ខេត្តសៀមរាប ៖ មន្ដ្រីជំនាញរដ្ឋបាលព្រៃឈើបានប្ដេជា្ញសាជាថ្មីក្នុងការទប់ស្កាត់បទល្មើសព្រៃឈើគ្រប់ប្រភេទ ជាពិសេសបទល្មើសដឹកជញ្ជូនឈើគ្រញូង ដោយប្រើយុទ្ធសាស្ដ្រកាត់ផ្ដាច់ឫសគល់នៃបទល្មើស គឺបើកការត្រួតពិនិត្យឡើងវិញរាល់ដេប៉ូឈើ និងសិប្បកម្មដែលមានចំនួនយ៉ាងច្រើនសន្ធឹកសន្ធាប់ទូទាំងខេត្ដ
ខេត្តសៀមរាប ៖ មន្ដ្រីជំនាញរដ្ឋបាលព្រៃឈើបានប្ដេជា្ញសាជាថ្មីក្នុងការទប់ស្កាត់បទល្មើសព្រៃឈើគ្រប់ប្រភេទ ជាពិសេសបទល្មើសដឹកជញ្ជូនឈើគ្រញូង ដោយប្រើយុទ្ធសាស្ដ្រកាត់ផ្ដាច់ឫសគល់នៃបទល្មើស គឺបើកការត្រួតពិនិត្យឡើងវិញរាល់ដេប៉ូឈើ និងសិប្បកម្មដែលមានចំនួនយ៉ាងច្រើនសន្ធឹកសន្ធាប់ទូទាំងខេត្ដ ដែលសង្ស័យថាមានលួចលាក់បំពួនតាំងលក់ឈើគ្មានប្រភពស្របច្បាប់ និងបន្លំអារច្រៀកឈើគ្រញូងសម្រាប់នាំចេញទៅកាន់ទីផ្សារងងឹត។
ការប្ដេជ្ញាសាជាថ្មីនេះធ្វើឡើង ខណៈដែលខេត្ដសៀមរាបត្រូវបានគេសង្កេតឃើញកើតមានបទល្មើសដឹកជញ្ជូនផល-អនុផលព្រៃឈើយ៉ាងពពាក់ពពូន និងបានជាប់ចំណាត់ថ្នាក់ខ្ពស់ក្នុងចំណោមខេត្ដនាំឈើគ្រញូងខុសច្បាប់ទៅកាន់ខេត្ដកំពង់ចាមជាប់ព្រំដែនយួន ដែលធ្វើឱ្យក្រុមអ្នកតាមដានបទល្មើព្រៃឈើសម្ដែងនូវការមិនជឿជាក់ចំពោះការប្រឹងប្រែងទប់ស្កាត់ដែលរាងជ្រេពេលបន្ដិចទៅហើយ។
លោកវណ្ណ សុផាន់ណ្ណា នាយអធិការដ្ឋានរដ្ឋបាលព្រៃឈើខាងជើងបឹងទន្លេសាប ដែលមានវិសាលភាពគ្រប់គ្រងខេត្ដចំនួន៥ រួមមានខេត្ដសៀមរាប បន្ទាយមានជ័យ ឧត្ដរមានជ័យ ព្រះវិហារ និងខេត្ដកំពង់ធំផងនោះ បានថ្លែងនៅក្នុងបទសម្ភាសន៍ដាច់ដោយឡែកកាលពីព្រឹកថ្ងៃទី២៦ ឧសភា កន្លងមកនេះថា ទោះបីជាពេលនេះបញ្ហាឈើគ្រញូងវាបានរំកិលទៅដល់ដំណាក់កាលចុងក្រោយនៃការអន្ដរាយក៏ដោយ ក៏យើងនៅតែប្រឹងប្រែងរិះរកគ្រប់មធ្យោបាយស្ដារស្ថានការណ៍ដ៏អាក្រក់នោះឡើងវិញឱ្យខាងតែបាន គឺយើងនឹងពង្រឹងសមត្ថភាពដល់មន្ដ្រីក្រោមឱវាទទាំងអស់ឡើងវិញ ដើម្បីការពារឈើគ្រញូងដែលនៅសេសសល់នាដំណាក់កាលចុងក្រោយនេះ។
