ទីក្រុងបឺន (Bern)៖ ថ្មីៗនេះ ប្រទេសស្វីសយល់ព្រមធ្វើជាម្ចាស់ផ្ទះរៀបចំកិច្ចប្រជុំកំពូលជាសាកលដើម្បីស្វែងរកដំណោះស្រាយសន្តិភាពសម្រាប់ប្រទេសអ៊ុយក្រែន។ ការស្ម័គ្រខ្លួនធ្វើជាម្ចាស់ផ្ទះតបតាមការស្នើសុំពីប្រធានាធិបតីអ៊ុយក្រែន លោកហ្សេឡិនស្គី (Zelenskiy)។ កាលពីពេលកន្លងមក ស្វីសក្នុងនាមជាប្រទេសអព្យាក្រឹតឥតលម្អៀងនៅក្នុងនយោបាយការបរទេសរបស់ខ្លួន ធ្លាប់បានធ្វើជាទឹកដីកណ្ដាលដើម្បីរៀបចំសន្និសីទនានាដោះស្រាយជម្លោះ។ លើកនេះ គេសង្ឃឹមថាស្វីសក៏អាចជួយស្វែងរកដំណោះស្រាយបញ្ចប់សង្គ្រាមរ៉ាំរ៉ៃនៅអ៊ុយក្រែនដែលនៅសល់ជាង១ខែទៀតប៉ុណ្ណោះនឹងគម្រប់រយៈពេលពីរឆ្នាំហើយ។
រដ្ឋាភិបាលស្វីសថ្លែងនៅក្នុងសេចក្ដីប្រកាសរបស់ខ្លួនថា «តបតាមសំណូមពររបស់លោកប្រធានាធិបតីអ៊ុយក្រែន, ស្វីសបានឯកភាពគ្នាថានឹងធ្វើជាម្ចាស់ផ្ទះរៀបចំកិច្ចប្រជុំកំពូលដើម្បីបង្កើតរូបមន្តសន្តិភាពនេះ»។ ថ្លែងនៅចំពោះមុខថ្នាក់ដឹកនាំស្វីសលោកស្រីវីយ៉ូឡា (Viola), លោកហ្សេឡិនស្គីមិនទាន់បង្ហាញបញ្ជីរាយនាមគណៈប្រតិភូដែលត្រូវចូលរួមនៅក្នុងសន្និសីទកំពូលលើកនេះទេ។ ប៉ុន្តែលោកលោកបានបង្ហើបឱ្យដឹងថាអំពីមនុស្សមួយចំនួនដែលកំពុងចាប់អារម្មណ៍ចង់ចូលរួម។
លោកថ្លែងថាយើងបើកចំហជានិច្ចដើម្បីរង់ចាំទទួលស្វាគមន៍ប្រទេសទាំងអស់ដែលគោរពអធិបតេយ្យភាពជាតិ និងបូរណភាពទឹកដីរបស់យើង (អ៊ុយក្រែន) ពួកគេអាចអញ្ជើញចូលរួមបានទាំងអស់នៅក្នុងសន្និសីទនេះ។ ដូច្នេះ គេអាចយល់ទាំងអស់គ្នាថាប្រទេសណាខ្លះអាចទទួលបានការអញ្ជើញពីយើង។ យើងចង់ឃើញវត្តមានរបស់ក្រុមក្លូបល.សោស (Global South) ចូលរួម។ ជារឿងសំខាន់ដែលយើងចង់បង្ហាញថាពិភពលោកទាំងមូលប្រឆាំងនឹងអំពើឈ្លានពានរបស់រុស្ស៊ី។ ហើយពិភពលោកទាំងមូលប្រាថ្នាចង់បានសន្តិភាពមួយដែលប្រកបដោយយុត្តិធម៌ (លោកចង់សំដៅលើសន្តិភាពដោយស្មើមុខ)។
