ពេជ្រ មានប្រវត្តិយូរអង្វែងជាង៤០០០ឆ្នាំ និងជាវត្ថុដ៏ស្រស់ស្អាតនៃក្តីប្រាថ្នារបស់មនុស្សទូទៅ តាំងពីបុរាណសម័យ រហូតដល់បច្ចុប្បន្ននេះ ។ ប្រជាជនកម្ពុជាយើង ក៏បានប្រើប្រាស់ចិញ្ចៀនពេជ្រ ជានិមិត្តរូបនៃការភ្ជាប់ពាក្យកូនកំលោះ និងកូនក្រមុំផងដែរ
ពេជ្រ មានប្រវត្តិយូរអង្វែងជាង៤០០០ឆ្នាំ និងជាវត្ថុដ៏ស្រស់ស្អាតនៃក្តីប្រាថ្នារបស់មនុស្សទូទៅ តាំងពីបុរាណសម័យ រហូតដល់បច្ចុប្បន្ននេះ ។ ប្រជាជនកម្ពុជាយើង ក៏បានប្រើប្រាស់ចិញ្ចៀនពេជ្រ ជានិមិត្តរូបនៃការភ្ជាប់ពាក្យកូនកំលោះ និងកូនក្រមុំផងដែរ។
តើហេតុអ្វីបានជាពេជ្រ មានតម្លៃខ្លាំង ហើយវាមានប្រវត្តិសាស្ត្របែបណា?
ដើម្បីជាចំណេះដឹងទូទៅ ពាក់ព័ន្ធនឹងពេជ្រ ថ្ងៃនេះកម្មវិធីលុយ នៃសារព័ត៌មានកោះសន្តិភាព សូមចែករំលែកប្រវត្តិ និងដំណើរសាច់រឿងទាក់ទងនឹងពេជ្រ ទុកជាចំណេះដឹង ។
ប្រវត្តិសាស្ត្រនៃត្បូងពេជ្រ បានកើតចេញតាំងពីរាប់ពាន់ឆ្នាំកន្លងមកម្ល៉េះ ហើយក៏មានរឿងនិទានជាច្រើន ដែលត្រូវបានគេនិទានពាក់ព័ន្ធនឹងអំណាចអាថ៌កំបាំងភាពស្រស់ស្អាត និងថាមពលខាងវិញ្ញាណ ។
តាមការកត់ត្រា ជនជាតិក្រិច បុរាណជឿថា ពេជ្រ គឺជាទឹកភ្នែកព្រះជាម្ចាស់។ ពេជ្រ ត្រូវបានគេគិតថា គឺជាត្បូងអាថ៌កំបាំង និងមានឥទ្ធិពលដែលប៉ះពាល់ដល់ឋានសួគ៌ និងដួងចិត្តរបស់មនុស្សជាតិ។ ពេជ្រ ត្រូវបានគេស្គាល់ និងចាត់ទុកជាវត្ថុមានតម្លៃអស់រយៈពេលប្រមាណជាជាង៤០០០ឆ្នាំមកហើយ។ នៅពេលសព្វថ្ងៃនេះ ពេជ្រ នៅតែរក្សាភាពទាក់ទាញរបស់វា ខណៈដែលបច្ចេកវិទ្យាកែច្នៃពេជ្រ គឺកាន់តែទំនើប ហើយក្រៅពីអំណាចដ៏អាថកំបាំង វាក៏មានតម្លៃផ្នែកឧស្សាហកម្ម និងវិទ្យាសាស្ត្រផងដែរ ។
យោងតាមអ្នកបុរាណវិទូ ពេជ្រ ត្រូវបានគេរកឃើញជាលើកដំបូង នៅក្នុងប្រទេសឥណ្ឌា រង្វង់ឆ្នាំ២៥០០ ឆ្នាំមុនគ.ស នៅក្នុងតំបន់ Golconda ចន្លោះទន្លេ Godavari និង Krishna ហើយក្រោយមក នៅសតវត្សរ៍ទី១០មក ពួកបច្ចឹមប្រទេសក៏ចាប់ផ្តើមទទួលស្គាល់តម្លៃនៃពេជ្រផងដែរ។
ជនជាតិអឺរ៉ុប បានប្រើប្រាស់ពេជ្រនេះ ជានិមិត្តសញ្ញាឋានៈ។ ពេញមួយយុគសម័យកណ្តាល ពេជ្រ ត្រូវបានគេស្វែងរកធ្វើជាគ្រឿងអលង្កាដ៏មានតម្លៃ ។
នៅឆ្នាំ១២៨៦ បុព្វជិតកាតូលិកមួយរូប គឺលោកបូជាចារ្យ ហ្គីឡូម ឌូរ៉ាន ( Guillaume Durand ) បានកត់ត្រានៅក្នុងសៀវភៅអប់រំជំនឿរបស់លោកថា «ពេជ្រ គឺត្បូង មិនអាចបំបែកបាន ហើយស្រឡាញ់មិនអាចរលត់ និងមានឥទ្ធិពលលើការស្លា.ប់ ។ ដូច្នេះវាសមនឹងពាក់នៅលើម្រាមដៃ ដែលមានសរសៃដែលចេញពីបេះដូងដោយផ្ទាល់»។
ដោយសារតែកំណត់ត្រានេះហើយ ទើបការបំពាក់ចិញ្ចៀនពេជ្រ បានក្លាយជានិមិត្តរូបនៃការភ្ជាប់ពាក្យរវាងបុរស និងនារី រហូតដល់សម័យបច្ចុប្បន្ន ។
ពេជ្រ គឺជាដុំថ្មដ៏ស្រស់ស្អាតដែលរកឃើញដោយឥណ្ឌា ប៉ុន្តែក្រោយមក គេក៏រកឃើញនៅប្រេស៊ីល និងនៅអាហ្វ្រិក ហើយគុណតម្លៃ និងលក្ខណៈសម្បត្តិនៃពេជ្រ គឺកាន់តែត្រូវមនុស្សឱ្យតម្លៃ រហូតចាត់ទុកពេជ្រ គឺជាវត្ថុមានតម្លៃបំផុតនៃតេជៈ និងឫទ្ធិអំណាច ដូច្នេះហើយទើបបានជានៅលើមកុដរបស់មហាក្សត្រ នៅបច្ចឹមប្រទេសនាសម័យបុរាណ គឺសុទ្ធតែមានដាំពេជ្រទាំងអស់ ។
ក្រៅពីនេះ ចំណុចដែលពេជ្រ កាន់តែមានតម្លៃបន្ថែមទៀតនោះ គឺនៅក្នុងឧស្សាហកម្ម និងបច្ចេកវិទ្យាសាស្ត្រ ដោយសារតែវាផ្សំឡើងដោយសមាសភាពអាតូម ដ៏ស្មុគស្មាញ ហើយគេបានប្រើប្រាស់វានៅក្នុងឧស្សាហកម្ម និងផលិតកម្មផលិតផលវិទ្យាសាស្ត្រជាច្រើន នៅពេលនេះ ។
អត្ថបទដោយ ៖ ស ផាត់
ចែករំលែកព័តមាននេះ