លោកបានបញ្ជាក់ថា សកម្មភាពដឹកជញ្ចូនឈើគ្រញូងដែលកំពុងតែមានហាងឆេងទៅកាន់ខេត្ដជាប់ព្រំដែនប្រទេសយួន ឆ្លងកាត់ខេត្ដកំពង់ធំ ត្រូវបានមើលឃើញថា កំពុងមានសន្ទុះកើនឡើងគួរឱ្យព្រួយបារម្ភ ហើយឈើទាំងនោះភាគច្រើនមានប្រភពនាំចេញពីខេត្ដសៀមរាប។ ដូច្នេះ ដើម្បីទប់ស្កាត់ឱ្យបានទាំងស្រុងនូវសកម្មភាពល្មើសច្បាប់ទាំងនោះ យើងត្រូវតែកាត់ផ្ដាច់ឫសគល់នៃប្រភពនាំចេញឈើប្រភេទនោះឱ្យអស់ជាមុនសិន គឺយើងចាំបាច់ត្រូវតែបើកយុទ្ធនាការចុះត្រួតពិនិត្យគ្រប់ដេប៉ូទិញ-លក់ឈើ និងសិប្បកម្មកែច្នៃឈើទាំងមានច្បាប់ទាំងអត់ច្បាប់ ដែលសង្ស័យថាមាននាំចូលឈើពុំមានប្រភពស្របច្បាប់មកតាំងលក់ ព្រមទាំងអារច្រៀកឈើគ្រញូងសម្រាប់នាំចេញទៅកាន់ទីផ្សារងងឹងនោះ។
លោកបានបញ្ជាក់ទៀតថា ដើម្បីជំរុញយុទ្ធនាការនេះឱ្យមានប្រសិទ្ធភាពខ្ពស់បំផុតនោះកម្លាំងមន្ដ្រីរដ្ឋបាលចំនួន២០រូបមកពីខេត្ដកំពង់ធំ ត្រូវបានគេបញ្ជូនមកជួយអន្ដរាគមន៍ដល់មន្ដ្រីរដ្ឋបាលព្រៃឈើសៀមរាប ក្នុងការចុះត្រួតពិនិត្យគ្រប់កន្លែងសង្ស័យ ហើយប្រតិបត្ដិការនេះបានចាប់ផ្ដើមកាលពីថ្ងៃទី២៥ ឧសភា ដោយផ្ដើមចេញពីតំបន់ស្រែណូយ នៃស្រុកវ៉ារិន របស់ខេត្ដសៀមរាប ដែលជាតំបន់មួយក្នុងចំណោមតំបន់កើតមានបទល្មើសព្រៃឈើគ្រប់ប្រភេទដ៏ចម្រូងចម្រាស។
ពេញមួយថ្ងៃទី២៥ ឧសភា កម្លាំងប្រតិបត្ដិការដែលដឹកនាំផ្ទាល់ដោយលោកវណ្ណ សុផាន់ណា្ណ បានឆ្មក់ចូលដេប៉ូឈើ និងសិប្បកម្មចំនួន៨កន្លែងនៅក្នុងឃុំស្រែណូយដែលគ្រានោះឈើប្រមាណជិត៤០ម៉ែត្រគូបត្រូវបានរឹបអូស ក្នុងនោះមានឈើគ្រញូងចំនួនជាង១០ម៉ែត្រគូប។ ហើយជនជាតិយួនចំនួនពីរនាក់ដែលជាថៅកែ និងអ្នកទម្លាក់លុយទៅឱ្យបណ្ដាញល្មើសច្បាប់ប្រមូលទិញឈើគ្រញូងនៅក្នុងតំបន់ស្រែណូយនោះត្រូវបានចាប់ខ្លួន ហើយបច្ចុប្បន្នកំពុងតែនាំខ្លួនមកសាកសួររកអ្នកពាក់ព័ន្ធមកទទួលខុសត្រូវមុននឹងបញ្ជូនខ្លួនពួកគេទៅតុលាការដើម្បីផ្ដន្ទាទោសទៅតាមច្បាប់ស្ដីពីព្រៃឈើ ហើយចំពោះអ្នកពាក់ព័ន្ធក៏ប្រឈមនឹងបទប្រព្រឹត្តអំពើពុករលួយផងដែរ ។ ដោយឡែកនៅព្រឹកថ្ងៃបន្ទាប់ គឺនៅថ្ងៃទី២៦ ឧសភា កម្លាំងប្រតិបត្ដិការដដែលនោះចែកជាច្រើនមុខព្រួញបន្ដធ្វើការឆ្មក់ចូលឆែកឆេរដេប៉ូឈើ និងសិប្បកម្មជាច្រើនទៀតនៅក្នុងក្រុងសៀមរាបដែលគេសង្ស័យថា បានប្រព្រឹត្តកំហុសឆ្គងស្រដៀងគ្នានឹងទីតាំងចំនួន៨ខាងលើ ក៏ប៉ុន្ដែលទ្ធផលចុះត្រួតពិនិត្យនោះមិនត្រូវបានមន្ដ្រីជំនាញណាម្នាក់ចេញមុខមកអះអាងដោយផ្ទាល់នៅឡើយទេ ដោយម្នាក់ៗសុទ្ធតែឆ្លើយទម្លាក់ឱ្យគ្នាទៅវិញទៅមក ។
