… បងដឹងហើយ បងឯងរាប់អានជាមួយខ្ញុំ តែចុងកន្ទុយឈ្មោះ… បងឯង ទៅបំភ្លឺនៅស្រុក អី.. អី.. ណាណី..។ ខ្ញុំខំស្រលាញ់បងឯង ដូចបងបង្កើត មិនគួរណាបងឯងទៅធ្វើចឹង ? បងទៅថតដីខ្ញុំ ថតអី..! ចំនួនប៉ុន្មាន.. អីប៉ុន្មាន ? ក្រៅពីហ្នឹងបងឯងអត់ទៅថតទេ ? ចឹងចាប់ពីថ្ងៃនេះទៅ ដីនៅកន្លែងណា អាណាធើអីៗ ទាំងអស់.. ខ្ញុំនឹងទៅយកព័ត៏មានទាំងអស់..! ព្រោះខ្ញុំនៅភូមិភាគ៥ ក្នុងគណៈបញ្ជាការកងឯកភាពខេត្ត ភូមិភាគ៥ ជាអនុប្រធាន… ខ្ញុំមិនដែលនិយាយអីទេ ធើម៉េចឲ្យបានតែសុខ តែបើខ្ញុំអត់សុខហើយណា… បងប្អូនទាំងអស់ក៏អត់បានសុខដែរ ខ្ញុំចង់និយាយប្រាប់បងចឹង..»។
ជាចុងក្រោយ លោក អ៊ី សេងហុង បានរំលឹកប្រាប់ ទៅកាន់មនុស្សដែលលោកធ្លាប់គោរពរាប់អាន ចាត់ទុជាបងនោះទៀតថា «ខ្ញុំ.. ស្អីក៏ដោយ ឲ្យតែបងខ្វះខាតស្អី… ខ្ញុំជួយបងរហូត..! ខ្ញុំមិនខ្លាចបងទេ តែខ្ញុំជួយការងារ ព្រោះខ្ញុំភូមិភាគ៥ ខ្ញុំអត់ត្រូវខ្លាចបងទេ តែនេះជាការងាររបស់ខ្ញុំ ដែលខ្ញុំជួយបង នឹកឃើញថា យើងរាប់អានគ្នា ជៀសវាងអីចេះ អីចុះ..! តែចុងក្រោយមក វានៅតែដដែលៗហ្នឹង ? ខ្ញុំជួយបងឥតប្រយោជន៏ហ្នឹង ?» ។ នៅក្នុងរឿងនេះ មន្ត្រីម្នាក់បានប្រាប់ថា សម្លេងបែកធ្លាយរបស់មន្ត្រីយោធាឈ្មោះ អ៊ី សេងហុង ដែលស្ដាប់ទៅ ទំនងស្ថិតក្នុងស្ថានភាពស្រវឹងផងនេះ បាននិយាយតាមទូរស័ព្ទ ស្ដីបន្ទោសទៅលើមេសហគមន៏ម្នាក់ កាលថ្ងៃទី ២៤ ឧសភា ព្រោះតែខឹងមេសហគមន៍នោះ នាំគ្នាទៅថតដីរបស់លោកនៅតំបន់៣ រួចរាយការណ៏ជូនថ្នាក់លើ ។
តាមរយៈសម្លេង លោក អ៊ី សេងហុង បានចោទ និងចង្អុលត្រង់ៗថា លោក ទេព ហន អភិបាលស្រុកមោងប្ញស្សី ក៏ជាអ្នកទទូលបានផលប្រយោជន៏ពីលោកច្រើនក្រាស់ក្រែលដែរ ដោយទទូលបានលុយយ៉ាងច្រើនផង និង ទទូលបានទាំងដីចំនួន០៥ហិកតាពីលោកថែមទៀត ។ ដោយឡែកមន្ត្រីនៅស្រុកនេះដទៃៗទៀត ក៏ទទូលបានអំណោយរបៀបពុករលួយបែបនេះដូចគ្នាដែរ។
