ខេត្តព្រះសីហនុ ៖ ខ្សែភ្លើងស្ពាន់ចំនួន០,៥គីឡូក្រាម និងសំបកខ្សែភ្លើងមួយចំនួនតូច បានធ្វើឱ្យមនុស្សចំនួន៥នាក់ជាប់ពន្ធនាគារ ។ ហេតុការណ៍ឃាត់ខ្លួនមនុស្សចំនួន៥នាក់ (ស្រី១នាក់) ដែលជាប់ពាក់ព័ន្ធពីបទចោរកម្ម និងអ្នកផ្សំគំនិតនេះ កាលពីថ្ងៃទី២៤ ឧសភា នៅភូមិ៣ សង្កាត់៣ និងភូមិ៤ សង្កាត់៤ ក្រុងព្រះសីហនុ ។
សមត្ថកិច្ចឱ្យដឹងថា ការឃាត់ខ្លួនមនុស្សទាំង៥នាក់នោះ គឺធ្វើឡើងតាមបណ្តឹងរបស់ក្រុមហ៊ុនកាំមីតែលដែលបានបាត់ខ្សែកាបទូរស័ព្ទរបស់ក្រុមហ៊ុនក្នុងអំឡុងខែមេសា និងខែឧសភា ឆ្នាំ២០១១ ។ ការឃាត់ខ្លួននេះធ្វើឡើងពីរកន្លែងផ្សេងគ្នា ដែលលើកទី១ចាប់បានជនសង្ស័យចំនួន២នាក់នៅវេលាម៉ោង១០ និង៣០នាទីព្រឹកថ្ងៃទី២៤ ឧសភា នៅសណ្ឋាគារហូលីដេ ស្ថិតក្នុងភូមិ៣ សង្កាត់ក្រុងព្រះសីហនុ ។ យុវជនសង្ស័យទាំង២នាក់នេះឈ្មោះចាន់ ពិសាល អាយុ៣១ឆ្នាំ ភេទប្រុស និងឈ្មោះស៊ុន សុភា ភេទប្រុស អាយុ២៥ឆ្នាំ ជនទាំង២នាក់ជាសន្តិសុខឯកជនរបស់ក្រុមហ៊ុន PHAENIX និងស្នាក់នៅសណ្ឋាគារហូលីដេ ។ ចំណែកលើកទី២ នៅវេលាម៉ោង៣ និង៣០នាទីរសៀលក្នុងថ្ងៃដដែល សមត្ថកិច្ចបន្តឃាត់ខ្លួនមនុស្សចំនួន៣នាក់ ក្នុងនោះមានស្ត្រីម្នាក់ពីបទទទួលផលចោរកម្ម និងផ្សំគំនិត ។
ជនពាក់ព័ន្ធទី១-ឈ្មោះសូ រតនា ភេទប្រុស អាយុ២៦ឆ្នាំ ជាសន្តិសុខឯកជនដូចជនសង្ស័យទាំងពីរនាក់ខាងលើដែរ ទី២-ឈ្មោះថេប នឿង ភេទស្រី អាយុ២៦ឆ្នាំ មានលំនៅក្នុងក្រុម៤ ភូមិ៥ សង្កាត់៤ ក្រុងព្រះសីហនុ មុខរបរទិញអេតចាយ និងទី៣-ឈ្មោះធៀង ភេទប្រុស អាយុ៣៧ឆ្នាំ ទីលំនៅក្នុងក្រុមទី១៧ ភូមិ៣ សង្កាត់៣ ក្រុងព្រះសីហនុ មុខរបរទិញអេតចាយ (តាមការចង្អុលបង្ហាញពីជនសង្ស័យ)។
យោងតាមតំណាងក្រុមហ៊ុនកាំមីតែល ខេត្តព្រះសីហនុឱ្យដឹងថា ក្រុមហ៊ុនបាត់បង់ខ្សែកាបប្រហែល១៧២០ម៉ែត្រ ។ ដោយឡែកតាមការសារភាពរបស់ឈ្មោះចាន់ ពិសាល ថា រូបគេមិនមែនលួចខ្សែកាបទូរស័ព្ទទេ គឺលួចខ្សែភ្លើងរបស់សណ្ឋាគារហូលីដេដែលថៅកែទុកចោល ៕
ចែករំលែកព័តមាននេះ