ខេត្តស្វាយរៀង៖ ក្រុម​ឈ្មួញ​​វៀតណាម បាន​ចូលមកប្រមូលទិញដើម​ឈើ ដែលជាប្រភេទ​ឈើ​អុស នៅតាម​​បន្ទា​ត់ព្រំដែន​​ ក្នុងខេត្តស្វាយរៀង ហើយនាំចេញតាម​ព្រែក ក្នុង​ភូមិវាលម្អមឃុំថ្មី ស្រុកកំពង់រោទិ៍។

ប្រជាពលរដ្ឋនៅភូមិវាលម្អម ឃុំថ្មី បានប្រាប់អ្នកសារព័ត៌មានយើងថា វៀតណាមបានប្រើប្រាស់​ទូក​ប៉ុកចៃធំៗ ចូលមកតាមព្រែកព្រំដែន មកចតនៅកំពង់ជាប់ផ្លូវក្រវ៉ាត់ព្រំដែន ហើយដើរប្រមូល​ទិញ​ដើមឈើ តាមក្រវ៉ាត់ព្រំដែន ដោយមានសមត្ថកិច្ចនគបាលការពារព្រំដែនសម្របសម្រួល ឲ្យ​ដើរកាប់ ដោយប្រើ​រណា​យន្តអារ​កាត់ដើមឈើទាំងនោះ។ ដើមឈើ ដែលវៀតណាម ទិញ ហើយកាប់​ ដឹកតាមទូកនោះ រួមមាន ដើមស្មាច់ ដើមអាកាស្យា ដើមត្រចៀកជ្រូក និងឈើចម្រុះមុខកាត់ ០៣តឹក ទៅ ០៤តឹក លើកដាក់ទូក ដឹកទៅប្រទេសវៀតណាម។

ប្រភពបន្តទៀតថា ដើមឈើតាមក្រវ៉ាត់ព្រំដែននេះ គឺមានទាំងដើមឈើធម្មជាតិ ដើមស្មាច់ និងដើមឈើចម្រុះ ដែល​ដុះនៅតាមបណ្តោយមាត់ព្រែក​។

ទាក់ទិនករណីនេះ លោកវរៈសេនីយ៍ទោ ហែម សាមុត អធិការនៃអធិការដ្ឋាននគរ​បាល ស្រុកកំពង់រោទិ៍ បានប្រាប់កោះសន្តិភាពថា គឺពិតជាមានវៀតណាម មកប្រមូលទិញឈើ​ពិតប្រកដមែន គឺអាជ្ញាធរមានសមត្ថកិច្ច មិនអាចទប់ស្កាត់បានទេ ដោយប្រជាពលរដ្ឋខ្មែរយើង និងប្រជាពលរដ្ឋវៀតណាម រស់នៅជិតព្រំដែន តែងតែចេញចូលរកស៊ីទៅវិញទៅមក។

លោកអធិការ បន្តថា ចំពោះដើមឈើនៅតាមព្រំដែន គឺប្រជាពលរដ្ឋជាអ្នកកាប់លក់ គឺគាត់កាប់នៅតាមចុងដីរបស់គាត់ ដែល​សមត្ថកិច្ចយើងមិនអាចប៉ះពាល់ ឬហាមគាត់បានទេ។ ចំពោះវៀតណាម យកទូកឆ្លងដែន ចូលមកទឹកដីកម្ពុជាយើង សូមសួរទៅសមត្ថកិច្ច​ប៉ូលិសវរៈការពារព្រំដែន។

ទាក់ទិនករណីនេះ ភ្នាក់​យើង ​មិនអាចទាក់ទងលោកវរៈសេនីយ៍ទោ យ៉ន សុផល ប្រធាននគបាលវរៈការពារព្រំដែនជើងគោក លេខ៦០៩ នៃស្នងការដ្ឋាននគបាល ខេត្តស្វាយរៀង បានទេ។

ចំណែក​លោក សុច ពិសី អភិបាលស្រុកកំពង់រោទិ៍ បានមានប្រសាសន៍ថា លោកមិនបានដឹងករណីនេះទេ។ ចាំលោកឲ្យនគរបាល ចុះទៅពិនិត្យមើល។

យ៉ាងណាក៏ដោយ មហាជន បានលើកឡើងថា រយៈពេល ១ខែមកហើយ ដែល​ដើមឈើនៅតាមព្រំដែន ត្រូវបានគេកាប់លក់ឲ្យក្រុមឈ្មួញវៀតណាម ដឹកតាមរថយន្ត និងតាមត្រាក់ទ័រទាំង​យប់ ទាំងថ្ងៃ យកទៅដាក់ទូកប៉ុកចៃ ដឹក​ចេញ​ទៅប្រទេសវៀតណាម​៕ វ៉ាន់ ប៊ុនធឿន