ស្ថានីយជញ្ជីងថ្លឹងរថយន្តចំនួន២កន្លែង តាមបណ្តោយផ្លូវជាតិលេខ១ ស្ថិតក្នុងឃុំកំពង់ភ្នំ ស្រុកលើកដែក ខេត្តកណ្តាល រងការរិះគន់ពីក្រុមតៃកុងឡានដឹកទំនិញថា «កំពុងថ្លឹងលុយចែកគ្នាធ្វើមានបាន ផលប្រយោជន៍បុគ្គលឯកជន បើទោះបីជាផ្លូវ ឬស្ពាន
ខេត្តកណ្តាល ៖ ស្ថានីយជញ្ជីងថ្លឹងរថយន្តចំនួន២កន្លែង តាមបណ្តោយផ្លូវជាតិលេខ១ ស្ថិតក្នុងឃុំកំពង់ភ្នំ ស្រុកលើកដែក ខេត្តកណ្តាល រងការរិះគន់ពីក្រុមតៃកុងឡានដឹកទំនិញថា «កំពុងថ្លឹងលុយចែកគ្នាធ្វើមានបាន ផលប្រយោជន៍បុគ្គលឯកជន បើទោះបីជាផ្លូវ ឬស្ពានថ្នល់រងការខូចខាត ក៏ក្រុមមន្ត្រីជញ្ជីងទាំងនោះអត់ខ្វល់ដែរ»។
បើយោងតាមប្រភពព័ត៌មានពីក្រុមអ្នកបើកឡានដឹកទំនិញគ្រប់ប្រភេទ ឆ្លងកាត់តាមបណ្តោយផ្លូវជាតិលេខ១ ទាំងយប់ ទាំងថ្ងៃ បានលួ.ចខ្សឹបប្រាប់អ្នកសារព័ត៌មានយើងប្រហាក់ប្រហែលគ្នាថា «សព្វថ្ងៃ ឡានរបស់ពួកគាត់ដឹកទំនិញមិនលើសទម្ងន់ ក៏ត្រូវក្រុមមន្ត្រីជញ្ជីងតម្រូវឱ្យបង់លុយចាប់ពី១៥០០០រៀលទៅ២០០០០រៀលដែរ ក្នុងឡាន១គ្រឿង ថ្លៃបាយទឹក និងជាការយោគយល់គ្នាថ្ងៃក្រោយ។ បើឡានពួកគេដឹកលើសទម្ងន់បន្តិចបន្តួចវិញ មិនបាច់ធ្វើការរុះរើទំនិញចុះពីឡាន ឬធ្វើការបង់ផាកពិន័យចូលរដ្ឋនោះទេ»។
ប្រភពដដែលបន្តថា «ហើយបើឡានផ្ទុកលើសទម្ងន់ចាប់ពី៣តោន ទៅ៤តោន ក៏ក្រុមមន្ត្រីជញ្ជីងតម្រូវឱ្យបង់លុយក្នុងឡាន១គ្រឿងចាប់ពី៧ម៉ឺនទៅ៨ម៉ឺនរៀល រហូតដល់២០ម៉ឺនទៅ៣០ម៉ឺនរៀលជាកំហិត ដើម្បីជាថ្នូរនឹងការមិនបាច់រុះរើទំនិញចុះ ហើយបើឡានធំៗលើសទម្ងន់ខ្លាំង ក្រុមមន្ត្រីជញ្ជីង គ្រាន់តែឱ្យបើកឡើងលើជញ្ជីងឱ្យឃើញរូបភាពក្នុងកាមេរ៉ាប៉ុណ្ណោះ។ ប៉ុន្តែធាតុពិត ពួកគេមិនបានថ្លឹងនោះទេ គឺបានបិទជញ្ជីងអស់ហើយ គ្រាន់តែឱ្យព្រូ ឬតៃកុងឡានចុះពីលើឡាន រួចយកលុយរត់ទៅបង់ឱ្យ គឺជាការស្រេច»។
ប្រភពដដែលបន្តទៀតថា «ក្រៅពីនោះ នៅពេលយប់ជ្រៅ ក៏មានរថយន្តដឹកទំនិញធំៗខ្លះមិនបានចូលជញ្ជីងនោះទេ គ្រាន់តែអែបឈប់នៅមុខស្ថានីយតាមបណ្តោយផ្លូវជាតិលេខ១ បន្ទាប់មករត់ចូលទៅបង់លុយរួច ក៏អាចបន្តដំណើរទៅមុខទៀតបានយ៉ាងរលូន»។
ពលរដ្ឋ មានចម្ងល់ឆ្ងល់ថា គ្រាន់តែនៅក្នុងឃុំកំពង់ភ្នំមួយ ម៉េចក៏ដាក់ស្ថានីយជញ្ជីងថ្លឹងឡានរហូតដល់ទៅ២កន្លែងអ៊ីចឹង មិនដឹងយកលុយទៅណាទេ ក្នុងមួយថ្ងៃៗ។ ចំណែកស្ថានីយក្បែររង្វង់មូលគល់ស្ពានអ្នកលឿងវិញ ផ្លូវកៅស៊ូចូលទៅកាន់អតីតក្បាលសាឡាងអ្នកលឿងត្រើយខាងលិច ឬចូលទៅផ្លូវកៅស៊ូលេខ១៤ ច្រកទ្វារព្រំដែនអន្តរជាតិក្អមសំណ ស្ថិតក្នុងភូមិអំពិលទឹក ឃុំកំពង់ភ្នំ ហាក់បីដូចជាគ្មានឃើញដាក់ជញ្ជីងថ្លឹងឡានលើសទម្ងន់នោះទេ គឺធ្វើប៉ុស្តិ៍ដាក់កម្លាំងម្នាក់ ឬ២នាក់ អង្គុយរង់ចាំរាប់ក្បាលឡានដឹកទំនិញគ្រប់ប្រភេទ រួចយកលុយប្រៀបបីដូចជាកុងត្រូលជជុះអ៊ីចឹង»។
ជុំវិញបញ្ហាខាងលើនេះ អ្នកសារព័ត៌មានយើងបានព្យាយាមទំនាក់ទំនងតាមរយៈលេខទូរស័ព្ទ ដើម្បីសុំការបំភ្លឺពីលោក ណាង អនុប្រធានគ្រប់គ្រងស្ថានីយជញ្ជីងទាំង២កន្លែងនេះដែរ ប៉ុន្តែតេចូល ត្រូវលោកប្រាប់ថា «រូបលោកមិនមែនកាន់នៅកន្លែងនឹងទេ អ្នកសារព័ត៌មានច្រឡំលេខហើយ»… ហេ! ហ! បានកាន់ជញ្ជីងថ្លឹងឡាន ដូចមានហុងស៊ុយលុយហូរចូល ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