ពិតជាគួរអាសូរណាស់ លោកយាយវ័យ៨៥ឆ្នាំម្នាក់ រស់នៅក្រោមដំបូលស័ង្កសីប្រក់មេឃយ៉ាងធ្លុះធ្លាយ បានលើកដៃសំពះទាំងសម្រក់ទឹកភ្នែកសុំឱ្យមហាជនជួយផង ខណៈខ្លួនទាល់ច្រកគ្មានទីពឹង ចៅក៏ពុំអាចធ្វើអ្វីបាន ចំណែកកូនទៅថៃក៏មិនបានដឹងដំណឹងទៀត ហើយ
ខេត្តកំពង់ឆ្នាំង ៖ ពិតជាគួរអាសូរណាស់ លោកយាយវ័យ៨៥ឆ្នាំម្នាក់ រស់នៅក្រោមដំបូលស័ង្កសីប្រក់មេឃយ៉ាងធ្លុះធ្លាយ បានលើកដៃសំពះទាំងសម្រក់ទឹកភ្នែកសុំឱ្យមហាជនជួយផង ខណៈខ្លួនទាល់ច្រកគ្មានទីពឹង ចៅក៏ពុំអាចធ្វើអ្វីបាន ចំណែកកូនទៅថៃក៏មិនបានដឹងដំណឹងទៀត ហើយលោកយាយរស់នៅដោយការដើររើសអេតចាយ និងសុំការសន្តោសប្រណីពីអ្នកភូមិផងរបងជាមួយគ្នា។
នេះហើយជាជីវិ.ត រឿងពិតរបស់លោកយាយម្នាក់ កំពុងតែធ្វើឱ្យមហាជនមានការអាណិតជាពន់ពេក ក្រោយលោកយាយមិនប្រាថ្នាអ្វីច្រើនទេ សុំត្រឹមស័ង្កសី និងអាហារហូបចុកគ្រប់គ្រាន់ ក៏ដូចជាព្យាបាលចៅដែលជួបគ្រោះប្រះឆ្អឹងជើងនោះ។
បើតាមប្រភពពីគណនីមួយឈ្មោះ វឿន ថារី បានប្រាប់អោយដឹងថា «យាយស្រក់ទឹកភ្នែកម៉ាត់ៗ… ហ៊ឹម! អាសូរចិត្ត លោកយាយអាយុ៨៥ឆ្នាំ យំរៀបរាប់ ចៅជួបគ្រោះថ្នាក់គេកៀរប្រេះឆ្អឹងជើងដេកពេទ្យ យាយមានលុយត្រឹមតែ១០០០០រៀល។ គ្មានលុយព្យាបាលចៅ យាយតស៊ូដើររើសសម្បកដបទឹកសុទ្ធ អេតចាយ ដូរយកលុយមកមើលថែចៅ និងទិញអង្ករដាំបាយហូប មួយថ្ងៃរើសបានតែ៣០០០រៀលតែប៉ុណ្ណោះ។ លេខលម្អិតព័ត៌មាន 096 34 95 606 សាមគ្គីមានជ័យ កំពង់ឆ្នាំង។ សូមអរគុណទុកជាមុន»។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកស្រី វឿន ថារី ដែលធ្លាប់បានជួបសួរសុខលោកយាយ បានប្រាប់ឱ្យដឹងថា «លោកយាយពិតជាគួរឱ្យអាណិតណាស់ ដោយលោកយាយគ្មានទីពឹងនោះឡើយ ហើយត្រូវចិញ្ចឹមចៅដែលប្រះឆ្អឹងជើងទៀត មូលហេតុគឺកាលពីពេលកន្លងទៅ ចៅលោកជួបគ្រោះថ្នាក់។ ហើយកាលនោះទៀតសោត លោកយាយមានលុយត្រឹម១០០០០រៀលប៉ុណ្ណោះក្នុងការព្យាបាលចៅ គ្រានោះលោកដើរសុំគេផង ដើររើសសម្បកដប សម្បកកំប៉ុងផង»។
អ្នកស្រី វឿន ថារី បានបន្តថា «លោកយាយឈ្មោះ ស៊យ លោកយាយសព្វថ្ងៃរស់នៅភូមិត្បែងខ្ពស់ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំ។ លោកយាយប្រកបរបរដើររើសអេតចាយលក់បានលុយទុកគ្រាន់ចិញ្ចឹមជីវិត ជួនកាលគេអាណិត គេក៏អោយបន្តិចបន្ដួត ទុកគ្រាន់បានលុយទិញអង្គរហូបចុក»។
បើតាមលោកយាយ ស៊យ ដែលមានអាយុ៨៥ឆ្នាំ បាននិយាយដែរថា «លោកយាយសុំត្រឹមស័ង្កសីសម្រាប់ប្រក់ផ្ទះ និងស្បៀងអាហារ ដោយលោកយាយរកព្រឹកខ្វះល្ងាច ហើយគ្មានទីពឹងនោះឡើយ ចំណែកកូនទៅធ្វើការនៅថៃក៏គ្មានដំណឹងទៀត រីឯចៅក៏គ្រោះថ្នាក់ផងដែរ។ លោកយាយសព្វថ្ងៃនេះពិតជាលំបាកខ្លាំងណាស់ ត្រូវរ៉ាប់រងចិញ្ចឹមចៅដែលគ្រោះថ្នាក់ធ្វើឱ្យប្រះឆ្អឹងជើង ដោយការដើររើសអេតចាយ និងដើរសុំទានគេ»។
គួរបញ្ជាក់ដែរថា លោកយាយរស់នៅ៣នាក់ជាមួយចៅ ដោយចៅមិនអាចធ្វើអ្វីបាននោះទេ ហើយលោកយាយសុំត្រឹមស័ង្កសីប្រក់ដំបូលផ្ទះតែប៉ុណ្ណោះ ព្រោះថា នៅពេលមានភ្លៀងធ្លាក់មកម្តងៗ គឺត្រូវជ្រកភ្លៀងក្រោយផ្ទះដ៏កម្សត់ដែលដំបូលធ្លុះធា្លយនោះ៕
អត្ថបទដោយ ៖ លីហួ គីមឆាយ
ចែករំលែកព័តមាននេះ