ខេត្តកំពង់ស្ពឺ ៖ ទីតាំងទិញហ្គាសពីឡានស៊ីទែនរបស់ក្រុមហ៊ុនធំៗ ដែលធ្លាប់ត្រូវអណ្ដាតភ្លើងឆាបឆេះយ៉ាងសន្ធោសន្ធៅកាលពីយប់ថ្ងៃទី១៣ ខែតុលា ឆ្នាំ២០២៣ កន្លងទៅនោះ ពេលនេះបានបើកដំណើរការបន្តទិញហ្គាសពីរថយន្តដឹកហ្គាសរបស់ក្រុមហ៊ុនធំៗដូចមុនដដែល ដោយមិនខ្លាចកើតមានគ្រោះអគ្គិភ័យដូចលើកមុនឡើយ។
ជាក់ស្ដែងកាលពីថ្ងៃទី១២ ខែមករា ឆ្នាំ២០២៤ កន្លងទៅនេះ គេឃើញមានរថយន្តដឹកហ្គាសរបស់ក្រុមហ៊ុនដ៏ធំមួយ ទិសដៅពីកំពង់សោម ទៅភ្នំពេញ បានចូលទៅទីតាំងទិញហ្គាសមួយកន្លែង ស្ថិតក្នុងភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។ ដើម្បីបូមហ្គាសពីស៊ីទែនដាក់ចូលទៅក្នុងធុងហ្គាសលក់ទៅឲ្យក្រុមអ្នកទិញហ្គាសខុសច្បាប់ទុកលក់បន្ត។
ទីតាំងទិញហ្គាសខាងលើនេះ តាមប្រភព គឺនៅតែបន្តទិញហ្គាសពីរថយន្តដឹកហ្គាសរបស់ក្រុមហ៊ុនធំៗ នៅក្នុងស្រុកខ្មែរ ជាពិសេសគឺឡានដែលមានស៊ីទែនធំៗរបស់ក្រុមហ៊ុននានា ដោយគ្មានញញើតច្បាប់ទាល់តែសោះ។
មានការលើកឡើងផងដែរថា ករណីនេះ ម្ចាស់ក្រុមហ៊ុនធំៗដែលមានឡានដឹកហ្គាសនេះ គួរណាស់តែដាក់បណ្ដាញតាមសង្កេត និងតាមដានមើលបុគ្គលិកដែលជាតៃកុងឡានរបស់ខ្លួន ដើម្បីឈានទៅអនុវត្តតាមនីតិវិធីច្បាប់ខ្លះ ហើយបើនៅតែបណ្ដែតបណ្ដោយបែបនេះតទៅទៀត ថ្ងៃណាមួយច្បាស់ជាមានគ្រោះអគ្គិភ័យដូចមុនជាក់ជាមិនខានឡើយ។
សូមរំលឹកថា កាលពីយប់ថ្ងៃសុក្រ ត្រូវនឹងថ្ងៃទី១៣ ខែតុលា ឆ្នាំ២០២៣ វេលាម៉ោង១៨និង២៥នាទីល្ងាច មានករណីអគ្គិភ័យមួយបានកើតឡើង បណ្ដាលឲ្យឆេះរោងមួយ ដែលមានទំហំ៥ម៉ែត្រគុណ១២ម៉ែត្រ និងរងរបួសកម្មករចំនួន២នាក់។ ក្នុងករណីនេះ សមត្ថកិច្ចបានប្រើប្រាស់ទឹកអស់ចំនួន៣រថយន្ត ទើបអណ្ដាតភ្លើងរលត់ទៅវិញទាំងស្រុង ។ ហើយចំពោះមូលហេតុ គឺដោយសារតែការបូមហ្គាសខុសបច្ចេកទេសរបស់ម្ចាស់ទីតាំងទិញហ្គាសខុសច្បាប់មួយនេះ។
សូមបញ្ជាក់ថា ទីតាំងលួ.ចលា.ក់ទិញហ្គាសតាមរថយន្តក្រុមហ៊ុនមួយកន្លែង ត្រូវបានអគ្គិភ័យឆាបឆេះយ៉ាងសន្ធោរសន្ធៅ ខណៈកំពុងតែបូមហ្គាសចេញពីរថយន្តដាក់ក្នុងធុងហ្គាស បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចេញអន្តរាគមន់ ដើម្បីកុំឲ្យឆេះឆ្លងរាលដាលដល់ផ្ទះអ្នកជិតខាង។ ករណីអគ្គីភ័យនេះ កើតឡើងនាព្រលប់ម៉ោង១៨និង៣០នាទី ថ្ងៃទី១៣ ខែតុលា ឆ្នាំ២០២៣ ស្ថិតនៅក្នុងភូមិស្រល់(ទី៦) ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។ ចំណែកម្ចាស់ទីតាំងទិញលក់ហ្គាសខាងលើ ត្រូវបានអ្នកស្រុកហៅថា «មុន្នី»។