នាយអធិការដ្ឋានរដ្ឋបាលព្រៃឈើខាងជើងបឹងទន្លេសាបលោកវណ្ណ សុផាន់ណ្ណា បានថ្លែងបញ្ជាក់ផងដែរថា តាមការស្រាវជ្រាវឃើញថាជារៀងរាល់ថ្ងៃមានរថយន្ដតូចធំគ្រប់ប្រភេទ ជាពិសេសគោយន្ដកន្ដ្រៃរាប់រយគ្រឿង បានសម្រុកដឹកឈើគ្រញូងដែលនៅសេសសល់ចេញពីតំបន់ព្រៃជិតឆ្ងាយ ចូលមកក្នុងរោងសិប្បកម្មជាច្រើនកន្លែង តាំងពីនៅតាមមាត់ទីប្រជុំជន ដើម្បីអារច្រៀកឈើទាំងនោះទៅតាមប្រភេទឈើជ្រុងឬឈើថ្លឹងគីឡូ មុននឹងត្រូវបាននាំចេញទៅកាន់ទីផ្សារងងឹតឯខេត្ដកំពង់ចាម តាមរូបភាពផ្សេងៗ ដែលបញ្ហាទាំងអស់នេះទាមទារឱ្យមន្ដ្រីជំនាញគ្រប់គ្រងតំបន់មានការទទួលខុសត្រូវខ្ពស់។
ទោះបីជាយ៉ាងណា ក្រុមអ្នកឃ្លាំមើលបទល្មើសព្រៃឈើបានលើកឡើងថា ពួកគេមានការស្វាគមន៍ចំពោះចំណាត់ការសង្គ្រោះឈើគ្រញូងដែលជាធនធានដ៏មានតម្លៃរួមរបស់ពលរដ្ឋខ្មែរគ្រប់រូប។ ប៉ុន្ដែគេក៏បានលើកឡើងដែរថា វាហាក់ដូចជាយឺតពេលបន្តិចទៅហើយសម្រាប់ចំណាត់ការនេះ និងគ្មានសង្ឈឹមថាបានទទួលជោគជ័យជាដុំកំភួននោះទេ ព្រោះកន្លងមកក៏ឃើញមានការប្ដេជ្ញាចិត្ដយ៉ាងដូច្នេះដែរ តែវាបានរលត់ទៅបាត់ដោយបន្សល់តែភាពមន្ទិលសង្ស័យរហូតមក ។
គួរបញ្ជាក់ផងដែរថា កាលពីអំឡុងដើមឆ្នាំ ២០១០ កន្លងទៅនេះ សមត្ថកិច្ចចម្រុះក៏បានបើកប្រតិបត្ដិការយ៉ាងក្ដៅគគុកផងដែរបង្ក្រាបទៅលើដេប៉ូឈើ និងឃ្លាំងឈើរបស់ក្រុមអ្នកមានលុយកាក់ និងអំណាច ដោយធ្វើការរឹបអូសបានឈើគ្រប់ប្រភេទប្រមាណជាង១.០០០ម៉ែត្រគូប ប៉ុន្ដែមិនត្រូវបានយកមករក្សាទុកដោយរដ្ឋបាលព្រៃឈើទេ គឺធ្វើកំណត់ត្រារក្សាទុកនៅក្នុងឃ្លាំងធំៗនោះដដែល ដើម្បីកោះហៅម្ចាស់ឈើទាំងនោះមកបង់ពិន័យអន្ដរកាលតាមច្បាប់។ តែរហូតដល់ពេលនេះគេនៅមិនទាន់ឃើញមានម្ចាស់ឈើណាម្នាក់ចូលខ្លួនមកបង់ពិន័យបានមួយកាក់មួយសេនចូលខ្ទង់ថវិការដ្ឋនៅឡើយទេ។ ដូច្នេះមានសំណួរសួរថា តើប្រតិបត្ដិការពេលនេះមានអ្វីខុសប្លែកពីពេលមុន ឬក៏គ្រាន់តែជាយុទ្ធសាស្ដ្រវែកស្មៅបង្អើលពស់?
ចែករំលែកព័តមាននេះ