ខេត្តស្វាយរៀង ៖ បុរសវ័យ៥៧ឆ្នាំម្នាក់បានឆក់ខ្សែភ្លើងស្លាប់ភ្លាមៗ ក្រោយគាត់ជួសជុលអណ្តូងស្នប់ភ្ជាប់ម៉ូទ័របូមទឹកមិនបានដកឌុយចេញពីហ្វ្រីភ្លើង បណ្តាលអោយឆ្លងចរន្តអគ្គិសនីឆក់ស្លាប់ភ្លាមៗយ៉ាងអាណោចអាធ័ម ។ ករណីនេះ បានកើតឡើងនៅថ្ងៃកាលពីថ្ងៃទី១៥ ខែមករា ឆ្នាំ២០២៤…
ខេត្តស្វាយរៀង ៖ បុរសវ័យ៥៧ឆ្នាំម្នាក់បានឆក់ខ្សែភ្លើងស្លាប់ភ្លាមៗ ក្រោយគាត់ជួសជុលអណ្តូងស្នប់ភ្ជាប់ម៉ូទ័របូមទឹកមិនបានដកឌុយចេញពីហ្វ្រីភ្លើង បណ្តាលអោយឆ្លងចរន្តអគ្គិសនីឆក់ស្លាប់ភ្លាមៗយ៉ាងអាណោចអាធ័ម ។ ករណីនេះ បានកើតឡើងនៅថ្ងៃកាលពីថ្ងៃទី១៥ ខែមករា ឆ្នាំ២០២៤ វេលាម៉ោង១៣និង១៥នាទីរសៀលស្ថិតនៅភូមិ ព្រៃភ្នៀត ឃុំសំឡី ស្រុកកំពង់រោទិ៍ ខេត្តស្វាយរៀង ។
បើតាមសមត្ថកិច្ចនគរបាលប៉ុស្តិ៍រដ្ឋបាលឃុំសំឡីបានឱ្យដឹងថា សមត្ថកិច្ចទទួលបានព័ត៌មានពីលោកមេភូមិព្រៃភ្នៀត តាមរយៈទូរសព្ទថា មានករណីមនុស្សស្លាប់ដោយឆក់ខ្សែភ្លើង ។ ក្រោយពីទទួលបានព័ត៌មានខាងលើនេះភ្លាម កម្លាំងជំនាញនៃអធិការដ្ឋាននគរបាលស្រុកកំពង់រោទិ៍បានសហការជាមួយកម្លាំងប៉ុស្តិ៍នគរបាលរដ្ឋបាលឃុំសំឡី និងលោកមេភូមិព្រៃភ្នៀត បានចុះដល់កន្លែងកើតហេតុ ដើម្បីពិនិត្យនិងធ្វើកោសល្យវិច័យ។
ប្រភពបានឱ្យដឹងទៀតថា តាមការបំភ្លឺរបស់ឈ្មោះ ព្រាប សំអួន ភេទស្រី អាយុ៥៦ឆ្នាំនៅភូមិព្រៃភ្នៀតឃុំសំឡី ត្រូវជាប្រពន្ធរបស់សពរងគ្រោះបានឆ្លើយប្រាប់សមត្ថកិច្ចជំនាញថា នៅវេលាម៉ោងប្រហែល៩ព្រឹក ប្ដីរបស់ឈ្មោះនង ភាព អាយុ៥៧ឆ្នាំ មុខរបរជាកសិករ បានអង្គុយធ្វើអណ្តូងស្នប់ដែលមិនមានទឹកចេញនៅខាងមុខផ្ទះរបស់ខ្លួនដោយតភ្ជាប់ខ្សែភ្លើង (ធ្វើអណ្តូងស្នប់ទៅម៉ូទរ័ទឹក) ហើយជនរងគ្រោះជាប្ដីបានប្រើគាត់ឱ្យទៅទិញជ័របិទទុយោជ័រធ្វើតអណ្តូង ពេលគាត់ត្រឡប់មកវិញ ស្រាប់តែឃើញប្ដីរបស់ខ្លួនដេកជិតអណ្តូងទើបដឹងថាប្ដីគាត់ឆ្លងចរន្តអគ្គិសនីឆក់ដួលដេកក្បែរអណ្តូងទៅហើយ ឃើញដូច្នេះ ខ្លួនក៏បានស្រែកអោយបងប្អូនអ្នកភូមិមកជួយសង្គ្រោះ ប៉ុន្តែអកុសលប្ដីរបស់គាត់បានស្លាប់បាត់បង់ជីវិតទៅហើយ ។
ភ្លាមនោះ សមត្ថកិច្ចបានចុះដល់ផ្ទះកើតហេតុដើម្បីធ្វើការពិនិត្យលើដងខ្លួនសាកសព ដោយពិនិត្យពុំមានស្លាកស្នាមរលាត់ឬដាច់ទេ (មានតែស្នាមជាំបាតដៃខាងស្តាំ)។ បន្ទាប់ពីធ្វើការពិនិត្យ ធ្វើកោសល្យវិច័យលើសពរួចកម្លាំងជំនាញនៃអធិការនគរបាលស្រុកកំពង់រោទិ៍ និងកម្លាំងនគរបាលប៉ុស្តិ៍រដ្ឋបាលឃុំសំឡីបានសន្និដ្ឋានថា ឈ្មោះ នាង ភាព(ជនរងគ្រោះ)ពិតជាត្រូវបានឆ្លងចរន្តអគ្គិសនីឆក់បណ្ដាលឱ្យស្លាប់ពិតប្រាកដមែន ។ មូលហេតុជួសជុលអណ្តូងស្នប់មានការធ្វេសប្រហេស(ខ្វះការប្រុងប្រយ័ត្ន) ។
បច្ចុប្បន្ន សពជនរងគ្រោះសមត្ថកិច្ចជំនាញនៃអធិការដ្ឋាននគរបាលស្រុកកំពង់រោទិ៍ និងកម្លាំងប៉ុស្តិ៍នគរបាលរដ្ឋបាលឃុំសំឡីបានប្រគល់ជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