លោកហ្សេឡិនស្គី និងលោកស្រីវីយ៉ូឡា មិនបានបញ្ជាក់ថាតើសន្និសីទកំពូលនឹងរៀបចំនៅពេលណា ឬនៅកន្លែងណាទេ។ គេគ្រាន់តែដឹងថារៀបចំនៅប្រទេសស្វីស។ ក្រុមការងារនឹងចាប់ផ្ដើមការងាររបស់ខ្លួនជាបណ្ដើរៗចាប់ពីថ្ងៃនេះទៅ។ លោកហ្សេឡិនស្គីកំពុងស្ថិតនៅប្រទេសស្វីសដើម្បីជួបថ្នាក់ដឹកនាំធំៗដែលចូលរួមវេទិកាសេដ្ឋកិច្ចពិភពលោកនៅដាវ៉ូស (Davos)។
នៅក្នុងចំណោមអ្នកមុខអ្នកការដែលលោកហ្សេឡិនស្គីជួបមានដូចជានាយករដ្ឋមន្ត្រីចិន លោកលីឆៀង (Li Qiang) ដែលចូលរួមវេទិកាសេដ្ឋកិច្ចនៅសប្ដាហ៍នេះ។ អ៊ុយក្រែនថ្លែងថាបើបានប្រទេសចិនចូលរួមនៅក្នុងការពិភាក្សាគ្នាដើម្បីបញ្ចប់ជម្លោះនៅអ៊ុយក្រែនជាការប្រសើរណាស់។ កាលពីម្សិលមិញ លោកហ្សេឡិនស្គីថ្លែងថាប្រទេសចិនក្នុងនាមជាសម្ព័ន្ធមិត្តដ៏សំខាន់របស់រុស្ស៊ី បានដើរតួនាទីធំនៅលើឆាកអន្តរជាតិ។ លោកពិតជាចង់ឃើញប្រទេសចិនចូលរួមនៅក្នុងសន្និសីទនេះ។
លោកថ្លែងថាយើងចង់ឃើញប្រទេសចិនចូលរួមនៅក្នុងការបង្កើតរូបមន្តសន្តិភាព និងចូលរួមនៅក្នុងសន្និសីទនេះ។ ប៉ុន្តែលោកយល់ថាអ្វីៗគ្រប់យ៉ាងមិនមែនអាស្រ័យទៅលើការគិតរបស់យើងនោះទេ។ សូមរម្លឹកថាប្រមុខដឹកនាំអ៊ុយក្រែនរូបនេះធ្លាប់បានឱ្យតម្រុយខ្លះៗអំពីរូបមន្តសន្តិភាពជាលើកដំបូងកាលពីខែវិច្ឆិកា ឆ្នាំ២០២៣នៅពេលលោកចូលរួមកិច្ចប្រជុំជីម្ភៃ (G20)។
នៅក្នុងរូបមន្តសន្តិភាពនោះ លោកទាមទារលក្ខខណ្ឌ១ចំនួន៖ ទី១- អ៊ុយក្រែនត្រូវទទួលបានមកវិញនូវទឹកដីដែលបាត់បង់, ទី២- រុស្ស៊ីត្រូវតែដកកងទ័ពទាំងអស់, ទី៣- បិទបញ្ចប់អរិភាព (ឬការយកគ្នាជាសត្រូវ) និងទី៤- រុស្ស៊ីត្រូវដោះលែងឈ្លើយសឹកទាំងអស់។ ក្រៅពីនេះ នៅមានចំណុចជាច្រើនទៀតដែលលោកបានដាក់បញ្ចូលទៅក្នុងសំណើនោះ។
ប៉ុន្តែវិមានក្រឹមឡាំងកាលពីថ្ងៃចន្ទច្រានចោលសំណើរបស់ប្រទេសខ្លះដែលចង់យកវេទិកាសេដ្ឋកិច្ចពិភពលោកនៅដាវ៉ូសដើម្បីជជែកគ្នាអំពីគម្រោងចរចាសន្តិភាព។ ក្រឹមឡាំងថ្លែងថាបើទុកជាប្រជុំទៅក៏គ្មានបានប្រយោជន៍អ្វីដែរព្រោះរុស្ស៊ីនឹងមិនចូលរួមឡើយ៕
ប្រភព៖ Reuters
https://www.reuters.com/world/europe/ukraines-zelenskiy-wants-china-join-global-peace-summit-2024-01-15/
អ្នកនាំពាក្យវិមានក្រឹមឡាំង
ចែករំលែកព័តមាននេះ