រដ្ឋាភិបាលរបស់លោកមូអាម៉ា កាដាហ្វី ដែលកងទ័ពបានបាញ់ផ្លោងកាលពីថ្ងៃទី២៦ ឧសភា ដោយកាំភ្លើងត្បាល់លើទីក្រុងកំពង់ផែមីស្ត្រាតា បានផ្ញើជូនមេដឹកនាំជាច្រើននូវសំណើឈប់បាញ់គ្នាជាបន្ទាន់ដែលធ្វើឱ្យពួកអ្នកសង្កេតការណ៍ទាំងឡាយមានការភ្ញាក់ផ្អើល។
សហរដ្ឋអាមេរិកដែលចូលរួមនាថ្ងៃទី២៦ និង២៧ ឧសភា ក្នុងកិច្ចប្រជុំកំពូល G-8 ក្នុងទីក្រុង DEAUVILLE បានវាយតម្លៃសំណើបទឈប់បាញ់នេះរបស់លីប៊ីថា ពុំគួរឱ្យជឿជាក់។ គេរង់ចាំបណ្តាអ្នកចូលរួមក្នុងកិច្ចប្រជុំនេះអះអាងជាថ្មីពីឆន្ទៈឱ្យទទួលបានការចាកចេញពីអំណាចរបស់លោកកាដាហ្វី។ ប្រទេសអេស្ប៉ាញគូសបញ្ជាក់កាលពីថ្ងៃទី២៦ ឧសភា ពីការទទួលដូចដៃគូអឺរ៉ុបជាច្រើនទៀតដែរនូវសំណើឈប់បាញ់គ្នាជាបន្ទាន់នោះ ពីសំណាក់នាយករដ្ឋមន្ត្រីលីប៊ី លោកអាល់បាក់ ដាឌី អាល់ម៉ាមូឌី។
ក្នុងសន្និសីទសារព័ត៌មានមួយនៅទីក្រុងទ្រីប៉ូលីនាយករដ្ឋមន្ត្រីលីប៊ីអះអាងថា សំណើរបស់លីប៊ីផ្អែកលើផែនការបង្ហាញផ្លូវរបស់សហភាពអាហ្វ្រិកដែលសំដៅដោះស្រាយជម្លោះ ក៏ប៉ុន្តែមិនបាននិយាយយោងដល់អនាគតរបស់លោកកាដាហ្វីដែលជាបញ្ហាគន្លឹះនៃរាល់ដំណោះស្រាយជាយថាហេតុឡើយ។ នាយករដ្ឋមន្ត្រីរូបនេះបន្តថា លីប៊ីពិតជាចង់ឱ្យមានបទឈប់បាញ់គ្នាមួយ។ ក៏ប៉ុន្តែលោកបន្តថា មេដឹកនាំលោកមូអាម៉ា កាដាហ្វី គឺជាមេដឹកនាំរបស់ប្រជាជនលីប៊ី។
សំណើឈប់បាញ់ជាច្រើនរបស់ក្រុងទ្រីប៉ូលី ត្រូវបដិសេធដោយពួកបះបោរ។ ប្រមុខក្រុមប្រឹក្សាជាតិបណ្តោះអាសន្នលីប៊ីថ្លែងថា យើងទទួលយករាល់ការផ្តួចផ្តើមគំនិតផ្អែកលើការចាកចេញរបស់លោកកាដាហ្វី កូនប្រុសលោក និងរបបលោក។ ប្រទេសរុស្ស៊ីអះអាងកាលពីថ្ងៃទី២៦ ឧសភា ថា ខ្លួនត្រូវបានពួកលោកខាងលិចក៏ដូចជាក្រុងទ្រីប៉ូលីស្នើឱ្យធ្វើអាជ្ញាកណ្តាលក្នុងជម្លោះលីប៊ីដូច្នេះប្រសិនបើនោះក្លាយជាការពិតវានឹងជាតំណាងនៃការរីកចំរើនមួយក្នុងវិបត្តិនេះ ៕
ចែករំលែកព័តមាននេះ