ទីក្រុងបាងកក៖ បញ្ហាខ្មោចលងត្រូវមនុស្សនៅទូទាំងពិភពលោកមានជំនឿតគ្នា មិនថានៅប្រទេសណាទេ។ ជាពិសេសនៅទ្វីបអាស៊ីមានជំនឿរឹតតែខ្លាំង។ ប៉ុន្តែថ្មីៗនេះនិស្សិតជនជាតិថៃពីរនាក់មានចិត្តសឿងអស្ចារ្យ មិនត្រូវការខ្លបខ្លាចអំណាចរបស់ខ្មោចលងទេ។ ពួកគេនឹកឃើញវិធីរកលុយមួយបែបដែលអ្នកដទៃទៀតមិនដែលចាប់អារម្មណ៍។ ពួកគេផ្ដល់សេវាទៅដេកនៅផ្ទះណា ឬទីកន្លែងណាដែលល្បីថាមានខ្មោចលងសាហាវៗ ឬទីកន្លែងដែលមានមនុស្សស្លាប់។ ពួកគេផ្ដួចផ្ដើមបង្កើតសេវានេះដើម្បីចូលរួមដោះស្រាយបញ្ហាភ័យខ្លាចរបស់មនុស្ស។ កាលពីពេលកន្លងមក អ្នកម្ចាស់ផ្ទះខ្លះសុខចិត្តចាកចោលផ្ទះរបស់ខ្លួនព្រោះខ្លាចខ្មោច។ ដូច្នេះ អ្នកដែលទិញផ្ទះខ្មោចតពីគេអាចរកសេវាពីនិស្សិតទាំងពីរនាក់ដើម្បីបំបាត់ការភ័យខ្លាច។
និស្សិតនៅខេត្តឆៀងម៉ៃទាំងពីរនាក់ប្រាប់ថាពួកគេផ្ដល់សេវាទៅដេកនៅកន្លែងណា ឬផ្ទះណាដែលធ្លាប់មានមនុស្សស្លាប់ ឬដែលគេចំណាំហៅថាផ្ទះខ្មោច។ ពួកគេចាប់ផ្ដើមផ្សព្វផ្សាយកាលពីថ្ងៃទី១៥ ខែមករា។ ផ្សាយនេះមិនមែនផ្សាយលេងសើចទេ ប៉ុន្តែជាការផ្សាយពិតមែន។ ពួកគេនឹកឃើញគំនិតនេះឡើងបន្ទាប់ពីស្រាវជ្រាវនៅប្រទេសជប៉ុនឃើញថានៅជប៉ុនក៏មានគេផ្ដល់សេវាស្រដៀងគ្នានេះផងដែរ។ នៅជប៉ុនមានអ្នកផ្ដល់សេវាដេកនៅក្នុងផ្ទះ ឬកន្លែងណាដែលល្បីថាមានខ្មោចលង។
គេផ្ញើសារតាមហ្វេសប៊ុកដើម្បីចង់ទិញសេវាដេកផ្ទះខ្មោចពីនិស្សិតថៃទាំងពីរនាក់ពួកគេម្នាក់ឈ្មោះវីហ្វីឆឹង (Wifei Cheng) និងម្នាក់ទៀតឈ្មោះសេដ្ឋាវុទ្ធ (Sretthawut)។ បន្ទាប់ពីផ្សាយតាមហ្វេសប៊ុកបានតែបន្តិចក៏មានគេចាប់អារម្មណ៍។ អ្នកខ្លះទាក់ទងទៅពួកគេសួររឿងតម្លៃ។ មិនមែនតែអ្នកខេត្តឆៀងម៉ៃប៉ុណ្ណោះទេ សូម្បីតែអ្នកនៅកន្លែងដទៃទៀតទូទាំងប្រទេសថៃក៏ទាក់ទងទៅពួកគេដែរ។ ភាគច្រើនជាអ្នកទុកផ្ទះចោល ឬអ្នកជួល និងទិញផ្ទះខ្មោច។
មុនដំបូង ពួកគេគិតថាផ្ដល់សេវាតែនៅក្នុងខេត្តឆៀងម៉ៃមួយប៉ុណ្ណោះ គិតលុយមួយយប់ចាប់ពី១ពាន់បាតឡើងទៅ (២៨ដុល្លារ)។ បើផ្ទះណាល្បីថាមានខ្មោចលងកាន់តែខ្លាំង ពួកគេគិតលុយកាន់តែច្រើន។ ពួកគេបញ្ជាក់ថាតម្លៃនេះគិតតែថ្លៃដេកប៉ុណ្ណោះ។ ចំពោះការចំណាយលើការធ្វើដំណើរ ហូបចុក ស្នាក់នៅជាបន្ទុករបស់ម្ចាស់ផ្ទះដែលត្រូវចេញលុយបន្ថែម។
