ឈើប្រភេទស្រឡៅក្តារងឿ ជិត២០សន្លឹក ដែលមេឈ្មួញដុះស្លែម្នាក់ដឹកយកមកស្តុបទុកនៅក្នុងដីឡូតិ៍មួយកន្លែងសម្រាប់ធ្វើអាជីវកម្ម ដោយមិនស្របច្បាប់ ត្រូវបានកម្លាំងសមត្ថកិច្ចចម្រុះ ចុះទៅបង្ក្រាប រួចយកទៅ
ខេត្តរតនគិរី ៖ ឈើប្រភេទស្រឡៅក្តារងឿ ជិត២០សន្លឹក ដែលមេឈ្មួញដុះស្លែម្នាក់ដឹកយកមកស្តុបទុកនៅក្នុងដីឡូតិ៍មួយកន្លែងសម្រាប់ធ្វើអាជីវកម្ម ដោយមិនស្របច្បាប់ ត្រូវបានកម្លាំងសមត្ថកិច្ចចម្រុះ ចុះទៅបង្ក្រាប រួចយកទៅរក្សារទុក ដើម្បីចាត់ការបន្តតាមច្បាប់ព្រៃឈើហើយ។
ការចុះបង្ក្រាបនោះ កម្លាំងចម្រុះ បានធ្វើឡើងកាលពីវេលាម៉ោង៩និង៣០នាទីព្រឹក ថ្ងៃទី១៣ ខែមករា ឆ្នាំ២០២៤ ស្ថិតក្នុងភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី ។
ប្រតិបត្តិការសមត្ថកិច្ចចម្រុះ ចុះឡោមព័ទ្ធគំនរឈើខាងលើ រួមមាន៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តរតនគិរី, កម្លាំងរដ្ឋបាលព្រៃឈើក្រុងបានលុង ដឹកនាំផ្ទាល់ដោយលោកឧត្តមសេនីយ៍ទោ អ៊ុង សុភាព ស្នងការនគរបាលខេត្ត និងមានការចង្អុលបង្ហាញពីលោក លាង អ៊ូ ព្រះរាជអាជ្ញារងនៃអយ្យការអមសាលាដំបូងខេត្តរតនគិរី។
បើតាមប្រភពបង្ហើបឱ្យដឹងថា មុនសមត្ថកិច្ចចុះទៅដល់គំនរឈើទាំងនោះ គឺក្រុមឈ្មួញបានជម្លៀសឈើល្អៗចេញពីគំនរអស់ជាច្រើនសន្លឹកទៅហើយ ហាក់បីដូចជាបានដឹងរឿងជាមុនអ៊ីចឹង។ លុះពេលសមត្ថកិច្ចចុះទៅដល់ គឺឃើញនៅសល់តែចំនួន១៩សន្លឹកតែប៉ុណ្ណោះ ដែលជាប្រភេទឈើស្រឡៅសុទ្ធ (ស្មើជាងមួយម៉ែត្រគូប១.៦៦ម៉ែគូប) និងឈើក្លុំបួនជ្រុង ប្រភេទសុក្រំចំនួន២ដុំទៀត ។ ចំណែកឯម្ចាស់ឈើមានឈ្មោះ គុណ ២នាក់ប្តីប្រពន្ធវិញ បានចាក់សោរទ្វារផ្ទះ រួចរត់គេចខ្លួនបាត់ស្រមោលភ្លាមៗតែម្ដង ។
បើតាមប្រភពពីប្រជាពលរដ្ឋវិញ ក៏បានប្រាប់ឱ្យដឹងដែរថា ឈ្មួញដុះស្លែម្នាក់នោះ មានទីលំនៅផ្ទះជួលចល័ត រហូតមិនមានលំនឹងនោះឡើយ ប៉ុន្តែប៉ុន្មានខែមុន គឺរស់នៅទីរួមស្រុកអូរជុំ លុះចូលមកខែថ្មី ឆ្នាំ២០២៤នេះ ក៏មករស់នៅផ្ទះជួលទីតាំងដែលសមត្ថកិច្ចចុះបង្ក្រាបខាងលើនេះដែលជាកន្លែងអំណោយផល ស្ងាត់ល្អផង ងាយស្រួលលក់ចេញ ទិញចូល បទល្មើសព្រៃឈើ នោះ។
ប្រភពដដែលបន្តថា មិនត្រឹមតែប៉ុណ្ណោះ គេតែងតែឃើញឈ្មួញនោះប្រមូលទិញឈើ រួចដឹកតាមម៉ូតូខ្នាតយក្ស ចេញពីព្រៃសហគមន៍ ព្រៃការពារ និងព្រៃអភិរក្សជីវៈចម្រុះ ក្នុងស្រុកវើនសៃន នៅពេលយប់កណ្តាលអធ្រាត្រ ឬជិតភ្លឺ ពេលដែលសមត្ថកិច្ចសម្រាកដេកលក់។
បច្ចុប្បន្ន វត្ថុតាងខាងលើ ត្រូវបានកម្លាំងជំនាញព្រៃឈើក្រុងបានលុង យកទៅរក្សាទុកនៅខណ្ឌរដ្ឋបាលព្រៃឈើខេត្ត ដើម្បីចាត់ការបន្តតាមច្បាប់ព្រៃឈើហើយ៕
ចែករំលែកព័តមាននេះ