ប្រភពពីកន្លែងកើតហេតុ បានប្រាប់ឲ្យដឹងថា មុនពេលមានអគ្គិភ័យកើតឡើង គេបានឃើញរថយន្តដឹកហ្គាសដែលធ្វើដំណើរមកពីកំពង់សោម បានចូលទៅទីតាំងកើតហេតុខាងលើ ដើម្បីបូមហ្គាសចេញពីស៊ីទែនដាក់ក្នុងធុងហ្គាស ខណៈបូមបាន៤ធុង ស្របពេលដែលទីតាំងខាងលើនេះ មានស្តុកហ្គាសប្រមាណ២០០ធុងទៀតដែលបានបូមពីមុនមក។
ប្រភពដដែលបន្តថា ខណៈពេលកំពុងតែបូមហ្គាសចេញពីស៊ីទែនដាក់ក្នុងធុងនោះ តៃកុងរថយន្តក៏ជក់បារី ហើយក៏ឆាបឆេះតែម្ដង រំពេចនោះដែរ តៃកុងរថយន្តមិនបង្អង់យូរក៏ស្ទុះស្ទារបើករថយន្តចេញយ៉ាងប្រញាប់។ ខណៈពេលនោះអគ្គិភ័យក៏បានឆាបឆេះយ៉ាងសន្ធោសន្ធៅបង្កការភ្ញាក់ផ្អើលដល់ប្រជាពលរដ្ឋរស់នៅតំបន់នោះ និងសមត្ថកិច្ចចេញអន្តរាគមន៍ពន្លត់អគ្គិភ័យទាំងយប់ភ្លាមៗតែម្ដង ។ ហើយក្នុងហេតុការណ៍នេះដែរ បណ្ដាលឲ្យរងរបួសកម្មករចំនួន២នាក់រងរបួស ហើយត្រូវបញ្ជូនទៅមណ្ឌលសុខភាព ដើម្បីធ្វើការសង្គ្រោះបឋមផងដែរ។
ប្រភពពីប្រជាពលរដ្ឋរស់នៅកន្លែងកើតហេតុ បានលួ.ចខ្សឹបប្រាប់ថា ទីតាំងនេះ គឺជាកន្លែងលួ.ចលា.ក់ទិញហ្គាសពីរថយន្តស៊ីទែនរបស់ក្រុមហ៊ុនដ៏ធំមួយក្នុងស្រុកខ្មែរជាយូរឆ្នាំមកហើយ។ កន្លងមក គេក៏សង្កេតឃើញមានមនុស្សចេញចូលកន្លែងនោះជាហូរហែដែរ នៅពេលដែលគេត្រូវការលាភសក្ការៈម្ដងៗ។
ប្រភពដដែលបានបន្តទៀតថា ហេតុការណ៍នេះ បើតាមអាជ្ញាធរមូលដ្ឋានធ្វើការសាកសួរ គឺពីដំបូងឡើយ ម្ចាស់ទីតាំងបញ្ជាក់ថា ផ្ដើមចេញពីការបូមហ្គាសពីស៊ីទែនរថយន្ត៣២តោនរបស់ក្រុមហ៊ុនមួយ ពិតប្រាកដមែន។ តែក្រោយមក គេក៏បង្វែរថា មានអ្នកឆ្លុះកង្កែបបោះកន្ទុយបារី ទើបបណ្ដាលឲ្យមានអគ្គិភ័យបែបនេះ។
ពាក់ព័ន្ធករណីខាងលើនេះ អាចជាសារដាស់តឿនដល់ម្ចាស់ក្រុមហ៊ុនឡានដឹកហ្គាសធំៗ សូមបង្ការយកចិត្តទុកដាក់ឲ្យបានខ្ពស់ចំពោះការដឹកជញ្ជូនហ្គាសរបស់ខ្លួន ព្រោះថា សម័យនេះជាសម័យបច្ចេកវិទ្យា ហើយក្រុមរកស៊ីល្មើសច្បាប់ក៏មានបច្ចេកទេសខ្ពស់ក្នុងការលួ.ចដែរ។
ជាក់ស្ដែងដូចជាករណីនេះជាដើម បើសិនតៃកុងឡានដឹកហ្គាសមិនធ្វេសប្រហែសជក់បារី ខណៈពេលកំពុងតែបូមបង្កឲ្យមានគ្រោះអគ្គិភ័យទេ ម្ល៉េះសមទីតាំងលួ.ចលា.ក់ទិញហ្គាសមួយកន្លែងនេះ សុខសប្បាយក្នុងការទិញលក់ជានិច្ចនិរន្តរ៍ ស្របពេលដែលមុខរបរនេះ ធ្វើឡើងរាប់ឆ្នាំមកហើយ។
ដោយឡែកប្រភពពីសមត្ថកិច្ចនគរបាលស្រុកភ្នំស្រួចវិញ ក៏បានបញ្ជាក់ដែរថា ក្រោយពីទទួលព័ត៌មានក្រោមការបញ្ជារបស់លោកស្នងការបានឲ្យរថយន្តចេញអន្តរាគមន៍ភ្លាមៗផងដែរ ដើម្បីបង្ការចៀសវាងកុំឲ្យមានភ្លើងឆ្លងរាលដល់ផ្ទះអ្នកជិតខាង។ ដោយប្រើប្រាស់រថយន្តចំនួន៣គ្រឿង និងប្រើទឹកអស់ចំនួន៣ស៊ីទែន ហើយទីតាំងឆាបឆេះនេះ គឺមានទំហំ៥ម៉ែត្រ គុណ១២ម៉ែត្រ ស្ថិតនៅកន្លែងកើតហេតុខាងលើ៕
ចែករំលែកព័តមាននេះ