ការផ្ដល់សេវាដេកនៅផ្ទះខ្មោចលងនេះរួមបញ្ចូលទាំងការធ្វើរបាយការណ៍លម្អិតនៅពេលដេកនៅក្នុងផ្ទះ ឬនៅដីឡូតិ៍នោះតើជួបប្រទះនឹងរឿងអ្វីខ្លះ? ត្រូវថតជាវីឌីអូឃ្លីប និងត្រូវកត់ត្រាជាលាយលក្ខណ៍អក្សរ។ ធ្វើបែបនេះដើម្បីឱ្យអ្នកជួលផ្ទះ ឬអ្នកទិញផ្ទះខ្មោចអាចជ្រាបជាព័ត៌មាន។ បុរសទាំងពីរប្រាប់ថាខ្លួនផ្ដល់សេវានេះមិនមែនដើម្បីផលិតមាតិកា ឬបង្កើតព្រឹត្តិការណ៍ភ្ញាក់ផ្អើលអ្វីទេ។ ប៉ុន្តែពួកគេផ្ដោតសំខាន់ទៅលើការរកប្រាក់ចំណូលចិញ្ចឹមជីវិតនៅពេលកំពុងរៀនមហាវិទ្យាល័យ។
ផ្ទះវីឡាដែលគេទុកចោលនៅប្រទេសថៃដែលល្បីថាខ្មោចលងសាហាវពួកគេផ្ដល់សេវានេះសម្រាប់ម្ចាស់ផ្ទះ ឬអ្នកទិញផ្ទះដែលចង់ជួលពួកគេទៅដេកដើម្បីបញ្ជាក់ថាមានខ្មោចដែរឬទេ។ ដូច្នេះ បើអ្នកដទៃគ្មានកិច្ចការអ្វីទេ ហើយចង់ចាញ់ចង់ឈ្នះជាមួយពួកគេ ឬចង់ធ្វើតេស្តខ្មោចលងជាមួយពួកគេ ពួកគេសូមមិនលេងចូលជាមួយទេ។ ពួកគេមិនទាន់កំណត់ថាត្រូវយកថ្លៃប៉ុន្មានទេ, ស៊ីសងលើការចរចាគ្នា។ ពួកគេក៏ផ្ដល់សេវាដទៃទៀតដូចជាទៅដេកកំដសពជាដើម។ សំខាន់ឱ្យតែសេវាពាក់ព័ន្ធនឹងខ្មោច សព ឬខ្មោចលង ពួកគេអាចផ្ដល់ជូនបានទាំងអស់។
ផ្ទះវីឡាដែលគេទុកចោលនៅប្រទេសថៃដែលល្បីថាខ្មោចលងសាហាវនៅក្នុងចំណោមអ្នកទាំងពីរ វីហ្វីឆឹងជាមនុស្សមិនខ្លាចខ្មោច។ ចំណែកសេដ្ឋាវុទ្ធជាមនុស្សកំពូលខ្លាចខ្មោច។ ប៉ុន្តែគាត់នៅតែចង់ប្រឡូកក្នុងមុខរបរនេះ។ ទោះបីពួកគេមិនដែលជួបប្រទះនឹងខ្មោចលងផ្ទាល់ភ្នែក ហើយមិនដឹងថាខ្មោចមានមែនឬអត់ ប៉ុន្តែពួកគេតាំងចិត្តថាត្រូវតែចាប់អាជីពនេះមិនបកក្រោយវិញទេ, មានតែជម្រុលទៅមុខថែមទៀត។ សេដ្ឋាប្រាប់ថាដើម្បីធានាសុវត្ថិភាពផ្ទាល់ខ្លួន, គាត់នឹងស្វែងរកវត្ថុស័ក្ដិសិទ្ធិ ឬរបស់ការពារខ្លួនដើម្បីពាក់ពេញខ្លួនកុំឱ្យខ្មោចមកក្បែរបាន។ មើលមិនឃើញ ថាមិនត្រូវ, បើមុខរបរនេះកាក់កប ទៅថ្ងៃមុខ ពួកគេអាចនឹងពង្រីកអាជីពនេះ និងពង្រីកសមាជិកកាន់តែច្រើន៕
ប្រភព៖ The Thaiger, The Star និងប្រភពដទៃទៀត
https://thethaiger.com/news/national/students-offer-to-sleep-in-death-marked-properties-for-1000-baht-a-night
https://www.thestar.com.my/aseanplus/aseanplus-news/2024/01/18/students-advertise-a-ghost-free-certifying-service-in-chiang-mai
https://www.nationthailand.com/thailand/general/40034801
ចែករំលែកព័តមាននេះ