ពាក់ព័ន្ធនឹងសារជាសំឡេងរបស់លោក អ៊ី សេងហុង ខាងលើនេះ លោកទេព ហន អភិបាលស្រុកមោងឬស្សី បានបញ្ជាក់ប្រាប់កោះសន្តិភាពថា «សម្លេងដែលបានបែកធ្លាយនិយាយចោទប្រកាន់លោកនោះ គឺ ជាសម្លេងរបស់លោក អ៊ី សេងហុង ដែលបាននិយាយទៅកាន់ប្រធានសហគមន៏ម្នាក់នៅក្នុងឃុំជ្រៃ»។ ប៉ុន្តែលោកអភិបាលស្រុករូបនេះបានបញ្ជាក់បន្ថែមថា ចំពោះការចោទប្រកាន់របស់លោក សេងហុង ដែលថា លោកបានទទូលលុយនិងដីស្រែពីលោកសេងហុងនោះ គឺ ជារឿងមិនពិត ហើយរឿងនេះលោកបានបកស្រាយប្រាប់ក្រុមអធិការកិច្ចអស់ហើយ។
គេមិនទាន់ដឹងថា តើក្រុមស៊ើបអង្កេតរបស់អធិការកិច្ចក្រសួងមហាផ្ទៃរកឃើញភស្ដុតាង ឬ សាក្សីចង្អុលជាក់លាក់បែបណាខ្លះទេ ដើម្បីដាក់បន្ទុកទៅលើជនសង្ស័យនានា ដែលជាមុខសញ្ញាត្រូវសួរនាំក្នុងរយៈពេល០៤ថ្ងៃនោះ ? ប៉ុន្តែបើតាមប្រភព័ត៏មាន ដែលកោះសន្តិភាពទទូលបានក្រៅផ្លូវការក្នុងអំឡុងពេលស៊ើងអង្កេត គេរកឃើញថា លោកអភិបាលស្រុកមោងឬស្សី ធ្លាប់ទទូលប្រាក់សំណូកពីលោកសេងហុងចំនួន៥,០០០ដុល្លា និង ដីចំនួន៤០ហិចតាទៀត ទើបលោកសេងហុង សម្ងំឈូសឆាយរំលោភយកដីតំបន់០៣ បង្កបង្កើនផលបានសុខរហូតមកដល់ថ្ងៃប្ដឹងទៅតុលាការ។ ដោយឡែក មន្ត្រីមួយចំនួន នៅស្ថាប័នដទៃៗទៀត ក៏មានចំណែកសូកប៉ាន់នេះពីលោកសេងហុងដែរ ។
ប្រភពព័ត៌មានបានបញ្ជាក់ថា ក្រុមស៊ើបអង្កេតបានកោះហៅមន្ត្រីគ្រប់លំដាក់ថ្នាក់យកមកសួរនាំ ពាក់ព័ន្ធនឹងសំណុំរឿងលោកសេង ហុង នេះ រាប់ទាំងការចុះសួរនាំប្រជាពលរដ្ឋក្នុងមូលដ្ឋាន និង ចុះពិនិត្យដីតំបន់០៣ ដែលគ្រប់គ្រងដោយលោកហុងផង។ យ៉ាងណាក្ដី ពេលនេះបេសកកម្មរបស់ក្រុមអធិការកិច្ច ត្រូវបានបញ្ចប់ហើយ កាលពីចុងសប្ដាហ៍ហើយ នៅឡើយតែលទ្ធផល ដែលសាមីខ្លួនពាក់ព័ន្ធនឹងរឿងលេបយកដីតំបន់៣ និង អ្នកទទូលសំណូកសូកប៉ាន់ កំពុងដេកគងថ្ងាស់បុកពោះ ព្រោះជោគវាសនាពេលនេះ ប្រៀបដូច«អាប៉ោង»នៅក្នុងគ្រប មិនដឹងថា តើចំណាត់ការបន្ត រាជរដ្ឋាភិបាលនឹងត្រូវវះកាត់ដូចម្ដេច ប្រសិនបើអធិការកិច្ចរកឃើញថា លោកអភិបាលស្រុកនិងមន្ត្រីពាក់ព័ន្ធដទៃទៀតមានកំហុស ?
ចែករំលែកព័តមាននេះ